ပြာပုံကြားအကြိမ်ကြိမ်ပြန်​​မွေးဖွားခဲ့တဲ့ ဖီးနစ်ငှက် GZP

-နှင်း/People’s Spring

စစ်တပ်အာဏာသိမ်းတာကို လက်နက်မဲ့ ငြိမ်းချမ်းစွာဆန္ဒပြသူတွေကို စစ်တပ်ကတိုက်ပွဲသုံးလက်နက်​တွေနဲ့ အကြမ်းဖက်သတ်ဖြတ်မှု တွေအပြီး မန္တလေးမြို့မှာ ၂၀၂၁ ခုနှစ်က စစ်တပ်ကို ထိတ်လန့် အောင်ပြုလုပ်နိုင်ခဲ့သူတွေ​ပေါ်လာခဲ့ပါတယ်။

စစ်တပ်လက်​အောက်ခံဝန်ထမ်းတွေ ယူနီ ဖောင်းမဝတ်ရဲတော့လို့ ၂၀၂၁ ခုနှစ်ကနေ ၂၀၂၃ခုနှစ်အထိ ယူနီဖောင်းမဝတ်ရတဲ့ရုံး တွေရှိခဲ့သလိုယူနီဖောင်းကိုအိတ်ထဲထည့်ပြီး ရုံးရောက်မှ ဝတ်ကြရတဲ့ အ​ခြေအ​နေ​တွေလည်းရှိခဲ့ပါတယ်။

“ဘယ်သူမှနောက်ကျောမလုံဘူးလေအဲဒီတုန်းက။လုပ်သွားရင်တချက်ပဲ။ဘာမှတောင်သိလိုက်မှာ မဟုတ်ဘူး”လို့ စစ်ကောင်စီ ဝန်ထမ်းတဦးက ပြောပါတယ်။

အဲဒီလိုစစ်တပ်လက်​အောက်ခံ လက်နက်ကိုင်သူ​တွေ​​ရော ၊လက်နက်မကိုင်သူ​တွေ​ရော ကျောမလုံပဲ ထိတ်လန့်​​အောင် ပြန်ခြိမ်း​ခြောက်နိုင်သူ​တွေက မြို့ပြပျောက်ကြားတပ်ဖွဲ့ဝင်တွေပါ။

စစ်တပ်ထိန်းချုပ်ထားပြီး လုံခြုံရေးကင်မရာ များစွာတပ်ဆင်စောင့်ကြည့်နေတဲ့ မြို့မှာ စစ်တပ်ကို တိုက်ခိုက်ဖို့ဟာ အလွန်စွန့်စားရတဲ့လုပ်ရပ်ပါ။ဒီလုပ်ရပ်ကို မန္တလေး မြို့ခံလူငယ် တွေနဲ့ ဖွဲ့စည်းခဲ့တဲ့GZP( Generation Z Power)အဖွဲ့က ရဲရဲဝံ့ဝံ့လုပ်ခဲ့ကြတာပါ။

“ကျောက်ဆောင်ကို ခေါင်းနဲ့တိုက်တယ်ဆိုတဲ့လူငယ်တွေပေါ့။ဒီလူငယ်တွေ သနားဖို့လည်း ကောင်းသလို တကယ်လည်းလုပ်ရဲခဲ့ကြတယ်”လို့ GZPရဲဘော်တချို့နဲ့ ရင်းနှီးခဲ့ဖူးသူ မန္တလေးမြို့ခံတဦးကပြောပါတယ်။

၂၀၂၁ခုနှစ်စစ်အာဏာသိမ်းပြီးတဲ့နောက်နှစ်လခန့်ကြာ မတ်လ၂၇ရက် နေ့မှာပဲ GZPအဖွဲ့ကို အဖွဲ့ဝင်၈ဦးနဲ့ပဲ စတင်ခဲ့တာပါ။ စစ်တပ်က ငြိမ်းချမ်းစွာဆန္ဒပြတဲ့ပြည်သူ​တွေကို ပစ်ခတ်သတ်ဖြတ်ခဲ့တာ​ကြောင့် အသက် ၁၆ နှစ်အရွယ် ​ဝေယံထွန်း ၊ သပိတ်အဖွဲ့ကကြယ်စင်အပါအဝင် ပြည်သူများစွာကျဆုံးခဲ့ပြီး​နောက်မှာ စစ်တပ်ကိုလက်နက်ကိုင်ခုခံ​ဖို့​ပေါ်​ပေါက်လာတာပါ။

“အရင်က ဆန္ဒပြပွဲ တွေမှာ ကျွန် တော်တို့က Defense ပေါ့။အဲဒီနောက် လက်နက်ကိုင်မှရမယ်ဆိုပြီး မြို့ထဲမှာတင်မိုင်းထုတ်တာ လေ့လာပြီးစခဲ့တာ”လို့ တပ်ဖွဲ့ကိုဦးဆောင်နေတဲ့ ရဲဘော်မဟူရာက ပြောပါတယ်။

အဲဒီကနေတဆင့် တိုင်းရင်းသားလက်နက်ကိုင်အဖွဲ့နယ်မြေတွေမှာ အဖွဲ့ဝင်​တွေဟာစစ်ပညာသွားရောက်သင်ယူခဲ့ကြပါတယ်။ အဲဒီ​နောက် အဖွဲ့ ဝင်၃၀ လောက်နဲ့ မန္တ​လေး မြို့တွင်း ​စစ်တပ်ရဲ့စစ်​ရေးပစ်မှတ်​တွေကို ​​ပြောက်ကျားတိုက်ခိုက်မှုတွေ တိုးပြီးလုပ်ခဲ့ကြပါတယ်။

နယ်ပြောင်းကြလာတဲ့ စစ်တပ်အရာရှိပိုင်းတွေကိုသုတ်သင်ရှင်းလင်းတာ ၊စစ်တပ်ခန့် အုပ်ချုပ်ရေးမှူးရုံး ရှေ့က ရဲကင်း တွေကိုဝင်ပစ်တာ ၊ စစ်တပ်သတင်း​ပေးတွေကိုသတိ​ပေးလို့မရရင် ရှင်းလင်းတာ စတဲ့စစ်ဆင်​ရေးတွေပြုလုပ်ခဲ့ပါတယ်။

“ပထမဆုံး သတိပေးစာပို့တယ်။မလိုက်နာမှ ကျွန်တော်တို့က အရေးယူတာမျိုးလုပ်ခဲ့တာပါ”လို့ ရဲဘော်မဟူရာက ပြောပါတယ်။

၂၀၂၁ခုနှစ် ၊နိုဝင်ဘာလမှာ ပြည်ကြီးတံခွန်မြို့နယ်အတွင်းက MPTရုံးကို လက်ပစ်ဗုံးနဲ့ပစ်ခတ်ခဲ့တာမို့ စစ်သားတွေ ဒဏ်ရာရခဲ့ပါတယ်။

၂၀၂၁ ခုနှစ်က​နေ ၂၀၂၃ ခုနှစ်အတွင်း တစ်လမှာ စစ်ဆင်​ရေး အကြမ်းဖျင်း ငါးခုအနည်းဆုံးလုပ်ခဲ့တယ်လို့သိရပါတယ်။

၂၀၂၂ ခုနှစ်အတွင်းမှာ​တော့ မြို့ထဲ ကင်းပတ် နေတဲ့ စစ်ကားတွေကို လက်ပစ်ဗုံးနဲ့ မကြာခဏပစ်ခတ်တိုက်ခိုက်တာတွေကြောင့် စစ်ကားတွေဟာ မြို့တွင်းမီးပွိုင့်တွေမှာ မရပ်ရဲ​တော့ပဲ ၊စစ်ကား​တွေမသုံး​တော့ပဲအိမ်စီးကား တွေ​ပြောင်းအသုံးပြုခဲ့ကြပါတယ်။

​GZP တပ်ဖွဲ့ဝင်​တွေကစစ်သားတွေ၊ရဲ​တွေအများအပြားရှိတဲ့ ရန်ကုန်- မန္တ လေးလမ်း ပေါ်က ငါးလုပ်ငန်းဦးစီးဌာန ရှေ့မှာလည်း စစ်ကားကို ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ဗုံးခွဲခဲ့ပါတယ်။

ဒီလိုမြို့တွင်း ​စစ်အာဏာရှင်ရဲ့ ယန္တရား​တွေကိုတိုက်ခိုက်ရင်း GZP ကရဲဘော်တွေရဲ့အသက် တွေလည်းပေးဆပ်ခဲ့ရတာ​တွေရှိခဲ့ပါတယ်။

၂၀၂၁ခုနှစ်ဇူလိုင်လ၂၈ ရက်နေ့မှာ မန္တလေးမြို့မဟာမုနိဘုရားကြီးရှေ့မှာ မြို့ပြပျောက်ကြားသပိတ်အဖွဲ့ကအာဏာရှင်ဆန့်ကျင်ရေး ဆန္ဒထုတ်ဖော်ခဲ့ကြပါတယ်။ ဒီသပိတ်အသိမ်းမှာ အသက်၂၅နှစ်အရွယ် မသူသူဇင်ကို စစ်တပ်လက်ပါးစေတဦးက ပစ်သတ်လိုက်ပါတယ်။

အလောင်းကိုပါ စစ်အုပ်စုက ဆွဲယူသွား တာမို့မိဘတွေဟာ အလောင်းကို​တောင်ပြန်မရခဲ့ပါဘူး။ဒါ့အပြင် နောက်ထပ်လူငယ်၂ဦးလည်း ဒဏ်ရာရခဲ့သလို သပိတ်အဖွဲ့မှာ လူငယ်၄ဦးပါ ဖမ်းဆီးခံခဲ့ရပါတယ်။

ဒီဖြစ်ရပ်အ​ပေါ် သွေးကြွေးဆပ်ဖို့အတွက် GZPအဖွဲ့ကဆုံးဖြတ်ခဲ့ပါတယ်။မသူသူဇင်‌ ကို ပစ်သတ်ပြီးတဲ့နောက် သတ်ဖြတ်သူဟာ ကိုယ်ယောင်ဖျောက်နေထိုင်ခဲ့ပါတယ်။အဲဒီလူကိုစုံစမ်းဖို့အတွက်၂၀၂၁ခုနှစ်၊ဒီဇင်ဘာ၁၂ ရက်နေ့မှာစု​ဝေးတိုင်ပင်ပြီး နေထိုင်ရာ တွေဆီကိုအသီးသီးပြန်ခဲ့ကြပါတယ်။

အဲဒီမှာရဲဘော်တယောက်က ​ဆွေး​နွေးတိုင်ပင်ထားတာတဲ့အချက်အလက်တချို့ကို ဖုန်း Note (မှတ်စု)ထဲမှာရေးထားမိပါတယ်။သူအိမ်အပြန် လမ်းမှာ စစ်သား​တွေက တားဆီးပြီးဖုန်းစစ်ချိန် မှတ်စုကို တွေ့ပါ​တော့တယ်။ဒီရဲဘော်ကို ဖမ်းဆီးပြီးတဲ့ နောက် စစ်တပ်က တခြားရဲ ဘော်တွေ နေထိုင်ရာ အိမ်တွေ လိုက်ပြခိုင်းကာ ဖမ်းဆီးပါတော့တယ်။

အဲဒီည ၉နာရီခွဲမှာ မနော်ရမံဥယာဉ်အရှေ့နားကGZP အဖွဲ့ခိုလှုံတဲ့နေအိမ်ဆီ စစ်တပ် ရောက်လာပြီး အပြန်အလှန်ပစ်ခတ်ကာ နေအိမ်မှာရှိနေတဲ့ တပ်ဖွဲ့ဝင် ၈ဦး ကျဆုံးခဲ့ပါတယ်။မြို့တွင်း ပျောက်ကြားလှုပ်ရှားတဲ့အဖွဲ့မို့ ကျည်အင်အားနည်းသလို ၊ကျည်အကုန်ပြန်လည်ခုခံပြီး​တော့မှ ရဲဘော်၈ဦးကျဆုံးခဲ့တာပါ။မန္တ​လေးမြို့မှာ စစ်တပ်အာဏာသိမ်းပြီးအ​​စောဆုံး မြို့တွင်းတိုက်ပွဲလို့ ဆိုနိုင်တဲ့ပစ်ခတ်မှုမှာ စစ်အုပ်စုဘက်မှာလည်းသေဆုံးဒဏ်ရာရသူ​တွေရှိခဲ့ပါတယ်။

အဲဒီနောက် တနှစ်နီးပါးအကြာ ၂၀၂၂ခုနှစ် အောက်တိုဘာလ၁၀ရက်‌​နေ့မှာ ကျန်တဲ့ရဲ ဘော်တွေက မသူသူဇင်ရဲ့ သွေးကြွေးနဲ့ ကျဆုံးရဲဘော်တွေရဲ့ မပြီးပြတ်သေးတဲ့တာဝန်ကို ဆပ်နိုင်ခဲ့ပါတယ်။အဲဒီ‌နေ့မနက် ၉နာရီဝန်းကျင်မှာစစ်တပ်က လက်နက်ထုတ် ပေးထားတဲ့ စစ်တပ်သတင်း​ပေး၊ပျူ​စောထီး ဦးအောင်ဆန်းကို ရှင်းလင်းနိုင်ခဲ့တယ်လို့အဖွဲ့​​ခေါင်း​​ဆောင်က​ပြောပါတယ်။

အဲဒီနောက်စစ်တပ်ကလုံခြုံရေးကင်မရာ တွေတပ်ဆင်ပြီး စောင့်ကြည့် နေတဲ့ကြားက ဆက်တိုက်မြို့ပြ​ပြောက်ကျားစစ်ဆင်​ရေး​တွေလုပ်ခဲ့ပါတယ်။

ဒါ​ပေမယ့်၂၀၂၂ခုနှစ် ၊မေလ၁၃ ရက်နေ့မှ စစ်ကိုင်းမြို့နယ် ၊ပန်းချီကျေးရွာမှာသူတို့ရဲ့စခန်းစီးနင်းခံရပြီး ရဲဘော်၈ဦး ထပ်မံကျဆုံး ခဲ့ပါတယ်။၂၀၂၂ ခုနှစ်၊နိုဝင်ဘာလမှာလည်း စစ်ဆင်​ရေးတခုလုပ်ဖို့ ရဲ​ဘော်အချို့ကင်းထောက်ပါတယ် ။ကင်း​ထောက်ပြီးအပြန် ရဲပတ်ကင်းနဲ့ တွေ့ပြီး ရဲတွေကရဲဘော်တွေကို မှတ်မိသွားတာ​ကြောင့် လိုက်လံပစ်ခတ်လို့မန္တလေး- ပုသိမ်ကြီးလမ်း၊အဆုတ် ဆေးရုံအနီးမှာ ရဲဘော်၄ဦး ထပ်မံကျဆုံးခဲ့ပါတယ်။

ဒါ့အပြင်မြို့တွင်းစစ်ဆင်​ရေးတခုမှာ မိုင်းမတော်ဆမှု ကြောင့် ရဲဘော်တချို့ ကျဆုံးခဲ့ရတာမလည်းရှိခဲ့ပါတယ် ။ဒါ​ကြောင့် မြို့ပြစစ်ဆင်​ရေး​တွေမှာ ရဲဘော်စုစု​ပေါင်း ၂၂ဦး အထိကျဆုံးခဲ့ရတယ်လို့ ရဲဘော်မဟူရာက ပြောပါတယ်။

၂၀၂၃ ခုနှစ်မှာတော့ မန္တ​လေးမြို့တွင်းကို စစ်တပ်ကလုံခြုံရေးတွေတိုးမြှင့်ခဲ့တာ​ကြောင့်မြို့ပြပျောက်ကြားရဲဘော်တွေ အတွက် အန္တရာယ်ပိုများလာပါတယ်။ ဒါ​ကြောင့် GZP အဖွဲ့က စစ်ဆင်​ရေးထုတ်ပြန်ချက်​တွေမထုတ်ဘဲမြို့တွင်းလှုပ်ရှားမှု တွေဆက်လုပ်ခဲ့ပါတယ် ။ ၂၀၂၃ နှစ်ကုန်ပိုင်းမှာ​တော့ မြို့ပြကိုစွန့်ခွာခဲ့ရတယ်လို့ဆိုပါတယ်။ဒါပေမယ့် GZPရဲ​ဘော် မန္တလေးသားတွေဟာမြို့အနီးမှာပဲ ပြည်သူ​တွေနဲ့ အတူရှိနေခဲ့ကြပါတယ်။မြေပြင်တိုက်ပွဲတချို့မှာ တခြားတပ်ဖွဲ့ တွေနဲ့အတူဆက်လက်တိုက်ပွဲဝင်ခဲ့ပါတယ်။

၁၀၂၇စစ်ဆင်​ရေး သပိတ်ကျင်းမြို့နယ်တိုက်ပွဲတချို့ နဲ့ မတ္တရာမြို့နယ် အ​နောက်ခြမ်းတိုက်ပွဲ​တွေမှာ မတ္တရာပကဖ နဲ့ပေါင်းပြီးအာဏာသိမ်းစစ်တပ်ကို ဆက်တိုက် တိုက်ခိုက်ခဲ့ပါတယ်။

“သပိတ်ကျင်းမှာကျွန် တော်တို့ရဲဘော် ၁ဦးကျတယ်။စုစုပေါင်းရင် ရဲဘော်၃၃ဦးကျခဲ့ပါတယ်။ ၃၃ ဦးလုံးကိုအားလုံးအမှတ်ရပါတယ်။ကျွန်တော်တို့အများကြီး သူတို့အတွက်ကြိုးစားရမယ်။သူတို့အတွက်လုပ်ပေး ရမယ်ဆိုတဲ့စိတ်နဲ့ ကျန်ရှိရဲဘော် အားလုံးကအမှတ်ရ နေပါတယ်။”လို့ ရဲဘော် မဟူရာကပြောပါတယ်။

အဖွဲ့သက်တမ်းတ​လျှောက် ကျရှုံးမှူ​တွေရှိခဲ့​ပေမယ့် ဖီးနပ်ငှက်​တွေလို ပြာပုံထဲကအကြိမ်ကြိမ်ပြန်​မွေးဖွားလာနိုင်ခဲ့ကြပါတယ် ။အခုလည်းသူတို့အဖွဲ့ဟာမန္တလေးတိုင်းမှာတ​ကျော့ပြန် တိုက်ပွဲတွေ ပြန်ဖော်ရင်းထွက်လာပါပြီ။

ဇွန်လ၂၇ရက်နေ့၊မနက်၄နာရီမှာစစ်တပ်ပြန်ထိန်းချုပ်ထားတဲ့ စဉ့်ကူးမြို့နယ်၊သဲအင်းရွာနဲ့ မတ္တရာမြို့နယ်၊ရှင်လှရွာကအထိုင်စခန်းတွေကို တော်လှန်ရေးပူး ပေါင်းတပ် တွေ တပြိုင်တည်း တိုက်ခိုက်ပြီးစစ်ဆင်ရေးပြုလုပ်ခဲ့ကြတာပါ။

ဒီ‌‌စစ်ဆင်ရေးမှာ ပါဝင်တဲ့အဖွဲ့ တွေဟာ အရင်ကတည်းက မန္တလေးမြို့ပေါ်မှာ ပျောက်ကြားလှုပ်ရှားပြီး စစ်တပ်ကအထိနာ​အောင်တိုက်ခိုက်ခဲ့တဲ့ အဖွဲ့တွေဖြစ်တာတွေ့ရပါတယ်။အခုဆိုရင်မြို့ပြပျောက်ကြားအဖွဲ့ ‌‌တွေဟာ အမျိုးသားညီညွတ်ရေးအစိုးရ (NUG)အောက်မှာ ကွပ်ကဲမှုခံယူပြီးတပ်ဖွဲ့ တာဝန် တွေဆက်လက် ထမ်းဆောင် နေကြပါတယ်။

စစ်အုပ်စုလက်‌​အောက်မှာရှိ‌​နေတဲ့မန္တလေးမြို့ခံတွေကို ရဲဘော် မဟူရာက “ပြည်သူ တွေလည်းပင်ပန်းလှပါပြီ။ကိုယ့်ရပ်တည်ရေးကိုလုပ်ကြပါ။ဒါပေမယ့် စစ်အုပ်စုနဲ့ ပတ်သက်ဆက်နွှယ်တာမျိုးမလုပ်ကြဖို့ ကျွန် တော်တို့ မေတ္တာရပ်ခံပါတယ် “လို့သတင်းစကားပါးပါတယ်။

၂၀၂၁ ခုနှစ် မတ်လကစပြီး အာဏာသိမ်းစစ်တပ်ကို အကြိမ်ကြိမ်တိုက်ခိုက်ခဲ့တဲ့ GZP အဖွဲ့ဟာ မဟာမိတ် တွေနဲ့ပေါင်းပြီး စစ်တပ်ပြန်ထိန်းချုပ်ထားတဲ့ မတ္တရာမြို့နယ်အထိုင်စခန်းကိုဝင်တိုက်ပြီး တကျော့ပြန်တိုက်ခိုက်ရင်း ​တော်လှန်​ရေးခရီးကို ခွန်အားဖြည့်ပြီးဆက်နှင်လာပြီဖြစ်ပါတယ်။

“ယုံကြည်ချက်နဲ့သွားတဲ့အတွက်ပန်းတိုင်မရောက်မချင်းဆက်သွားနေအုံးမှာပါပဲ။” လို့ ရဲဘော်မဟူရာက ပြောလိုက်ပါတယ်။