စစ်တပ်ကမုံရွာ၊ယာကြီး၊ ကလေးဝလမ်းအတိုင်း ကနီ နှင့် ပုလဲကိုစစ်ကြောင်းထိုး၍ပြည်သူတစ်​သောင်း​ကျော်ထွက်​ပြေး​နေရ

စက်တင်ဘာ-၈၊၂၀၂၅။ လူအေး/People’s Spring

စစ်ကောင်စီက မုံရွာ၊ယာကြီး၊ ကလေးဝလမ်းအတိုင်း သြဂုတ်လကုန်ပိုင်းမှစ၍ ကနီ နှင့်ပုလဲမြို့ကိုစစ်ကြောင်းများထိုးလာ၍ ဒေသခံ ၁၀,၀၀၀ ကျော်သည် ထွက်ပြေးတိမ်းရှောင်နေရကြောင်း ​တော်လှန်​ရေးအင်အားစုများနှင့် ​ဒေသခံများကပြောသည်။

“မုံရွာ၊ယာကြီး၊ ကလေးဝလမ်းကနေ ကားတွေနဲ့ ဝင်လာတာ။ သူတို့တပ်ဖွဲ့ဝင်တွေကို လမ်းဘေးတွေမှာ အသုတ်လိုက်ထားခဲ့ပြီး ရွာတွေကိုစစ်ကြောင်းထိုးခိုင်းတာ။ ကနီမှာဆို အခုရက်ထဲမှာတင် စစ်ဘေးရှောင် ၇,၀၀၀ကျော်ပါပြီ”ဟု ယင်းမာပင်-ဆားလင်းကြီး ရွာပေါင်းစုံသပိတ်ဦးဆောင်ကော်မတီဝင်တစ်ဦးကပြောသည်။

ကနီမြို့နယ်အတွင်း သမင်ခြံရွာနှင့် ချင်းတွင်းမြစ်ကမ်းဘေးရွာအချို့ကို စစ်တပ်က စက်တင်ဘာလဆန်းအတွင်း ‌လေကြောင်းမှဗုံးကြဲပြီး မြေပြင်မှစစ်ကြောင်းထိုးနေလာသဖြင့် ဒေသခံပြည်သူများထွက်ပြေး တိမ်းရှောင်နေကြရ​ကြောင်း ​ဒေသခံအချို့က​ပြောသည်။

Public Service Announcement

ယင်းမာပင်ခရိုင်တွင် ကနီ၊ ပုလဲ၊ ဆားလင်းကြီးနှင့် ယင်းမာပင်မြို့နယ်တို့ပါဝင်သည်။ စစ်ကောင်စီသည် ကနီနှင့်ပုလဲကို ဦးတည်၍စစ်ကြောင်းထိုးနေပြီး နှစ်မြို့နယ်စလုံးသို့ လေကြောင်းတိုက်ခိုက်မှုများ နှင့် မြေပြင်စစ်ကြောင်းထိုးမှူများပြုလုပ်နေသည်ဟု ပုလဲမြို့မှ ကာကွယ်ရေးရဲဘော်တစ်ဦးကပြောသည်။

ဩဂုတ်လကုန် နှင့် စက်တင်ဘာလဆန်းကာလအတွင်း စစ်တပ်ကလေကြောင်းတိုက်ခိုက်မှုကြောင့် ကနီ နှင့် ပုလဲတွင် အရပ်သား ဆယ်ဦးထက်မနည်း သေဆုံးခဲ့သည်ဟု စစ်ဘေးရှောင်များအားကူညီနေသူများကပြောသည်။

ပုလဲမြို့နယ်မှဒေသကာကွယ်ရေးရဲဘော်တဦးက”ရွေး‌ကောက်ပွဲအတွက် နယ်မြေရ‌သလောက်ချဲ့ထွင်ဖို့ လုပ်နေတာဖြစ်တယ်။ ကာကွယ်ရေးတပ်ဖွဲ့တွေကတော့ ကြားဖြတ်တိုက်ခိုက်တာတွေ၊ မိုင်းဆွဲတာတွေရှိတယ်။ စစ်ဘေးရှောင်လည်းတအားများနေတယ်”ဟုပြောသည်။

ကနီမြို့ကို ပြည်သူ့ကာကွယ်ရေးပူးပေါင်းတပ်များက ၂၀၂၃ မတ်လတွင် မြို့သိမ်းတိုက်ပွဲတိုက်ခိုက်ခဲ့ပြီး မြို့ပေါ်နေရာအများစုသိမ်းယူနိုင်ခဲ့သော်လည်း စစ်တပ်ကလေကြောင်းမှအပြင်းအထန်တိုက်ခိုက်ပြီး စစ်ကူများပို့၍ ​တော်လှန်​ရေးတပ်များပြန်ဆုတ်ခဲ့ရသည်။ စစ်တပ်က မြို့ပေါ်ကိုသာထိန်းချုပ်ထားနိုင်ပြီး ကျေးရွာအများအပြားကို ပြည်သူ့ကာကွယ်ရေးတပ်များကထိန်းချုပ်ထားသည်။

ပုလဲမြို့တွင်လည်း မြို့ပေါ်နေရာအချို့နှင့် ပျူစောထီးရွာအချို့ကိုသာ စစ်တပ်ကထိန်းချုပ်ထားပြီး မြို့ပတ်ဝန်းကျင်ကျေးရွာအများစုကို ပြည်သူ့ကာကွယ်ရေးတပ်များကထိန်းချုပ်ထားသည်။

စစ်ကောင်စီသည်ယခုအခါ မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)မှ တဆင့်က မုံရွာ၊ယာကြီး၊ ကလေးဝလမ်းအတိုင်း မြေပြင်စစ်ကြောင်းများအင်အားဖြည့်တင်းနေသည်။ မုံရွာ၊ယာကြီး၊ ကလေးဝလမ်းတွင် မုံရွာ- ယင်းမာပင်-ကနီ-မင်းကင်း- ကလေးဝမြို့တို့ ရှိသည်။

စစ်အုပ်စုကသြဂုတ်လဆန်းတွင်မြို့နယ် ၆၃ မြို့နယ်ကို အရေးပေါ်အခြေအနေ နှင့် စစ်အုပ်ချုပ်​ရေးကြေညာခဲ့သည်။ အဆိုပါ ၆၃ မြို့နယ်တွင်စစ်ကိုင်းတိုင်းမှ ထီးချိုင့်၊ ကောလင်း၊ ပင်လည်ဘူး၊ ခင်ဦး၊ ဝက်လက်၊ ကနီ၊ ဒီပဲယင်း၊ပုလဲ နှင့် အင်းတော်မြို့နယ်တို့ပါဝင်နေသည်။