ခရမ်းမြို့နယ် ဘုရားပျိုရဲစခန်းနှင့် မြို့နယ်အားကစားရုံပစ်ခတ်ခံရမှုများတွင် စစ်ကောင်စီဘက်မှ သေဆုံးဒဏ်ရာရစာရင်းများ ထွက်ပေါ်လာကြောင်း ဒေသခံများက ပြောသည်။
အဆိုပါ ထွက်ပေါ်နေသည့်စာရင်းအရ ဘုရားပျိုရဲစခန်းပစ်ခတ်ခံရမှုတွင် စစ်ကောင်စီဘက်မှ နှစ်ဦးသေဆုံးကာ သုံးဦးဒဏ်ရာရရှိပြီး ဒဏ်ရာရသူများအနက် ဗိုလ်အဆင့်ရှိသူတစ်ဦး ဒဏ်ရာပြင်းထန်ကြောင်း သိရသည်။
ထို့အပြင် ခရမ်းမြို့ပေါ် အားကစားရုံ၌ တပ်စွဲထားသော စစ်ကောင်စီတပ်များ တိုက်ခိုက်ခံရမှုတွင် တစ်ဦးသေဆုံးပြီး ငါးဦးဒဏ်ရာရကာ ဒဏ်ရာရသူများအနက် နှစ်ဦးမှာ ဒဏ်ရာပြင်းထန်ကြောင်း ဒေသခံများအကြား သတင်းပြန့်နှံ့လျှက်ရှိသည်။
အထက်ပါ တိုက်ခိုက်မှုဖြစ်စဥ်များအတွင်း ပြည်သူ့ကာကွယ်ရေးတပ်များဘက်မှ အထိအခိုက်အကျအဆုံးမရှိခဲ့ဟု ၎င်းတို့နှင့်နီးစပ်သူများထံမှ စုံစမ်းသိရသည်။
Public Service Announcement
ယမန်နေ့(ဒီဇင်ဘာ ၁၆)ည ၇ နာရီခွဲ ဘုရားပျိုရဲစခန်းတိုက်ခိုက်ခံရမှုနှင့် ခရမ်းမြို့ အားကစားရုံပစ်ခတ်တိုက်ခိုက်မှုဖြစ်စဥ်များ ဖြစ်ပွားပြီးနောက် ဘုရားပျိုကျေးရွာနှင့် ခရမ်းမြို့ပေါ်ရပ်ကွက်များမှ ပြည်သူ ၁၀ဦးခန့် စစ်ကောင်စီတပ်များ၏ ဖမ်းဆီးခြင်းခံခဲ့ရသည်။
လက်ရှိအခြေအနေတွင် စစ်ကောင်စီတပ်များက ယနေ့(ဒီဇင်ဘာ ၁၇)နံနက်ပိုင်းမှစတင်ပြီး ခရမ်းမြို့သို့အဝင်အထွက်ဂိတ်များတွင် လုံခြုံရေးတင်းကြပ်ထားသည်။
