ဇူလိုင် ၂၂၊ ၂၀၂၆။ ဟာနာဆန်/People’s Spring
မကွေးတိုင်း၊ မြိုင်နဲ့ ပေါက်မြို့နယ်မှာ ၁လအတွင်း စစ်တပ်စစ်ကြောင်းက ပြည်သူ ၂၄ ဦးထက်မနည်း ညှင်းပန်းနှိပ်စက် သတ်ဖြတ်သွားကြောင်း အညာမြေ အရပ်ဘက်လူမှုအဖွဲ့အစည်း-မြိုင်က ထုတ်ပြန်ပါတယ်။
ဇွန်လကတည်းက မြိုင်နဲ့ ပေါက်မြို့နယ်အတွင်း ရောက်ရှိနေတဲ့ စစ်တပ်စစ်ကြောင်းဟာ ကျေးရွာတွေကို စစ်ကြောင်းထိုးပြီး ပြည်သူတွေ ဖမ်းဆီးသတ်ဖြတ်ခဲ့တာပါ။ အဲဒီလို သတ်ဖြတ်ရာမှာ ဇွန်လ ၂၃ ရက်က မြိုင်မြို့နယ် သာစည်၊ နှမ်းဆီကန်၊ မိတ္ထီလာ၊ ဝက်ပုတ်၊ ကုန်းရွာတွေက ပြည်သူ ၆ ဦး၊ ဇူလိုင် ၂ ရက်က ပေါက်မြို့နယ်၊ ထောက်ရှာပင်ရွာက ပြည်သူ ၅ ဦး၊ ဇူလိုင် ၁၃ ရက်က မြိုင်မြို့နယ် ကန်နက်၊ မြင်းကိုးသစ်၊ ကိုင်းတောမ၊ ဝါးရင်းချိုင်ရွာတွေက ပြည်သူ ၅ ဦး၊ ဇူလိုင် ၁၈ ရက်က ကွန်လပ်ကျေးရွာက ပြည်သူ ၂ ဦး၊ ဘောတုံကျေးရွာက ပြည်သူ ၅ ဦး၊ သံချောင်းကျေးရွာက ပြည်သူ ၁ ဦး စုစုပေါင်း ပြည်သူ ၂၄ ဦး သတ်ဖြတ်ခံခဲ့ရကြောင်း အညာမြေ အရပ်ဘက်လူမှုအဖွဲ့အစည်း-မြိုင်က အသိပေးပါတယ်။
သတ်ဖြတ်ခံရသူတွေမှာ စိတ်ကျန်းမာရေး မပြည့်စုံသူတွေနဲ့ သက်ကြီးရွယ်အိုတွေလည်း ပါဝင်ပြီး ရုပ်အလောင်းတွေကို မီးရှို့ဖျောက်ဖျက်တာတွေ ပြုလုပ်ထားကြောင်း တွေ့ရှိရတယ်လို့ အညာမြေ အရပ်ဘက်လူမှုအဖွဲ့အစည်း-မြိုင်က ထပ်မံ အသိပေးပါတယ်။
Public Service Announcement
“သတ်ဖြတ်ခံရသူဦးရေဟာ ယခုထက်များနိုင်ပါတယ်။စစ်ကြောင်းဝင်ပြီးဆက်သွယ်လို့မရဘဲအဆက်အသွယ်ပြတ်တောက်နေတဲ့ ပြည်သူအချို့လည်းရှိနေပါသေးတယ်”လို့ အညာမြေ အရပ်ဘက်လူမှုအဖွဲ့အစည်း-မြိုင်ရဲ့ တာဝန်ရှိသူက ပြောပါတယ်။
လက်ရှိ စစ်ကြောင်းဟာ မြိုင်မြို့နယ် အနောက်ပိုင်း သင်းမကျေးရွာမှာ ရောက်ရှိနေကြောင်း သိရပါတယ်။
ဒီကနေ့မနက်ပိုင်းမှာလည်း စစ်ကြောင်းရောက်ရှိနေရာ သင်းမရွာအနီးကို တံတားဦးလေတပ်မှ Y 12 စစ်ထောက်ပို့ ဗုံးကြဲလေယာဉ်တစ်စီးနဲ့ လေကြောင်းတိုက်ခိုက်မှု (၈) ကြိမ်ခန့် ပြုလုပ်ခဲ့ကြောင်း We Love Myaing အဖွဲ့က ပြောပါတယ်။
စစ်တပ်ကစစ်ကြောင်း ဆက်ထိုးနေဆဲ ဖြစ်တာကြောင့် လမ်းပိုင်းတွေက ပြည်သူတွေ စစ်ကြောင်းနဲ့ မတွေ့အောင် အထူးသတိထားရှောင်နေကြဖို့ အညာမြေ အရပ်ဖက်လူမှုအဖွဲ့အစည်း-မြိုင်က အသိပေးနှိုးဆော်ထားပါတယ်။
