ဇူလိုင်-၂၊ ၂၀၂၆။ထားမြတ်/People’s Spring
ချင်းဒေသကာကွယ်ရေးတပ်ဖွဲ့တစ်ခုဖြစ်တဲ့ ဆဲန်ထန်ဗဟိုကောင်စီရဲ့ ကာကွယ်ရေးအတွင်းရေးမှူး ဆလိုင်းထောင်ဇာကျဲအို ကျဆုံးခဲ့မှုအပေါ် ဝမ်းနည်းကြောင်း ချင်းဒေသကာကွယ်ရေးတပ်(CDF) ၅ဖွဲ့ စုပေါင်းထားတဲ့ ညီနောင်တပ်ပေါင်းစု ZZLMSက ဇူလိုင် ၁ရက်မှာ ထုတ်ပြန်ပါတယ်။
ZZLMS ဆိုတာ CDF ဇိုတုန်၊ CDF ဇိုဖေ၊ CDF Lautu၊ CDF မရာ နဲ့ Senthang Revolution Force စတဲ့ ချင်းပြည်ကောင်စီအဖွဲ့ဝင် ချင်းဒေသကာကွယ်ရေးတပ်ဖွဲ့ ၅ဖွဲ့ စုဖွဲ့ထားတာ ဖြစ်ပြီး အခု ကျဆုံးသွားတဲ့ ဆလိုင်းထောင်ဇာကျဲအိုဟာ ZZLMS ရဲ့ စစ်ဦးစီးချုပ်အဖြစ်တာဝန်ယူထားသူဖြစ်ပါတယ်။
ZZLMS စစ်ဦးစီးချုပ်ဟာ ဆဲထန်တပ် ထိန်းချုပ်နယ်မြေမှာ ဇွန် ၂၆ရက်က ကျဆုံးခဲ့တာဖြစ်ပါတယ်။ ဆဲထန်ဗဟိုကောင်စီနဲ့ ZZLMS ရဲ့ ထုတ်ပြန်ချက်မှာ တပ်မှူး ဆလိုင်းထောင်ဇာကျဲအို ကျဆုံးရတဲ့ အကြောင်းအရင်းကို အသေးစိတ်ဖော်ပြမထားပေမဲ့ ဒေသတွင်း သတင်းတွေအရ ဆလိုင်းထောင်ဇာကျဲအိုနဲ့ ဆဲထန်ဗဟိုကောင်စီ လူမှုဖွံ့ဖြိုးရေး အတွင်းရေးမှူး ဆလိုင်းဘွေကျုံးလျန်တို့ဟာ ယာဉ်မတော်တဆမှု ဖြစ်ပြီး ကွယ်လွန်ခဲ့တာလို့ ဆိုပါတယ်။
Public Service Announcement
“ZZLMS စစ်ဦးစီးချုပ်သည် တာဝန်ထမ်းဆောင်ခဲ့သည့်ကာလတစ်လျှောက် ကိုယ်စွမ်းဉာဏ်စွမ်းအပြည့်ဖြင့် တော်လှန်ရေးနှင့်သက်ဆိုင်သည့်ကိစ္စရပ်များကို ကြိုးပမ်းဆောင်ရွက်ခဲ့သည့်အပြင်ရဲဘော်ရဲ ဘက်စိတ်အပြည့်ရှိသူဖြစ်ပြီးစစ်အာဏာရှင်စနစ်အမြစ်ပြတ်ချေမှုန်းရေးနှင့် ဖက်ဒရယ်ပြည်ထောင်စုတည်ဆောက်ရေးအတွက်အရေးပါသောပုဂ္ဂိုလ်ဖြစ်ပါသည်”လို့ ZZLMS ရဲ့ ထုတ်ပြန်ချက်မှာ ရေးသားထားပါတယ်။
ဆလိုင်းထောင်ဇာကျဲအို ကျဆုံးတာဟာ တော်လှန်ရေးအတွက် ကြီးမားတဲ့ ဆုံးရှုံးမှု ဖြစ်ကြောင်း သက်ဆိုင်ရာ မိခင်အဖွဲ့အစည်း၊ ကျန်ရစ်သူမိသားစုဝင်များနဲ့ ထပ်တူ ဝမ်းနည်းကြောင်း ZZLMSက ထုတ်ပြန်ပါတယ်။
ဆလိုင်းထောင်ဇာကျဲအို ကျဆုံးမှုနဲ့ပတ်သက်ပြီး ဆဲထန်ဗဟိုကောင်စီကလည်း အထူးဝမ်းနည်းကြောင်းဖော်ပြကာ ထိန်းချုပ်နယ်မြေအတွင်းက ဌာနတွေက ချင်းပြည်အလံတွေ တိုင်ဝက်လွှင့်ထူခြင်းနဲ့ ဝမ်းနည်းခြင်းအထိမ်းအမှတ် ဖော်ပြဖို့ ထုတ်ပြန်ထားပါတယ်။
