ဩဂုတ် ၁၅၊ ၂၀၂၆။ ထားမြတ်/People’s Spring
ကချင်ပြည်နယ် ရွှေကူ၊ ဗန်းမော်နဲ့ ရှမ်းမြောက်က မိုးမိတ်-မဘိမ်းအစပ်မှာ ကချင်လွတ်လပ်ရေးတပ်မတော်(KIA)နဲ့ စစ်တပ်အကြား တိုက်ပွဲတွေ ဖြစ်ပွားနေပြီး စစ်တပ်က လေကြောင်းပစ်ကူပေး တိုက်ခိုက်တာတွေ နေ့စဉ် ပြုလုပ်နေတယ်လို့ ကချင်စစ်ရေးသတင်းရင်းမြစ်က ပြောပါတယ်။
ရွှေကူမြို့အပါအဝင် ကချင်ဒေသ လတ်တလော စစ်ရေးအခြေအနေတွေကို သတင်းရင်းမြစ်က အခုလို ရှင်းပြပေးတာပါ။
“ရွှေကူမှ ဗန်းမော်အထွက် ငဘတ်ကြီးဘက်မှာ ၂ရက်၊ ၃ရက်ခြား စစ်ကြောင်းထိုးပြီး ပြန်ဆုတ်ပါတယ်။ လေယာဉ်နဲ့ အဲဒီနေရာ မြစ်ကမ်းနေရာတွေ မိုးကမိတ်ကနေ မဘိမ်းမြို့နယ်အစပ်ကို စစ်ကြောင်းထိုး နေ့တိုင်း လေယာဉ်ကြဲနေတယ်။ဗန်းမော်မြို့တွင်းမှာလည်း မနေ့ကစပြီး ရန်သူစစ်ကြောင်းထိုးလို့ တိုက်ပွဲပြန်ဖြစ်နေတယ်”လို့ ကချင်သတင်းရင်းမြစ်က ပြောပါတယ်။
Public Service Announcement
ရွှေကူမြို့စစ်မျက်နှာမှာ အာဏာသိမ်းစစ်တပ်က တနေ့ ၂ကြိမ်နှုန်းနဲ့ လေယာဉ်နဲ့ ဗုံးကြဲတိုက်ခိုက်တာ ၅ရက်ဆက်ရှိပြီလို့ အသိပေးပါတယ်။
ရွှေကူမြို့ဒေသခံကလည်း မြို့ဟာ ပြည်သူတွေ ဆက်မနေသင့်တဲ့ အခြေအနေဖြစ်ပြီး မြို့အပြင်ပတ်လည်မှာလည်း တိုက်ပွဲတွေဖြစ်တာ လေကြောင်းတိုက်ခိုက်တာတွေ ရှိနေတယ်လို့ အသိပေးထားပါတယ်။
ဒါ့အပြင် ရွှေကူမြို့ရဲစခန်းတိုက်ခိုက်ခံရမှုမှာ အထိအခိုက်တွေရှိတယ်လို့လည်း ဆိုပါတယ်။
အဲဒါနဲ့ပတ်သက်ပြီး ကချင်သတင်းရင်းမြစ်က “ ရဲစခန်းကို FPV ဒရုန်းကျတာ နေမှာပါ” လို့ ပြောပါတယ်။
အာဏာသိမ်းစစ်တပ်ဟာ ကာလအတန်ကြာ တိုက်ပွဲငြိမ်နေတဲ့ မိုးမိတ်မြို့ကို ပြီးခဲ့တဲ့ ရက်ပိုင်းမှာ ထိုးစစ်ဆင် စစ်ရေးလှုပ်ရှားခဲ့လို့ KIAနဲ့ တိုက်ပွဲဖြစ်ခဲ့တာပါ။စစ်တပ်ကို ခုခံရာမှာ KIAနဲ့အတူ ကျောင်းသားတပ်မတော်လို့ ခေါ်ဆိုတဲ့ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး(ABSDF) -မြောက်ပိုင်း တပ်ဖွဲ့ဝင်တွေလည်း ပါဝင်တိုက်ခိုက်နေတာပါ။
မိုးမိတ်မြို့တိုက်ပွဲမှာ စစ်တပ်ဘက်ကလည်း အရာရှိတွေအပါအဝင် ထိခိုက်ကျဆုံးမှုရှိတယ်ဆိုတဲ့ သတင်းတွေ ထွက်ပေါ်လျက်ရှိနေပါတယ်။ အဲဒီလိုထိခိုက်မှုတွေ ဖြစ်နိုင်ခြေရှိကြောင်းလည်း သတင်းရင်းမြစ်က ပြောပါတယ်။
တဖက်မှာလည်း စစ်တပ်ဟာ တိုက်ပွဲဖြစ်ပွားမှုမရှိတဲ့ ရှမ်းမြောက်က ကွတ်ခိုင်မြို့နယ်အတွင်းကိုလည်း ဩဂုတ် ၁၄ရက်က လေကြောင်း တိုက်ခိုက်ခဲ့ပါသေးတယ်။
ကချင်ဒေသစစ်ရေး အခြေအနေတွေနဲ့ ပတ်သက်ပြီး မေးမြန်းဖို့ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံသို့ ဆက်သွယ်ထားပေမဲ့ အဆက်အသွယ်မရသေးပါဘူး။
