မေ -၂၉ ၊၂၀၂၆။နော် /People’s Spring
ပဲခူးတိုင်း၊ ကျောက်တံခါးမြို့နယ်မှာ အာဏာသိမ်းစစ်တပ်က စစ်ရှောင်ပြည်သူတွေရဲ့ နေအိမ်တွေ အလုံးလိုက် စျေးဖြတ်ပြီးရောင်းချနေတယ်လို့ ဒေသခံတွေက ပြောပါတယ်။
ကျောက်တံခါးမြို့နယ်၊ အရှေ့ခြမ်းကျေးရွာဖြစ်တဲ့ သမင်အင်းကုန်း၊ သဲဖြူရွာသစ်၊ အောက်တဲစု ကျေးရွာက စစ်ရှောင်ပြည်သူရဲ့ နေအိမ်တွေကို စစ်တပ်တပ်ဖွဲ့ဝင်တွေက အလုံးလိုက် စျေးဖြတ်ရောင်းချနေတယ်လို့ ဒေသခံတစ်ဦးက ပြောပါတယ်။
” အခုစစ်တပ်က အတိုအစဝယ်တဲ့သူတွေရယ် ပျူတွေရယ်ကိုခေါ်ပြီး ရွာထဲက အိမ်တွေကိုပြပြီး ဘယ်စျေးရမလဲဆိုပြီး ရောင်းနေတာ။ ပြီးရင် ဝယ်တဲ့သူတွေက အိမ်က သစ်တွေကအစ အကုန်ခွာယူပြီး ပဲခူးဘက်သွားရောင်းကြတယ်ဘပြောတယ်။မြေကြီးတောင် ယူလို့မရလို့ မဟုတ်ရင် ယူသွားကြဦးမှာ”လို့ ဒေသခံတစ်ဦးက ပြောပါတယ်။
Public Service Announcement
မေလ ဒုတိယပတ်ကစလို့ ကျောက်တံခါးမြို့နယ် အရှေ့ခြမ်းနဲ့ စစ်တောင်းမြစ်အနောက်ဘက်ကမ်းကျေးရွာတွေကို စစ်တပ်က အင်အားထောင်ကျော်နဲ့ စစ်ကြောင်းထိုး ဝင်ရောက်လာခဲ့ပါတယ်။
အဲ့ဒီလို ဝင်ရောက်လာတာကြောင့် စစ်တပ်နဲ့ တော်လှန်ရေးတပ်တွေကြား နေ့စဥ်နီးပါး တိုက်ပွဲတွေဖြစ်ပွားနေတယ်လို့ သိရပါတယ်။
စစ်တပ် စစ်ကြောင်းထိုးနေတဲ့ စစ်တောင်းမြစ်ဝှမ်းအနီးက ကျေးရွာတွေဟာ KNU တပ်မဟာ(၃)နယ်မြေဖြစ်တဲ့ ကျောက်ကြီးမြို့နယ်ထဲမှာ ပါဝင်ပါတယ်။
စစ်တပ်က စစ်ကြောင်းထိုးနေတာအပြင် လက်နက်ကြီး၊ ဒရုန်း၊ လေယာဥ်တွေနဲ့ပါ နေ့စဥ် နေ့တိုင်း ပြည်သူလူထုကို ပစ်မှတ်ထား ပစ်ခတ်နေတယ်လို့ ကရင်အမျိုးသားအစည်းအရုံး(KNU) က ထုတ်ပြန်ထားပါတယ်။
မေလ ၂၆ ရက် နေ့လည်ပိုင်းမှာ ပိန်းဇလုတ်အခြေစိုက် ခလရ-၂၆၄ တပ်ရင်းက ၁၅၅ မမ ဟောင်ဝှစ်ဇာ လက်နက်ကြီး (၂)လုံး ပစ်ခတ်ခဲ့ရာ ကျွန်းကြီးကျေးရွာအတွင်း ကျရောက် ပေါက်ကွဲခဲ့ပြီး (၁)စောနေကော်ထူး (၅၂)နှစ်၊ (၂)စောစိန်ဝင်း (၆၁)နှစ် နဲ့ (၃)နော်အယ်လွဲ (၃၆)နှစ် တို့ ၃ ဦး ထိခိုက်ဒဏ်ရာရခဲ့တယ်လို့ KNU က ဒီနေ့ မေလ ၂၉ ရက်မှာ ထုတ်ပြန်ပါတယ်။
စစ်တပ်က စစ်ကြောင်းထိုးနေတာအပြင် လက်နက်ကြီး၊ ဒရုန်း၊ လေယာဥ်တွေနဲ့ပါ ပစ်ခတ်နေတဲ့အတွက် ကျောက်တံခါးမြို့နယ် အရှေ့ခြမ်းနဲ့ စစ်တောင်းမြစ်အနောက်ဘက်ကမ်းက သမင်အင်းကုန်း၊ သဲဖြူရွာသစ်၊ အောက်တဲစု ၊ ကညင်ကျိုး၊ ကြိတ်ကွင်းနဲ့ လေးအိမ်စုက ဒေသခံထောင်ချီဟာ ထွက်ပြေးတိမ်းရှောင်နေကြရပါတယ်။
အာဏာသိမ်းစစ်တပ်ဟာ ဆန့်ကျင်သူတွေကို မတရားပုဒ်မတပ် ဖမ်းဆီးထားသူတွေနဲ့ တိမ်းရှောင်နေသူတွေရဲ့ နေအိမ်တွေကို ချိတ်ပိတ်သိမ်းပြီးနောက် လေလံတင်ရောင်းချနေတာလည်း ပြုလုပ်နေပါတယ်။
ဒါအပြင် မတရားချိတ်ပိတ်သိမ်းထားတဲ့ နေအိမ်တွေကိုလည်း Non-CDM ဝန်ထမ်းတွေကို နေထိုင်ခွင့်ပြုနေတာလည်း ရှိပါတယ်။
