ခြေတုလက်တု လိုအပ်သူတွေကိုပံ့ပိုးမယ့် မင်းမော်ကွန်းရဲ့ မွေးနေ့လက်ဆောင် ကမ်ပိန်း

ဖေဖော်ဝါရီ-၂၊၂၀၂၆။ဆဏ်း/People’s Spring

ဖေဖော်ဝါရီ‌လမွေးနေ့ရှင် တော်လှန်အနုပညာရှင် မင်းမော်ကွန်းက တိုက်ပွဲတွေမှာထိခိုက်ဒဏ်ရာရရှိပြီး ခြေလက်အင်္ဂါဆုံး‌ရှုံးထားတဲ့ ရဲဘော်တွေကို ထောက်ပံ့ပေးနိုင်ဖို့ မွေးနေ့လက်ဆောင် ကမ်ပိန်းကို ပြုလုပ်နေပါတယ်။

“ဒီနှစ်မွေးနေ့မှာ အားလုံးနဲ့အတူ ဒီရဲဘော်တွေပေါ်မှာတင်နေတဲ့ အကြွေးကို ဆပ်ပေးချင်ပါတယ်။ ဒီကမ်ပိန်းကနေ ရန်ပုံငွေ သိန်း (၅၀၀၀) ရှာဖွေဖို့စီစဉ်ထားပါတယ်။ ” လို့ မင်းမော်ကွန်းက အသိပေးထားပါတယ်။

ကမ်ပိန်းကို ဖေဖော်ဝါရီ ၂ ရက်ကနေ ၂၄ ရက်အထိပြုလုပ်မှာဖြစ်ပြီး ပြည်သူတွေအနေနဲ့ ပါဝင်ကူညီပေးဖို့ မေတ္တာရပ်ခံထားပါတယ်။

Public Service Announcement

ပါဝင်ကူညီလိုသူတွေအနေနဲ့ နိုင်ငံအလိုက် Fundraiser တွေဆီမှာ ထောက်ပံ့နိုင်မှာဖြစ်ပြီး Fundraiser စာရင်းကို Artists’ Shelter ရဲ့ ပေ့ခ်ျမှာ ဖော်ပြပေးထားပါတယ်။

ဒီကမ်ပိန်းကရလာတဲ့ ငွေတွေကို ခြေတုလက်တု တပ်ဆင်ဖို့စောင့်ဆိုင်းနေတဲ့ရဲဘော်တွေအတွက် ထောက်ပံ့ပေးသွားမှာလို့ မင်းမော်ကွန်းကပြောပါတယ်။

မွေးနေ့ကျရောက်မယ့် ဖေဖော်ဝါရီ ၂၆ ရက်မှာတော့ 24FM ကနေ သူရဲ့စိတ်ကူးကို ရိုက်ကူးပုံဖော်ထားတဲ့ The Rubbish ဇာတ်လမ်းတိုကို အခမဲ့ ပြသပေးသွားမယ်လို့ အသိပေးထားပါတယ်။