မေ -၂၊၂၀၂၆။ဖိုးသား/People’s Spring
မကွေးတိုင်း၊ ရေစကြိုမြို့နယ်က စစ်တပ်စစ်ဆေးရေးဂိတ်တိုက်ခိုက်မှုအတွင်း စစ်သားနဲ့ရဲ ၇ဦး သေဆုံးပြီး လက်နက်ခဲယမ်းတွေရတယ်လို့ Southern YSO PDFက ဒီကနေ့ မေလ ၂ရက်မှာ ထုတ်ပြန်ပါတယ်။
ဧပြီ ၃၀ ရက်နေ့လယ် ၁၁ နာရီခွဲခန့်မှာ ရေစကြိုမြို့နယ်က တောင်အိုကျေးရွာမှာရှိတဲ့ စစ်တပ်စစ်ဆေးရေးဂိတ်ကို တိုက်ခိုက်ခဲ့တာဖြစ်ပြီး စစ်တပ် လက်အောက်ခံ ရဲ ခြောက်ဦးနဲ့ စစ်သားတစ်ဦး သေဆုံးခဲ့တယ်လို့ ဆိုပါတယ်။
တိုက်ခိုက်မှုအတွင်း G3 ၂လက်၊MA3 ၁လက်MA13 ၁လက်၊ခြောက်လုံးပြူး ၁လက်နဲ့ ကျည်တွေအပြင်ဖုန်း ၄လုံးနဲ့အခြား ပစ္စည်းတချို့သိမ်းရခဲ့တယ်လို့ အသိပေးပါတယ်။
Public Service Announcement
ဒါ့အပြင် တိုက်ခိုက်မှုအတွင်း အပြစ်မဲ့ ပြည်သူတစ်ဦး ကျည်ထိမှန် အသက်ဆုံးရှုံးခဲ့ရတဲ့ ဖြစ်ရပ်အတွက် လည်း သေဆုံးသူမိသားစုဝင်တွေကို အနူးအညွတ် တောင်းပန်တယ်လို့ Southern YSO PDF တာဝန်ရှိသူက ပြောပါတယ်။
ပစ်ခတ်မှုစတင်ချိန်မှာ တဖက်ကပြန်လည်ခုခံပစ်ခတ်မှုတွေဖြစ်လို့ အခြေအနေအရ ထိန်းချုပ်ရန်မဖြစ်နိုင်လို့ အပြစ်မဲ့ပြည်သူ ထိခိုက်ခဲ့ရတာလို့ ဆိုပါတယ်။
တောင်အိုကျေးရွာ စစ်တပ်ဂိတ်တိုက်ခံရပြီးနောက် ရေစကြိုမြို့အခြေစိုက် ခလရ(၂၅၈)တပ်ရင်းက အင်အား ၁၈၀ဝန်းကျင်နဲ့ ရေစကြို-ပခုက္ကူလမ်းပိုင်းကို စစ်ကြောင်းထိုးနေတယ်လို့ ဒေသခံသတင်းရင်းမြစ်က ပြောပါတယ်။
ဒါအပြင် စစ်တပ်စစ်ကြောင်းက နေအိမ် ၃၀၀ဝန်းကျင်ရှိတဲ့ တောင်အိုကျေးရွာကို ဒီကနေ့အထိ မီးရှို့နေတယ်လို့လည်း သိရပါတယ်။
မေလ ၁ ရက်က တောင်အိုရွာမီးရှို့မှုအတွင်း နေအိမ် ၃၀ ခန့်ပျက်စီးဆုံးရှုံးပြီး ဒီကနေ့(မေလ ၂ ရက်)မှာလည်း စစ်တပ်က မီးဆက်ရှို့နေတယ်လို့ ရေစကြိုတောင်ပိုင်းထောက်ပို့အဖွဲ့က ဆိုပါတယ်။
ဒါ့အပြင် ပခုက္ကူမြို့ဘက်ကနေလည်း စစ်တပ်က အင်အား ၂၀၀ဝန်းကျင်နဲ့ ပခုက္ကူ-ရေစကြိုလမ်းပိုင်းက ကျောက်လှေခါးကျေးရွာမှာ စုဖွဲ့ရောက်ရှိနေတယ်လို့ အသိပေးပါတယ်။
စစ်ရေးလှုပ်ရှားမှုတွေအရ စစ်တပ်က ပခုက္ကူ-ရေစကြိုလမ်းပိုင်းကို ထိန်းချုပ်နိုင်ဖို့ ကြိုပမ်းနေတာလို့ ဒေသခံသတင်းရင်းမြစ်က သုံးသပ်ပါတယ်။
“စစ်တပ်ရဲ့ အရေးပေါ်ကြေညာထားတဲ့ မြို့နယ် ၆၀မှာ ရေစကြိုမြို့နယ်ပါတယ်။အဲဒါကြောင့်လည်း နယ်မြေရှင်းလင်းမယ့်ပုံစံမျိုး”လို့ သူက ပြောပါတယ်။
ရေစကြိုမြို့အနောက်ဘက် (၂)မိုင်ခန့်အကွာ ဖူလုံရွာအနီးမှာ စစ်တပ်ရဲ့ အမှတ်-၂၅၆၊ ၂၅၇ နဲ့ ၂၅၈ ခြေလျင်တပ်ရင်းတွေ ရှိပါတယ်။ဒါ့အပြင် ပခုက္ကူမြို့နယ်နဲ့ ဆက်စပ်နေတာကြောင့်လည်း ပခုက္ကူမြို့ အခြေစိုက် တပ်မ(၁၀၁)က ရေစကြိုမြို့နယ်ကို မကြာခဏ စစ်ကြောင်းထိုးတာရှိပါတယ်။
ရုပ်သံ – Southern YSO PDF
