စစ်တပ်ရွေးကောက်ပွဲဆန့်ကျင်ကြဖို့ စစ်ကိုင်းနဲ့ ပဲခူးတိုင်းက ပြည်သူတွေဆန္ဒပြ

ဒီဇင်ဘာ-၁၉၊၂၀၂၅။ သုည/People’s Spring

စစ်ကိုင်းနဲ့ပဲခူးတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေဟာ စစ်ကောင်စီက ပြုလုပ်မယ့် ရွေးကောက်ပွဲကို ဆန့်ကျင်ကြဖို့ လှုံ့ဆော်တဲ့ဆန္ဒပြလှုပ်ရှားမှုတွေကို ဒီကနေ့ (ဒီဇင်ဘာ ၁၉) မှာ ပြုလုပ်ခဲ့ပါတယ်။

စစ်ကိုင်း ရွှေဘိုမြို့နယ်မှာ ကျောင်းသားလူထု သပိတ်စစ်ကြောင်းက “အတုအယောင်ရွေးကောက်ပွဲ သပိတ်မှောက် ဖက်ဒရယ်လမ်းကို ရဲရဲလျှောက်”ဘန်နာစာသားကိုဆွဲကိုင်ပြီးစစ်တပ်ရွေးကောက်ပွဲဆန့်ကျင်ရေးသပိတ် ချီတက်ဆန္ဒပြခဲ့ပါတယ်။

ဆန္ဒပြပြည်သူတွေကအဓမ္မဖမ်းဆီးအကျဉ်းကျခံထားရတဲ့လူထုခေါင်းဆောင်ဒေါ်အောင်ဆန်းစုကြည်၊သမ္မတဦးဝင်းမြင့်တို့နဲ့တကွ နိုင်ငံရေးအကျဉ်းသားများအားလုံးချွင်းချက်မရှိ အမြန်ဆုံး လွတ်မြောက်ရေး၊ စစ်တပ်ရဲ့ရွေးကောက်ပွဲကို ဆန့်ကျင်ရေး၊ အဓမ္မစစ်မှုထမ်း ဥပဒေ ကို လုံးဝ ဖျက်သိမ်းရေး ကြွေးကြော်ဆန္ဒပြခဲ့ပါတယ်။

Public Service Announcement

အဆိုပါ ကျောင်းသားလူထုသပိတ်ကို ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီ၊ ရွှေဘိုမြို့နယ်သပိတ်အင်အားစုနဲ့ မြောင်မြို့နယ်လူထုသပိတ်တိုက်ပွဲဦးဆောင်ကော်မတီတို့မှ ပူးပေါင်းဝန်းရံခဲ့ကြပါတယ်။

ယင်းမာပင်မြို့နယ်မှာလည်းအောင်လံလွှင့်မည် ရွှေရေကြည် သပိတ်စစ်ကြောင်းက ဦးဆောင်ကာ ညနေခင်းသပိတ်အဖြစ်စစ်တပ်ကျင်းပမယ့် ရွေးကောက်ပွဲကို ဆန့်ကျင်ကြဖို့ လှုံ့ဆော်ဆန္ဒပြခဲ့ပါတယ်။

ယင်းမာပင်မြို့နယ်မြောက်ခြမ်းမှာလည်း အောင်လံလွှင့်မည်ဒေါင်းသွေးနီ သပိတ်စစ်ကြောင်းက “သင့်မဲဖြင့်တရားဝင် လူသတ်ခွင့်မပေးနဲ့ ” စာသားကို ကိုင်ဆောင်ပြီး စစ်အာဏာရှင်စနစ်နဲ့ စစ်တပ်ရွေးကောက်ပွဲ ဆန့်ကျင်ချီတက်ဆန္ဒထုတ်ဖော်ခဲ့ပါတယ်။

ပဲခူးတိုင်းပေါင်းတည်မြို့နယ်၊ရေတာရှည်မြို့နယ်နဲ့ ကန့်ဘလူမြို့နယ် အတွင်းရှိ ဒေသခံပြည်သူတွေကလည်းသပိတ်အင်အားစုတွေနဲ့ပူးပေါင်းပြီး စစ်တပ်ရဲ့ရွေးကောက်ပွဲ ဆန့်ကျင်ရေး ဆန္ဒပြပွဲနဲ့ လူထုဟောပြောပွဲ ကျင်းပခဲ့ပါတယ်။