ပုပ္ပါးမှာ စစ်တပ်က ကျေးရွာတွေ နှစ်ရက်ဆက်မီးရှို့ပြီး ထန်းတောင်သူတစ်ဦး ပစ်သတ်

မတ်−၄၊ ၂၀၂၆။ဇေအောင်/People’s Spring

မန္တလေးတိုင်း၊ ညောင်ဦးခရိုင်၊ ကျောက်ပန်းတောင်းမြို့နယ်မှာ စစ်တပ်က နှစ်ရက်ဆက် ကျေးရွာတွေကို မီးပတ်ရှို့နေပြီး ထန်းတောင်သူတစ်ဦးကို သတ်ဖြတ်သွားကြောင်း ဒေသခံများက ပြောပါတယ်။

မနေ့က မတ်လ ၃ရက် နေ့လယ် ၂ နာရီခန့်က ကျောက်ပန်းတောင်းမြို့နယ်၊ ပုပ္ပါးတိုက်နယ်၊ စိတ္တိန်းမြောက်ဘက်ရွာကနေစတင်ပြီး စစ်ကောင်စီတပ်နဲ့ပျူစောထီးတွေက ဝင်ရောက်မီးရှို့ဖျက်ဆီးလို့ စိတ္တိန်းတောင်ကျေးရွာ နေအိမ် ၂၀ ၊စိတ္တိန်းမြောက်ရွာ နေအိမ် ၄၀၊ ကူတောရွာ (တဲတိုက်) နေအိမ် ၈လုံးနဲ့ ကြက်သွန်ဂိုဒေါင်တွေ၊ ပဲမှော်တိုက်တွေ မီးလောင်ပြာကျခဲ့ကြောင်း ကျောက်ပန်းတောင်းလူငယ်ကွန်ရက်က ပြောပါတယ်။

“ကူတော အိမ်ခြေ ၃၀ နီးပါးပါတာ။ စိတ္ထိန်းလည်းမြေပြင်မှာပိုများပါတယ်။”လို့ ဒေသခံတစ်ဦးက ပြောပါတယ်။

Public Service Announcement

ဒါ့အပြင် ဒီကနေ့ မတ်လ ၄ ရက် မနက် ၆ နာရီခွဲခန့်ကလည်း ဆိုင်ဂေါင်ကျေးရွာအနီးရှိ တဲတိုက် ၅ အိမ်ကို ထပ်မံမီးရှို့ဖျက်ဆီးခဲ့ကြောင်း၊ နေ့လယ်ပိုင်းအထိ တဲတိုက်တွေနဲ့ အခြားနေအိမ်တွေကို ဆက်လက်မီးရှို့နေဆဲဖြစ်ကြောင်း အထက်ပါအဖွဲ့က ပြောပါတယ်။

“အိမ်ကြီးအိမ်ကောင်းတွေကို မီးရှို့သွားတာ”လို့ အထက်ပါအဖွဲ့တာဝန်ရှိသူက ပြော​ပါတယ်။

ဒါ့အပြင် စစ်ဘေးရှောင် ဒေသခံ ထန်းတက်တောင်သူတစ်ဦးကိုလည်း စစ်တပ်က ပစ်သတ်သွားကြောင်း သိရပါတယ်။

စစ်တပ်ဟာ ကျေးရွာအတွင်းရှိ ဘုန်းကြီးကျောင်းမှ လမ်းခင်းရန် သိမ်းထားတဲ့အလှူငွေ ကျပ်သိန်း ၃၀ ၊ စစ်မရှောင်နိုင်ဘဲ ကျန်ရစ်တဲ့ အသက်ကြီးပိုင်း အမျိုးသမီးတစ်ဦး​ထံက ကျပ် ၆ သိန်းနဲ့ ရွှေဆွဲကြိုးတစ်ကုံး စတဲ့ငွေသားနဲ့ပစ္စည်းတွေ လုယက်သွားကြောင်း ဒေသခံတွေက ပြောပါတယ်။

အာဏာသိမ်းစစ်တပ်ဟာ ပြီးခဲ့တဲ့ ဖေဖော်ဝါရီ ၁၁ ရက်ကလည်း ကျောက်ပန်းတောင်းမြို့နယ်၊ ဘုရားကြီးကုန်ကျေးရွာကို စစ်ကြောင်းထိုး မီးရှို့ခဲ့ပါသေးတယ်။