ဇွန်-၁၆၊၂၀၂၆။ တေဇ/People’s Spring
လူမျိုးတုံးသတ်ဖြတ်တဲ့ နိုင်ငံတကာစစ်ရာဇဝတ်မှုတွေကျူးလွန်နေတဲ့ စစ်တပ်ကို လက်နက်အပါအဝင် နိုင်ငံခြားဝင်ငွေ ရရှိအောင် လုပ်ဆောင်ပေးနေတဲ့ တရုတ်နိုင်ငံရဲ့ လုပ်ရပ်တွေကို ရှုတ်ချကြောင်း နဲ့ စစ်တပ်ကို ကူညီပေးမှုတွေကို ရပ်တန့်ဖို့ Justice For Myanmar-JFM ကတောင်းဆိုလိုက်ပါတယ်။
တရုတ်နိုင်ငံက စစ်တပ်အတွက် လက်နက်ရောင်းချပေးနေတဲ့ နိုင်ငံတွေထဲက တစ်နိုင်ငံဖြစ်ပြီး မြန်မာ့သဘာဝဓာတ်ငွေ့ကို အဓိကဝယ်ယူနေသလို ရေနံစိမ်း သယ်ယူပို့ဆောင်ပေးနေသူအနေနဲ့ စစ်တပ်အတွက် နိုင်ငံခြားဝင်ငွေတွေ ရှာဖွေပေးနေတယ်လို့ ဒီနေ့ထုတ်ပြန်တဲ့ JFM ရဲ့ ထုတ်ပြန်ချက်မှာ ဖော်ပြထားပါတယ်။
“ယင်းလုပ်ငန်းများမှ နိုင်ငံခြားဝင်ငွေ အများအပြားသည် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို အပြစ်ပေးအရေးယူခံရခြင်း ကင်းလွတ်စွာဖြင့် ကျူးလွန်နေသော စစ်အုပ်စုထံသို့ စီးဝင်လျက်ရှိသည်” လို့ JFM က ထောက်ပြထားပါတယ်။
Public Service Announcement
ဒါ့အပြင် တရုတ်သမ္မတ ရှီကျင့်ဖျင်အနေနဲ့ စစ်ခေါင်းဆောင် မင်းအောင်လှိုင်ကို တွေ့ဆုံခဲ့တာက စစ်တပ်ရဲ့ အကြမ်းဖက်မှုတွေမှာ ကြံရာပါဖြစ်တယ်ဆိုတာ ထောက်ခံသလိုဖြစ်ပြီး မြန်မာပြည်သူတွေလက်မခံတဲ့ စစ်တပ်ကို တရားဝင်မှုပေးသလို ဖြစ်နေတယ်လို့ JFM က မှတ်ချက်ပေးထားပါတယ်။
စစ်တပ်က အရပ်သားပြည်သူတွေကို သတ်ဖြတ်ဖို့၊ အဆောက်အဦးတွေကို ဖျက်ဆီးဖို့၊ ပြည်သူတွေ နေရပ်စွန်ခွာထွက်ပြေးဖို့အတွက် တရုတ်နိုင်ငံထုတ် စစ်လက်နက်တွေနဲ့ စက်ပစ္စည်းကိရိယာတွေကို အသုံးပြုနေတယ်လို့ ထုတ်ပြန်ချက်မှာ ဖော်ပြထားပါတယ်။
တရုတ်နိုင်ငံပိုင်ကော်ပိုရေးရှင်း Aviation Industry Corporation of China(AVIC)က စစ်တပ်ကိုတိုက်လေယာဉ်တွေ ရောင်းချပေးနေပြီး စစ်တပ်က အဲဒီ့ တိုက်လေယာဉ်တွေနဲ့ အရပ်သားပြည်သူတွေကို ပစ်မှတ်ထားတဲ့ အကြမ်းဖက်မှုတွေမှာ အသုံးပြုနေပါတယ်။ ဒါ့အပြင် တရုတ်ကုမ္ပဏီ Sinotruk ကလည်း စစ်တပ်ရဲ့ သယ်ယူပို့ဆောင်ရေးအတွက်အသုံးပြုနေတဲ့ မော်တော်ယာဉ်များကို ထောက်ပံ့ပေးနေတယ်လို့ ဆိုပါတယ်။
တရုတ်နိုင်ငံရဲ့ လုပ်ရပ်တွေက စစ်တပ်အတွက် စစ်လက်နက်နဲ့ စီးပွားရေးဆိုင်ရာ သဘောတူညီချက်အသစ်တွေကို ညှိနှိုင်းဆွေးနွေးဖို့ အခွင့်အလမ်း ရရှိနေပြီး တရုတ်အစိုးရ နဲ့ တရုတ်ကုမ္ပဏီတွေက မြန်မာ ပြည်သူတွေရဲ့ အသက်သွေးချွေးတွေကနေ အကျိုးအမြတ်တွေယူနေတာလို့ JFMက ထောက်ပြထားပါတယ်။
ဒါကြောင့် တရုတ်အစိုးရနဲ့ တရုတ်ကုမ္ပဏီတွေရဲ့ စစ်တပ်နဲ့ ကြံရာပါပူးပေါင်းနေတဲ့ အပေါ် JFM ကရှုတ်ချကြောင်းနဲ့ စစ်တပ်ကျူးလွန်တဲ့ လူမျိုးတုံးသတ်ဖြတ်မှု၊ စစ်ရာဇဝတ်မှုတွေနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေအတွက် အားပေးကူညီသူအားလုံး တာဝန်ခံမှုရှိဖို့ JFMက တောင်းဆိုထားပါတယ်။
