အမေရိကန်မှာ လူစုလူဝေးနဲ့ စီတန်းလှည့်လည်နေတုန်း ကားတစ်စီး ဝင်တိုက်ခဲ့တာကြောင့် လူ ၅ ဦးထက်မနည်း သေဆုံးပြီး ၄၀ ကျော် ဒဏ်ရာရသွားကြောင်း သိရပါတယ်။
ဝစ္စကွန်ဆင် ပြည်နယ်က ဝေါ်ကီရှာမြို့မှာ ခရစ္စမတ်အကြို စီတန်း လှည့်လည်ပွဲတစ်ခု ပြုလုပ်နေတုန်း SUVကားတစ်စီးက လူအုပ်ထဲ ဝင်တိုက်ခဲ့တာ ဖြစ်ပါတယ်။ မြို့ခံ ရဲတပ်ဖွဲ့ အကြီးအကဲ ဒန်သွမ်ဆန်က ဒဏ်ရာရသူတွေထဲမှာ ကလေးတွေလည်း ပါဝင်ကြောင်း ပြောပါတယ်။
နိုဝင်ဘာ ၂၁ ရက် ဖြစ်စဉ်နဲ့ ဆက်စပ်ပြီး လူ ၁ ဦးကို ထိန်းသိမ်းထားလိုက်ကြောင်းလည်း သွမ်ဆန်က ဆိုပါတယ်။ လူအုပ်ထဲ ကားနဲ့ ဝင်တိုက်တဲ့ အကြောင်းရင်းကို စုံစမ်းနေဆဲဖြစ်ပြီး အကြမ်းဖက် ဝါဒနဲ့ ဆက်စပ်တဲ့ အထောက်အထားမျိုး လောလောဆယ် မတွေ့သေးဘူးလို့ ရဲတွေက မှတ်ချက်ပေးထားပါတယ်။
ယာဉ်မောင်းဟာ လူအုပ်ကို ဝင်တိုက်မိတဲ့နောက် တခြားတစ်နေရာကို မောင်းပြေးသွားသေးတယ်လို့လည်း သိရပါတယ်။ အနီရောင် SUV မော်တော်ကားဟာ ကျောင်းတစ်ကျောင်းက အကအဖွဲ့ ချီတက် ကပြနေတဲ့ နေရာကို အရှိန်နဲ့ ဝင်တိုက်ခဲ့တာလို့ မျက်မြင်တွေက ပြောပါတယ်။
Public Service Announcement
အသေအပျောက်နဲ့ ဒဏ်ရာရမှု စာရင်းတွေက တိုးလာနိုင်ကြောင်း၊ တချို့က ကိုယ့်အစီအစဉ်နဲ့ကိုယ် ဆေးရုံရောက်အောင် သွားကြတာမျိုး ရှိပြီး အချက်အလက်တွေ လိုက်စုဆောင်းနေဆဲဖြစ်ကြောင်း ရဲတပ်ဖွဲ့က ကြေညာပါတယ်။ ဝေါ်ကီရှာဟာ လူဦးရေ ၇၂၀၀၀ လောက်သာ နေထိုင်တဲ့ မြို့လေးတစ်ခုဖြစ်ပြီး အခုဖြစ်စဉ်က တစ်မြို့လုံးကို ချောက်ချားသွားစေခဲ့ပါတယ်။
ရဲတပ်ဖွဲ့က ကျောင်းတွေ အားလုံးကို နိုဝင်ဘာ ၂၂ ရက်မှာ ပိတ်ထားကြဖို့ ညွှန်ကြားခဲ့ပြီး လူစုလူဝေးနဲ့ လှည့်လည်တာတွေလည်း လောလောဆယ် မလုပ်ကြဖို့ တိုက်တွန်းထားကြောင်း သိရပါတယ်။
