ဧပြီ-၁၃၊၂၀၂၆။ဇော်ရမ်း/People’s Spring
စစ်မှုထမ်းသင်တန်းဆင်းတွေကို ကျားထိုးတက်ခိုင်းပြီး လေကြောင်းနဲ့ လက်နက်ကြီးပစ်ကူယူ စခန်းသိမ်းဖို့ ကြိုးစားတဲ့ ဖားကန့်၊ မရှီကထောင်ဆုတောင်းကုန်းတိုက်ပွဲမှာ စစ်တပ်ဘက်ကအများအပြားသေဆုံးပြီး ရုပ်အလောင်းတွေပြန်ဆွဲထုတ်သွားတယ်လို့ သတင်းရရှိပါတယ်။
KIA၊KPDF ထိန်းချုပ်ထားတဲ့မရှီကထောင်ဆုတောင်းကုန်းကို အာဏာသိမ်းစစ်တပ်က ဒီနေ့ (ဧပြီလ ၁၃) မနက်ပိုင်းမှာ အနီးကပ်စစ်ကြောင်းထိုးလာပြီး တိုက်ပွဲပြင်းထန်ခဲ့တာပါ။
“ကျားထိုးပြီး တက်လာတာ။အဲ့အချိန်မှာလေကြောင်းရောလက်နက်ကြီးပါ ပစ်ကူပေးပြီးတက်တာ။ KIA နဲ့ KPDFက ဆီးပစ်တော့ အသေများပြီး အလောင်းတွေကောက်ပြေးတယ်”လို့ စစ်ရေးသတင်းရင်းမြစ်တစ်ဦးကပြောပါတယ်။
Public Service Announcement
လက်ရှိတိုက်ပွဲမှာ စစ်တပ်ဘက်က ဝါယာဇွပ်ပြည်သူ့စစ်အဖွဲ့၊ရှမ်းနီတပ်ဖွဲ့(SNA)လည်းပါဝင်ပြီး စစ်မှုထမ်းသင်တန်းဆင်းတွေကို ကျားထိုးတက်ခိုင်းတာလို့ သိရပါတယ်။ ဒီနေ့ညပိုင်းမှာတော့ တိုက်ပွဲအခြေအနေ ငြိမ်သက်နေပြီး မနက်ပိုင်းနဲ့နေ့လယ်က တိုက်ပွဲအတွင်း ထိခိုက်သေဆုံးမှုအခြေအနေကိုအသေးစိတ်မသိရှိရသေးပါဘူး။
မရှီကထောင်ရပ်ကွက်ထဲကဆုတောင်းကုန်းကိုKIAနဲ့KPDFက ထိန်းချုပ်ထားတာဖြစ်ပါတယ်။ စစ်တပ်က ၎င်းတို့ထိန်းချုပ်ထားတဲ့ဆန်းကြွယ်ရွာဘက်ကနေအင်အားတွေဖြည့်ပြီး စစ်ကြောင်းထိုးသိမ်းပိုက်ဖို့ကြိုးစာယနေတာဖြစ်ပါတယ်။
ဧပြီ ၁၃ ရက်မနက်ပိုင်းကမရှိကတောင်ဆုတောင်းကုန်းအနီးတိုက်ပွဲဖြစ်ပွားနေချိန် ဖားကန့် ဗျူဟာကုန်းမှာ စစ်တပ်က သင်္ကြန်အကြိုပွဲလုပ်နေစဉ် KIA ၊KPDFကဒရုန်းနဲ့ဗုံးကြဲတိုက်လိုက်လို့ ထိခိုက်သေဆုံးမှုတွေရှိခဲ့ပါတယ်။ဒါကြောင့် ဒီနေ့တစ်နေ့တည်းမှာ စစ်တပ်က လေကြောင်းကနေ ဗုံးလေးကြိမ်ကြဲသွားတယ်လို့စစ်ရေးသတင်းရင်းမြစ်တွေကပြောပါတယ်။ဖားကန့်မှာ တိုက်ပွဲတ တကျော့ပြန်ဖြစ်ပွားတဲ့ ဧပြီလ၂ရက် နဲ့ ၃ရက်နေ့ကလည်း စစ်တပ်ကလေကြောင်းကနေ ဗုံးကြဲခဲ့ပါတယ်။ဧပြီလ ၂ရက်ကတိုက်ပွဲအတွင်းစစ်တပ်ရှေ့တန်းစခန်း ၆ခုကို KIA၊KPDFကသိမ်းယူခဲ့ပါတယ်။ စစ်ကောင်စီတပ်က လေကြောင်းကနေဗုံးကြဲတဲ့အပြင် ဖားကန့်ဗျူဟာကုန်းနဲ့လက်နက်ကြီးတပ်ဆင်ထားတဲ့နေရာတွေကနေ ပစ်ခတ်လို့ ကလေးငယ်အချို့ပါဝင်ဒေသခံ ၆ဦးဒဏ်ရာရခဲ့ပါတယ်။
ဧပြီလ ၁၁ရက်က တိုက်ပွဲမှာစစ်ကောင်စီတပ်စွဲထားတဲ့ဖားကန့်ဗျူဟာကုန်းပေါ်ကို KIA ၊KPDFကဒရုန်းနဲ့ဗုံးကြဲလို့ ထိခိုက်သေဆုံးမှုတွေရှိခဲ့ပါတယ်။စစ်တပ်ကဘည်း လေကြောင်းကနေ တိုက်လေယာဥ်နဲ့ဗုံး သုံးကြိမ်ကြဲခဲ့ပါတယ်။ ဧပြီ ၁၂ ရက်မှာလည်း စစ်တပ်ဗုံးထပ်ကြဲခဲ့ပါသေးတယ်။
စစ်ရေးအခြေအနေတွေတင်းမာနေလို့လေကြောင်းနဲ့ လက်နက်ကြီးအန္တရာယ်သတိပေးချက်တွေကို တော်လှန်ရေးအင်အားစုတွေက ထုတ်ပြန်ထားပါတယ်။
