“သူတို့စက်ထဲမှာ ပြောတာကြားတယ်၊ ကလေးတစ်ယောက်တော့ ဆရာ၊ ကျွန်တော်ပစ်သတ်လိုက်ပြီဆရာ”

မတ် – ၁၄ ၊၂၀၂၆

ပဲခူးတိုင်း ၊ညောင်လေးပင်မြို့နယ်အတွင်းက ရေတွင်းကုန်း ၊ ခရုကုန်းနဲ့ကျောင်းကုန်း ကျေးရွာတွေဆီ မတ်လ ၅ ရက်က စစ်ကောင်စီ တပ် စစ်ကြောင်းဝင်ရောက်စီးနင်းရာမှာ အရပ်သား ၄၀ ကျော် သတ်ဖြတ်ခံရတယ်လို့ NUG ကာကွယ်ရေးဝန်ကြီးဌာနက ဆိုပါတယ်။

အဲဒီ အစုလိုက်အပြုံလိုက်သတ်ဖြတ်မှုအကြောင်းကို ဒီနေ့ (မတ်လ ၁၄ ရက်)မှာ NUG က သတင်းစာရှင်းလင်းပွဲ ပြုလုပ်ခဲ့ပြီး မျက်မြင်သက်သေသုံးဦးက အဖြစ်အပျက်တွေကို ထွက်ဆိုခဲ့ကြပါတယ်။ မျက်မြင်သက်သေတစ်ဦးဖြစ်သူ ကိုမျိုး (အမည်လွှဲ) က သူရဲ့အဖြစ်အပျက်ကို ပြောပြရာမှာ သူကိုယ်တိုင် စစ်တပ်ရဲ့ ဖမ်းဆီးတာကို ခံရပြီး လက်ပြန်ကြိုးတုပ်ခံရကာမြေပေါ် မှောက်ရက်သား အနေအထားနဲ့ နာရီနဲ့ချီပြီး နေခဲ့ရသလို အဲဒီအချိန်အတွင်း သူ့ရဲ့ မိန်းမနဲ့ သားဖြစ်သူတို့ သတ်ဖြတ်ခံရတယ်လို့ ပြောထားပါတယ်။

အသက် ၁၃ နှစ်အရွယ်သားဖြစ်သူဟာ စစ်တပ်ရဲ့ ပစ်သတ်တာခံရတာလို့ သူက ပြောပါတယ်။မိသားစုဝင် ငါးဦးအနက် သားကြီးဖြစ်သူက ထိုင်းနိုင်ငံမှာရောက်နေပြီး စစ်တပ်ဝင်ရောက်စီးနင်းတဲ့နေမှာတော့ မိန်းမနဲ့ သားငယ်ကို ဆုံးရှုံးလိုက်ရသူပါ။ဒါအပြင် အသက် တစ်နှစ်ခွဲအရွယ်သမီးဖြစ်သူလည်း ဒဏ်ရာရထားတာကြောင့် ဆေးရုံမှာကုသမှု ခံနေရတယ်လို့ ကိုမျိုးက ဆိုပါတယ်။

Public Service Announcement

အဲဒီနေ့က သူတို့ရွာကို စစ်တပ်က ဝင်ရောက်စီးနင်းခဲ့တဲ့ဖြစ်စဉ်အပေါ် ကိုမျိုးပြောပြချက်ကို အခုရုပ်သံမှာ ကြည့်ရှု့နိုင်ပါတယ်။