မတ် -၅၊၂၀၂၆။ဇော်ဝင်း /People’s Spring
ကရင်နီပြည်နယ်၊ မယ်စဲ့မြို့နယ်က စစ်သုံ့ပန်းတွေထားရှိတဲ့နေရာကို စစ်တပ်က လေကြောင်းတိုက်ခိုက်ခဲ့တာကြောင့် ငါးဦးထက်မနည်း သေဆုံးပြီး ထိခိုက်ဒဏ်ရာရသူတွေ များတယ်လို့ သတင်းရရှိပါတယ်။
ဒီကနေ့ (မတ်လ ၅ ရက်) မနက် ၁၁နာရီဝန်းကျင် က စစ်တပ်ဟာ ဂျက်ဖိုက်တာ နှစ်စီးနဲ့ ကရင်နီတပ်ပေါင်းစု သိမ်းပိုက်ထားတဲ့ မယ်စဲ့မြိုနယ်က အကျဥ်းထောင်ကို ဗုံးကြဲခဲ့တာလို့ ဆိုပါတယ်။
“မယ်စဲ့ထောင် အနီးအနားဘက် ဗုံးကြဲသွားတယ်။အထိအခိုက်ရှိတယ်။စစ်တပ်မိသားစုနဲ့ တပ်ထဲနေထိုင်တဲ့ အမျိုးသမီးနဲ့ ကလေးတွေပါ”လို့ ကရင်နီပြည်ကြားကာလ အုပ်ချုပ်ရေးကောင်စီရဲ့ တွဲဖက်အတွင်းရေးမှူး ဦးဗညားက ပြောပါတယ်။
Public Service Announcement
သေဆုံးသူ ငါးဦးနဲ့ ထိခိုက် သူ ၂၀ ဝန်းကျင်ရှိထားပြီး အများစုဟာ အမျိုးသမီးတွေ ဖြစ်ပြီး ဖားဆောင်းနဲ့ ဘောလခဲမြို့နယ်မှာ ဖမ်းမိခဲ့တဲ့ စစ်သုံ့ပန်းမိသားစုဝင်တွေ ထိခိုက်သေဆုံးခဲ့တာလို့လည်း မယ်စဲ့မြို့နယ်မှာရှိတဲ့ ကရင်နီရဲဘော်တစ်ဦးက အသိပေးပါတယ်။
မယ်စဲ့မြို့နယ် အနောက်ဘက်ခြမ်းက ဖားဆောင်းမြို့နယ်ကို စစ်တပ်စစ်ကြောင်းတွေ ရောက်ရှိနေပေမယ့် ဖားဆောင်းကနေ မယ်စဲ့မြို့ကိုတိုက်ရိုက်ဝင်နိုင်တဲ့ သံလွင်တံတား(ဖားဆောင်း) ဟာ ဖေဖော်ဝါရီက မိုင်းခွဲ ဖျက်ဆီးခံထားရပါတယ်။
ဒါပေမယ့် အခုနှစ် ဇန်နဝါရီက မယ်စဲ့မြို့နယ်မှာရှိတဲ့ အကျဥ်းထောင်ကနေ စစ်ကောင်စီသုံ့ပန်း ၆၀ ကျော် ထွက်ပြေးလွတ်မြောက်သွားခဲ့တဲ့ ဖြစ်စဥ် ရှိခဲ့ဖူးပါတယ်။
“ကျနော်တို့လည်း ယတိပြတ် သုံးသပ်ချက်တော့ မပေးလိုသေးဘူး”လို့ ဦးဗညားက ဒီကနေ့ လေ ကြောင်းတိုက်ခိုက်ခံရတာနဲ့ပတ်သက်ပြီး ပြောပါတယ်။
ပြီးခဲ့တဲ့လကလည်း ကရင်နီပြည်နယ်ထဲမှာ စစ်တပ်ရဲ့ လေကြောင်းတိုက်ခိုက်မှု၊လက်နက်ကြီးပစ်ခတ်တာ နဲ့ ဒရုန်းဗုံးကြဲလို့ အရပ်သား ၇ဦးသေဆုံးခဲ့ပြီး ၁၇ ဦးဒဏ်ရာရတယ်လို့ ကရင်နီလူ့အခွင့်အရေး အဖွဲ့က မနေ့က ထုတ်ပြန်ထားပါတယ်။
