ဇူလိုင်-၂၃၊၂၀၂၆။ရွှေပြည်စိုး/People’s Spring
မိုးတွင်းကာလ ရေဘေးဆက်တိုက်ရင်ဆိုင်နေရတဲ့ ဖားကန့်မှာ ဇူလိုင်လ ၁၉ရက်ကစတဲ့ ရေ ဘေးကြောင့် လမ်းနဲ့အိမ် ပျက်စီးမှုတွေများပြားခဲ့ပြီး ဒေသခံတွေအခက်အခဲကြုံတွေ့နေပါတယ်။
လုံးခင်းကျေးရွာအုပ်စု နဲ့ ဖားကန့်မြို့ကိုဆက်သွယ်ထားတဲ့လမ်းပိုင်းအချို့အပါအဝင် နေရာအများစုမှာ တောင်ကျရေကြောင့်ပျက်စီးမှုတွေများပြားခဲ့တယ်လို့ ဒေသခံတွေကပြောပါတယ်။ နေအိမ်ဆယ်လုံးထက်မနည်းလည်း ကျောက်ခဲတွေနဲ့နုံးမြေတွေပိသွားပြီး ပျက်စီးသွားခဲ့တယ်လို့သိရပါတယ်။
ပျက်စီးသွားတဲ့လမ်းတွေကို ကျောက်စိမ်းတူးဖော်ရေးကုမ္ပဏီတွေနဲ့ ဒေသခံလူမှုကူညီအဖွဲ့တွေက စက်ယန္တရားတွေသုံးပြီးပြင်ဆင်ပေမယ့် သွားရေးလာရေးခက်ခဲနေဆဲပဲလို့ဒေသခံတွေကပြောပါတယ်။
Public Service Announcement
ဖားကန့်မှာ မေလနဲ့ ဇွန်လကလည်းရေဘေးကြုံတွေ့ခဲ့ပါတယ်။ ဇူလိုင်လဆန်းမှာ မိုးနည်းပြီးရေ ဘေးမကြုံခဲ့ပေမယ့် ဇူလိုင်လလယ်မှာ မိုးပြန်ကောင်းလာပါတယ်။
ဇူလိုင်လ၁၉ရက်မနက်မှာတော့တကျော့ပြန် ရေဘေးရင်ဆိုင်ရတာပါ။ ဇူလိုင်၁၉ရက်နေ့က မြေပြိုလို့ အိမ်တွေနဲ့ လမ်းတွေ ပျက်စီးခဲ့ပါတယ်။ လသားအရွယ်ကလေးတစ်ဦးလည်း နေအိမ်ပေါ်ကနေ ရေထဲကို ပြုတ်ကျပြီး သေဆုံးခဲ့ပါတယ်။ အဲဒီကလေးရဲ့ရုပ်အလောင်းဟာဥရုချောင်းအတိုင်းမျောပါသွားပြီး တခြားရပ်ကွက်က နေအိမ်တွေကြားမှာ တင်ကျန်ခဲ့တာပါ။
ဖားကန့်ရေဘေးနဲ့ မြေပြိုတဲ့ဘေးမှာ လူထိခိုက်သေဆုံးမှုတွေ မကြာခဏ ရှိနေပါတယ်။
ဇွန်လ ၁၆ ရက်နဲ့ ဇွန်လ၂၁ရက်မှာ တောင်ကျ ရေနဲ့ မြေပြိုလို့ လူနှစ်ဦးသေဆုံးခဲ့ပါတယ်။
ဇွန်လ ၂၇ရက်နေ့ညက နမ့်မှော်ရွာမှာ မိုးကြီးပြီး ကမ်းပါးပြိုမှုနဲ့ နွံကန်ပြိုကျမှုတွေဖြစ်ခဲ့ပါတယ်။ကမ်းပါးပြိုလို့ လူဆယ်ဦးထက်မနည်းပျောက်ဆုံးခဲ့ပြီး ၇ဦးရဲ့ရုပ်အလောင်းကိုပဲပြန်လည်ရှာတွေ့ခဲ့ပါတယ်။ဇူလိုင်လ ၃ရက်နေ့ကလည်း နမ့်မှော်ရွာမှာ မြေစာပုံထပ်ပြိုလို့ ၇ဦး ထပ်မံသေဆုံးခဲ့ပါတယ်။ အလားတူဇူလိုင်လ၁၈ရက်နေ့ကလည်းမြေစာပုံထပ်ပြိုလို့ ထိခိုက်သေဆုံးမှုတွေရှိခဲ့ပါတယ်။
ဖားကန့်ဟာ ကမ္ဘာကျော်ကျောက်စိမ်းထွက်ရှိရာဒေသဖြစ်ပါတယ်။ ကျောက်စိမ်းကရတဲ့အကျိုးအမြတ်တွေကို ဒေသခံတွေ ခံစားခွင့်မရသလို ဒေသဖွံ့ဖြိုးရေးအတွက်လည်း မသုံးတဲ့အတွက် လမ်းပန်းဆက်သွယ်ရေးခက်ခဲတဲ့ဒေသ အဖြစ်ရှိနေပါသေးတယ်။ နှစ်စဉ် မိုးရာသီရောက်တိုင်းလည်း ဆိုးရွားတဲ့ရေဘေးကိုဒေသခံတွေမကြာခဏရင်ဆိုင်နေရပါတယ်။ ကျောက်စိမ်းတူးဖို့အရေးလုပ်ကွက်တွေအတွင်း မြေစာပုံနဲ့ကမ်းပါးတွေပြိုကျလို့လည်း နှစ်စဉ်လူရာရှိသေဆုံး နေပါတယ်။
