အမေရိကန် သမ္မတ ဒေါ်နယ်လ်ထရမ့်ရဲ့ တရုတ် ခရီးစဉ်အပြီး ရက်ပိုင်း အကြာမှာပဲ တရုတ် သမ္မတ ရှီကျင့်ဖျင်ဟာ ရုရှား သမ္မတ ဗလာဒီမာ ပူတင်ကိုလည်း ဧည့်ခံ တွေ့ဆုံမှာ ဖြစ်ပါတယ်။
ပူတင်ဟာ ဘေဂျင်းမြို့ကို မေလ ၁၉ နဲ့ ၂၀ တို့မှာ နှစ်ရက်ကြာ သွားရောက်ပြီး ရှီနဲ့ တွေ့ဆုံမယ်လို့ ရုရှား အစိုးရ ရုံးစိုက်တဲ့ ကရင်မလင် နန်းတော်က ပြီးခဲ့တဲ့ သီတင်းပတ်ကုန်မှာ ကြေညာခဲ့ပါတယ်။
ထရမ့်က တရုတ်နိုင်ငံနေ ပြန်လည် ထွက်ခွာသွားပြီး ၂၄ နာရီ မပြည့်ခင်မှာပဲ ပူတင်လည်း ဘေဂျင်းကို သွားရောက်မယ့်အကြောင်း ရုရှားဖက်က ထုတ်ပြန်ခဲ့တာ ဖြစ်ပါတယ်။
ပြီးခဲ့တဲ့ သီတင်းပတ်တုန်းက ခရီးစဉ် အတောအတွင်းမှာတော့ ထရမ့်ဟာ အီရန်စစ်ပွဲကိစ္စ၊ ထိုင်ဝမ်အရေး၊ နှစ်နိုင်ငံ ကုန်သွယ်ရေး ကဏ္ဍတွေအတွက် ရှီနဲ့ ဆွေးနွေးခဲ့ပါတယ်။
Public Service Announcement
ကရင်မလင် နန်းတော် ထုတ်ပြန်ချက်မှာတော့ ပူတင်ရဲ့ တရုတ် ခရီးစဉ်ဟာ ၂၀၀၁ ခုနှစ်တုန်းက ချုပ်ဆိုခဲ့တဲ့ ရုရှား-တရုတ် ချစ်ကြည်ရေး စာချုပ်ရဲ့ ၂၅ နှစ်ပြည့် နှစ်ပတ်လည်နဲ့လည်း တိုက်ဆိုင်နေကြောင်း ပါရှိခဲ့ပါတယ်။
ရှီနဲ့ ပူတင်တို့ဟာ နှစ်နိုင်ငံ ဆက်ဆံရေး၊ စီးပွားရေး ပူးပေါင်းဆောင်ရွက်မှုတွေအပြင် နိုင်ငံတကာနဲ့ ဒေသတွင်း အရေးကိစ္စတွေကို ရင်းရင်းနှီးနှီး ညှိနှိုင်း တိုင်ပင်ကြမှာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
နိုင်ငံတကာ အကဲခတ်တွေကတော့ ၂၀၂၂ ခုနှစ်၊ ယူကရိန်းကို ရုရှားက ကျူးကျော်တိုက်ခိုက်ခဲ့တဲ့နောက်ပိုင်း ရုရှားနဲ့ တရုတ်တို့ကြားက ဆက်ဆံရေးဟာ သိသိသာသာ တိုးတက်လာတယ်လို့ သုံးသပ်ထားပါတယ်။
မနှစ်က စက်တင်ဘာလတုန်းက ပူတင်ဟာ တရုတ်ကို အလည်အပတ် ခရီးစဉ် ရောက်ရှိခဲ့ပြီး ရှီက သူ့ကို မိတ်ဆွေဟောင်းကြီးလို့ ရည်ညွှန်းခဲ့သလို ပူတင်ကလည်း ရှီကို ချစ်လှစွာသော မိတ်ဆွေကြီးလို့ သုံးနှုန်းခဲ့ပါတယ်။
ပူတင်ဟာ အခုနှစ်ကုန်ပိုင်း၊ နိုဝင်ဘာလကျရင်လည်း တရုတ်နိုင်ငံ ရှန်ဇန်းမြို့မှာ ကျင်းပမယ့် အာရှ-ပစိဖိတ် စီးပွားရေး ပူးပေါင်းဆောင်ရွက်မှုအဖွဲ့ (အေပက်)ရဲ့ ထိပ်သီး ညီလာခံကို တက်ရောက်ဖို့ စီစဉ်ထားကြောင်း သိရပါတယ်။
ကိုးကား: AP
