လူနှစ်ဦး သေဆုံးခဲ့တဲ့ ပျက်ကျမှုတစ်ခုအပြီး အမေရိကန် ကြည်းတပ်ဟာ AH64 Apache တိုက်ခိုက်ရေး ရဟတ်ယာဉ်တွေ အားလုံးရဲ့ လေ့ကျင့် ပျံသန်းမှုတွေကို ဆိုင်းငံ့ထားဖို့ အမိန့်ပေးခဲ့ပါတယ်။
ဩဂုတ် ၁၂ ရက်နေ့တုန်းက တက္ကဆက်စ်ပြည်နယ်၊ ဖို့တ်ဟွတ်ဒ်နားမှာ Apache တစ်စီး ပျက်ကျခဲ့တာ ဖြစ်ပါတယ်။ ဩဂုတ် ၁၄ ရက်နေ့မှာတော့ ကြည်းတပ်က Apache အားလုံးရဲ့ ပျံသန်းမှုတွေကို ယာယီ ဆိုင်းငံ့ထားစေမယ်လို့ ကြေညာခဲ့ပါတယ်။
ရဟတ်ယာဉ် ပျက်ကျရတဲ့ အကြောင်းရင်းကို ခြေခြေမြစ်မြစ် နားလည်အောင် စစ်ဆေးပြီးတဲ့ထိ ကျန်တဲ့ Apacheတွေကို မြေပြင်မှာပဲ ထားရှိစေမယ်လို့ ကြည်းတပ်က ဆိုပါတယ်။
အလာဘားမားမှာရှိတဲ့ ဖို့တ်ရက်ကာက ကြည်းတပ် စစ်ရေး အသင့်ပြင်ဆင်မှု ကွပ်ကဲရေးဌာနရဲ့ စစ်ဆေးရေး အရာရှိတွေဟာ ရဟတ်ယာဉ် ပျက်ကျတဲ့ နေရာကို ရောက်ရှိပြီး စုံစမ်းမှုတွေ စတင်နေပြီ ဖြစ်ပါတယ်။
Public Service Announcement
Apache ရဟတ်ယာဉ်တွေဟာ နှစ်ယောက်စီး အမျိုးအစားဖြစ်ပြီး လေယာဉ်မှူးက အနောက်မှာ၊ လက်နက်စနစ်တွေကို အဓိက ကိုင်တွယ်သူ တွဲဖက်လေယာဉ်မှူးက အရှေ့ဖက်မှာ အတန်းလိုက် နေရာယူကြပါတယ်။
တက္ကဆက်စ်မှာ ဖြစ်ပွားခဲ့တဲ့ ရဟတ်ယာဉ် ပျက်ကျမှုမှာ အသက် ၃၄ နှစ်အရွယ် ဒီယွန်ထရီဟွေးနဲ့ အသက် ၂၅ နှစ်အရွယ် ဆက်သ် အွမ်းလ်မ်စတက်ဒ်တို့ သေဆုံးခဲ့ကြောင်း အမေရိကန် ကြည်းတပ်က ထုတ်ပြန်ထားပါတယ်။
Apacheတွေဟာ ကမ္ဘာပေါ်မှာ စွမ်းဆောင်ရည် အမြင့်ဆုံး တိုက်ခိုက်ရေး ရဟတ်ယာဉ် အမျိုးအစား တစ်ခုလို့ သတ်မှတ်ခံထားရပါတယ်။ ရဟတ်ယာဉ် တစ်စီးဟာ Hellfire မြေပြင်ပစ် ဒုံးကျည် ၁၆ စင်း၊ ဝေဟင်ပစ်ဒုံးကျည် ၇၆ စင်း၊ ၃၀ မမ စက်သေနတ်နဲ့ ကျည်ဆန် ၁၂၀၀ သယ်ဆောင်ပြီး စစ်ဆင်ရေးတွေ ဆောင်ရွက်နိုင်ပါတယ်။
အဲဒီရဟတ်ယာဉ်တွေကို ၁၉၈၄ ခုနှစ်မှာ စတင်မိတ်ဆက်ခဲ့ချိန် ကတည်းက စွမ်းဆောင်ရည်နဲ့ နည်းပညာပိုင်းတွေ အစဉ်တစိုက် မွမ်းမံ အဆင့်မြှင့်လာခဲ့ပါတယ်။ ကြည်းတပ်ဟာ Apacheတွေကို ၂၀၅၀ ပြည့်နှစ်အထိ ဆက်လက် အသုံးပြုနေဖို့လည်း ရည်ရွယ်ထားပါတယ်။
ကိုးကား: CNN
