စစ်တပ်ဒရုန်းဗုံးကျ ၊တရုတ်နိုင်ငံသား ၃ ဦးသေဆုံး ၊ ၁၀ ဦးကျော်ဒဏ်ရာရ
မတ်-၂၈၊၂၀၂၆။ကြယ်စင်လင်း/People’s Spring
ကရင်ပြည်နယ်၊ မြဝတီမြို့တောင်ဘက် တောင်ကြားထဲမှာရှိတဲ့ဒီမိုကရေစီအကျိုးပြုကရင်တပ်မတော် (DKBA)ပိုင်ဆိုင်တဲ့ကျားဖြန့် အဆောက်အဦးထဲ စစ်တပ်ရဲ့ ဒရုန်းကျမှုကြောင့် တရုတ်နိုင်ငံသား ၃ ဦးသေဆုံးခဲ့ပြီး ၁၀ ဦးကျော်ဒဏ်ရာရရှိခဲ့တယ်လို့ ဒေသခံတွေကပြောပါတယ်။
မတ်လ၂၆ရက်ညပိုင်းမှာစစ်တပ် နဲ့ဆက်ဆံရေးကောင်းတဲ့ DKBA ထိန်းချုပ်ထားတဲ့ သုံးထပ်ကွေ့ အနောက်ဘက် တောင်ကြားထဲမှာဆောက်လုပ်ထားတဲ့ ကျားဖြန့်ခြံဝင်းထဲကို စစ်တပ်က ကာမီကာဇေဒရုန်းနဲ့ တိုက်ခိုက်ခဲ့တာလည်းဖြစ်ပါတယ်။
Public Service Announcement
” သုံးထပ်ကွေ့နားမှာ DKBA ဂိတ်ရှိတယ်။ အဲ့ဂိတ်အနောက်ဘက် တောင်ကြားထဲမှာလုပ်ထားတဲ့ ကျားဖြန့်ဝင်းထဲကို ကျတာ။ တရုတ်တွေနေတဲ့ အဆောင်ပေါ်ကျတာ ၃ ယောက်သေတယ်။ ၁၀ဦးကျော်ဒဏ်ရာရတယ် “လို့ ဒေသခံတစ်ဦးကပြောပါတယ်။
ပြီးခဲ့တဲ့ မတ်လ ၁၃ ရက်မှာလည်း စစ်တပ်ပစ်ခတ်လိုက်တဲ့ လက်နက်ကြီးသုံးလုံးဟာ ဖလူးလေးကျေးရွာအပြင် DKBA ထိန်းချုပ်ထားတဲ့ ကျွန်းတောရှေ့ကကျားဖြန့်ခြံဝင်းထဲကိုကျရောက်ပေါက်ကွဲခဲ့ပါသေးတယ်။
မတ် ၁၃ရက် လက်နက်ကြီးကျရောက်ပေါက်ကွဲမှုကြောင့် တရုတ်နိုင်ငံသား ၃ ဦးသေဆုံးခဲ့ပြီး ၁၀ ဦးထက်မနည်း ထိခိုက်ဒဏ်ရာရရှိခဲ့ပါတယ်။
ဖလူး နဲ့ မင်းလက်ပံ လမ်းပိုင်းမှာ DKBA ပိုင်ဆိုင်တဲ့ ကျားဖြန့်လုပ်ငန်းတွေ ၃ ခုထက်မနည်းရှိပြီး အဲ့ဒီလုပ်ငန်းတွေဟာကျေးရွာအတွင်းနဲ့ လမ်းပိုင်းဘေးတွေမှာတည်ဆောက်ထားကြတာပါ။
အခုထပ်မံဒရုန်းကျရောက်ပေါက်ကွဲခဲ့တဲ့ သုံးထပ်ကွေ့ အနောက်ဘက် တောင်ကြားထဲမှာ ပြုလုပ်ထားတဲ့ ကျားဖြန့်ခြံဝင်းဟာ လူအရောက်ပေါက်နည်းတဲ့နေရာဖြစ်တယ်လို့ ဒေသခံတွေကပြောပါတယ်။
စစ်တပ်ပစ်ခတ်လိုက်တဲ့ ဒရုန်းနဲ့ လက်နက်ကြီးတွေဟာ ကျားဖြန့်ခြံဝင်းထဲကျရောက်ပြီး လူထိခိုက်သေဆုံးမှုတွေရှိနေပေမယ့်လည်း ဒီဖြစ်စဥ်တွေနဲ့ပတ်သက်ပြီး DKBA ဘက်ကတော့ တစ်စုံတစ်ရာထုတ်ပြန်ပြောဆိုတာမရှိပါဘူး။
ဒါအပြင် မြ၀တီမြို့နယ်၊မဲကနယ်-ဖလူး တောလမ်းပိုင်းမှာ ဖေဖော်ဝါရီ ၂၄ ရက်က စစ်တပ်ရဲ့ဒရုန်းနဲ့ တိုက်ခိုက်မှုကြောင့် ဒီမိုကရေစီအကျိုးပြု ကရင့်တပ်မတော် (DKBA)တပ်ဖွဲ့ဝင် သုံးဦးနဲ့ အရပ်သား နှစ်ဦး သေဆုံးခဲ့ပါတယ်။
မြဝတီမြို့ကို စျေးသွားဝယ်တဲ့ လမ်းတနေရာ စစ်မြေပြင်မှာ ဖြစ်ခဲ့တာဖြစ်ပြီး DKBA ရဲဘော်သုံးဦးနဲ့ အရပ်သားနှစ်ဦးတို့ သေဆုံးခဲ့တယ်လို့ DKBA အမှတ် ၁ ကွပ်ကဲရေး နည်းဗျူဟာမှူး ဗိုလ်မှူးကြီး စောတရီးထူးက လူထုနွေဦးကို ပြောပါတယ်။
DKBA အရာရှိတစ်ဦးနဲ့ အရပ်သား ၅ ဦးတို့လည်း ထိခိုက်ဒဏ်ရာတွေ ရရှိခဲ့တယ်လို့ သူက ဆက်ပြောပါတယ်။ဒီဖြစ်စဥ်အပေါ် တုံ့ပြန်ဖို့ မရှိကြောင်းနဲ့ စစ်မြေပြင်မှာ ဒီလိုမျိုးက ဖြစ်တတ်ကြောင်း ဗိုလ်မှူးကြီး စောတရီးထူးက က ဆိုပါတယ်။
DKBA ဟာ ဦးသိန်းစိန်အစိုးရလက်ထက်က တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)လက်မှတ်ထိုးခဲ့တဲ့အဖွဲ့ဖြစ်ပြီး နေပြည်တော်မှာ အာဏာသိမ်းစစ်ကောင်စီနဲ့လည်း တွေ့ဆုံဆွေးနွေးမှုတွေပုံမှန်လုပ်နေတျအဖွဲ့ဖြစ်ပါတယ်။ဒါအပြင် စစ်တပ်ရွေးကောက်ပွဲကို ထောက်ခံတယ်လို့ တရားဝင်ထုတ်ပြန်ထားတဲ့ အဖွဲ့ဖြစ်ပါတယ်။
