သြဂုတ် ၁၉၊၂၀၂၆။ မေရီ/People’s Spring
မန္တလေးမြို့မှာဟင်းချိုမှုန့်တွေကိုကားနဲ့ မှောင်ခိုသယ်တယ်ဆိုပြီး စစ်ရှောင်ဘုန်းကြီးတစ်ပါးကို ချမ်းအေးသာစံမြို့နယ် သာသနာထိန်းသိမ်းစောင့်ရှောက်ရေးအဖွဲ့က ဖမ်းဆီးခဲ့ပါတယ်။
သြဂုတ် ၁၇ ရက် ညနေ ၆ နာရီခွဲခန့်က ချမ်းအေးသာစံမြို့နယ်တနေရာမှာ ဘုန်းကြီးတစ်ပါး ကားကို ကိုယ်တိုင်မောင်းနေတဲ့အကြောင်း သတင်းရလို့ သွားရောက်စစ်ဆေးခဲ့ကြောင့် မြို့နယ် သာသာနာထိန်းသိမ်းစောင့်ရှောက်ရေးအဖွဲ့က ဆိုပါတယ်။
ဘုန်းကြီးဟာ ကားမောင်းရုံတင်မကဘဲ တရုတ်ထုတ် ဟင်းချိုမှုန့်အိတ်တွေ များစွာပါရှိတာ တွေ့ရလို့ ရဲကိုပါ အကြောင်းကြားပြီး စစ်ဆေးခဲ့တယ်လို့ ချမ်းအေးသာစံမြို့နယ် သာသနာထိန်းသိမ်းစောင့်ရှောက်ရေးအဖွဲ့က ထုတ်ပြန်တာပါ။
Public Service Announcement
အဲဒီဘုန်းကြီးဟာထီးချိုင့်မြို့နယ်ကျေးရွာတစ်ရွာကဖြစ်ပြီး အသက်( ၆၂)နှစ်၊ ဝါ(၁၂)ရှိကြောင်း၊ စစ်ဘေးကြောင့် မန္တလေး၊ ပြည်ကြီးတံခွန်မြို့နယ်က ကျောင်းတိုက်မှာ သတင်းသုံးနေတယ်လို့ ဖော်ပြပါတယ်။
၎င်းဟာ တရုတ်ပြည်က တင်သွင်းလာတဲ့ အချိုမှုန့်အိတ်တွေကို နောင်ချိုမြို့ထိ သွားရောက် သယ်ဆောင်ကာ ဝက်ဝံစစ်ဆေးရေးဂိတ်ကို တောလမ်းက ရှောင်ကွင်း မောင်းခဲ့တယ်လို့ ဆိုပါတယ်။
“ထွက်ဆိုချက်အရ ယာဉ်မောင်းခ (၅)သောင်းကျပ် ရတယ်လို့ သိရပြီး ဆေးဖိုးလိုအပ်နေလို့ ယခု လုပ်ဆောင်ရခြင်း ဖြစ်ပြီး ယခုအကြိမ်ပါဆိုလျှင် သုံးကြိမ်ရှိပြီလို့ သိရပါတယ်။”လို့ သာထိန်းအဖွဲ့ဝင် သံဃာတစ်ပါးက လူမှုကွန်ရက်မှာ ရေးသားပါတယ်။
၎င်းဘုန်းကြီးကို မြို့နယ်သံဃအဖွဲ့အစည်းဆရာတော်တွေက လူဝတ်လဲပေးပြီး ကျန်တဲ့ မော်တော်ယာဉ်၊ ကုန်ပစ္စည်းတွေနဲ့ အတူပါသူတစ်ဦးကို ရဲလက်ထဲ ထည့်ပေးလိုက်တယ်လို့ သိရပါတယ်။
ဝက်ဝံစစ်ဆေးရေးဂိတ်အပါအဝင် မန္တလေး-နောင်ချို-လားရှိုး လမ်းတစ်လျှောက်က အာဏာသိမ်းစစ်တပ်ရဲ့ စစ်ဆေးရေးဂိတ်တွေဟာ ကုန်စည်သယ်ယူခွင့်ကို တင်းကျပ်စွာ စစ်ဆေးပြီး ငွေတောင်းတာ၊ ဖမ်းဆီးသိမ်းဆည်းတာတွေကြောင့် ခုလို မှောင်ခိုလမ်းကြောင်းတွေ ပေါ်ပေါ်လာတာဖြစ်ပြီး ဘုန်းကြီးတွေပါ သယ်ဆောင်လာတဲ့အထိ ဖြစ်ပွားလာတာဖြစ်ပါတယ်။
