စစ်တပ်လုပ်တဲ့ ရွေးကောက်ပွဲဆန့်ကျင်ကြောင်း စစ်ကိုင်းနဲ့ ကရင်ပြည်နယ်က ပြည်သူတွေ ဆန္ဒပြ

ဇန်နဝါရီ-၂၂၊၂၀၂၆။ သုည/People’s Spring

စစ်ကိုင်းတိုင်းနဲ့ ကရင်ပြည်နယ်အတွင်းက သပိတ်အဖွဲ့တွေ၊ ဒေသခံပြည်သူတွေဟာ စစ်တပ်က ပြုလုပ်တဲ့ ရွေးကောက်ပွဲကို ဆန့်ကျင်ကြောင်း ဆန္ဒပြတဲ့ သပိတ်လှုပ်ရှားမှုတွေကို ဒီကနေ့ (ဇန်နဝါရီ ၂၂) မှာ ပြုလုပ်ခဲ့ပါတယ်။

ကရင်ပြည်နယ် ကေအဲန်ယူ – ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ဒူးပလာယာခရိုင်၊ ( ကျုံဒိုးမြို့နယ်) ရှိ ပြည်သူလူထုတွေဟာ အာဏာသိမ်း စစ်တပ်လုပ်တဲ့ ရွေးကောက်ပွဲအား ဆန့်ကျင်ကြောင်း ဆန္ဒထုတ်ဖော်ခဲ့ပါတယ်။

ပြည်သူ့ဆန္ဒ မပါတဲ့ စစ်တပ်ရဲ့ ရွေးကောက်ပွဲဆန့်ကျင်တဲ့အနေနဲ့ မြို့နယ် အသီးသီးရှိ လူထုခေါင်းဆောင်တွေက ရွေးကောက်ပွဲ ဆန့်ကျင်ရေးဆိုင်ရာ ဟောပြောခြင်း၊ လက်ကမ်းစာစောင်ဝေငှခြင်း၊ ပိုစတာနဲ့တကွ စီတန်းလှည့်လည်ခြင်းတို့ ပြုလုပ်ခဲ့ပါတယ်။

Public Service Announcement

ဒါ့အပြင် “ပြည်သူကို ညှင်းဆဲသတ်ဖြတ်တဲ့ အစိုးရ အလိုမရှိ”၊ “စစ်အာဏာရှင် အတုအယောင်ရွေးကောက်ပွဲ အလိုမရှိ”၊ “စစ်အာဏာရှင်စနစ်နဲ့ မဟာလူမျိုးကြီးဝါဒ အလိုမရှိ”၊ “လူမျိုးပေါင်းစုံ စည်းလုံးညီညွတ်မှု တည်ဆောက်ရေးနဲ့ ကော်သူးလေ အစိုးရ တည်ဆောက်ရေး” စတဲ့ ကြွေးကြော်သံတွေနဲ့ ချီတက်ဆန္ဒပြခဲ့ပါတယ်။

စစ်ကိုင်းတိုင်း ကနီ မြို့နယ် မုံရွာ ၊ ယာကြီး၊ ကလေးဝ လမ်းတနေရာမှာ နယ်မြေမငြိမ်တဲ့ကြားမှ စစ်အာဏာရှင်ဆန့်ကျင်ရေး ဆန္ဒပြမှု ပြုလုပ်ခဲ့ပါတယ်။

စစ်တပ်လုပ်နေတဲ့ ရွေးကောက်ပွဲကို အလိုမရှိကြောင်း စာသားတွေ ကိုင်ဆောင်ပြီး “ထွက်ပေါက်မဟုတ်ဘူး ထောင်ချောက်ကြီး”၊ “သင့်မဲဖြင့် တရားဝင် လူသတ်ခွင့်မပေးနဲ့” ၊ “ဖက်ဆစ် ရွေးကောက် သပိတ်မှောက် တော်လှန်ရေး ကို ရဲရဲလျှောက်”၊ “အတုအယောင် ရွေးကောက်ပွဲ လုပ်လည်း တော်လှန်ရေးက ဆက်ချမှာပဲ” လို့ ကြွေးကြော်ဆန္ဒပြခဲ့ပါတယ်။

ယင်းမာပင်မြို့နယ်မှာလည်း အောင်လံလွှင့်မည်ရွှေရေကြည်ညနေဆည်းဆာသပိတ်စစ်ကြောင်းမှ ရဲဘော်တွေက ရာသီခွင် အလုပ်မအားတဲ့ကြားမှ စစ်အာဏာရှင်စနစ်နဲ့ စစ်တပ်ရွေးကောက်ပွဲကို ဆန့်ကျင်ကြောင်း “သင့်မဲဖြင့်တရားဝင်လူသတ်ခွင့်မပေးနဲ့” စာသားကိုင်ဆောင်ဆန္ဒပြခဲ့ပါတယ်။

ဓာတ်ပုံ – ရွာပေါင်းစုံသပိတ်၊ စစ်ကိုင်းဒေသသပိတ်အင်အားစု၊ GSCB၊ UKSY