မန္တလေးမှာ နေအိမ်အတွင်း လင်မယား ၂ဦး သတ်ဖြတ်ခံရ

စက်တင်ဘာ ၁၅၊ ၂၀၂၆။ မေရီ/People’s Spring

မန္တလေးမြို့၊ ချမ်းမြသာစည်မြို့နယ်မှာ လင်မယား၂ဦး နေအိမ်အတွင်း သတ်ဖြတ်ခံထားရကြောင်း ဒေသခံတွေက ပြောပါတယ်။

ဒီကနေ့ စက်တင်ဘာ ၁၅ ရက် နေ့လယ်ပိုင်းမှာ ချမ်းမြသာစည်မြို့နယ် ၁၁၁(A)လမ်း၊၆၈Aလမ်းနဲ့ ၆၈Bလမ်းကြားက နေအိမ်တစ်အိမ်မှာ လင်မယား ၂ဦး သတ်ဖြတ်ခံထားရတာကို တွေ့ရှိကြောင်း မန္တလေးမြေပြင်သတင်းတွေ ဖော်ပြနေတဲ့ MDY Revolution အဖွဲ့က အသိပေးပါတယ်။

“ဖြစ်တာကတော့ မနေ့ညကတည်းက ဖြစ်တာလို့ ကြားတယ်။ အိမ်ထဲဝင်ပြီး လင်မယားနှစ်ယောက် လုံး ဓါးနဲ့အထိုးခံရတာလို့ ကြားတယ်”လို့ နီးစပ်သူတစ်ဦးက ပြောပါတယ်။

Public Service Announcement

အဆိုပါလင်မယား ၂ဦး ဘာကြောင့် သတ်ဖြတ်ခံတယ်ဆိုတာတော့ မသိရသေးပါဘူး။ အခင်းဖြစ်ပွားရာနေရာကို စစ်တပ်လက်အောက်ခံ ရဲတွေနဲ့ အုပ်ချုပ်ရေးမှူးတွေ ရောက်လာပြီး အနီးဝန်းကျင်ရှိ လမ်းတွေကို ပိတ်ဆို့ကာ စစ်ဆေးခဲ့ကြောင်း သိရပါတယ်။

မနေ့ကလည်း မန္တလေးမြို့လယ်က ချမ်းအေးသာစံမြို့နယ်၊ ၈၁ လမ်း၊ ၂၆ လမ်းနဲ့ ၂၇ လမ်းကြား၊ အာဏာသိမ်းစစ်တပ် တပ်စွဲထားရာ မြ၀တီဘဏ်နဲ့ မျက်နှာချင်းဆိုင်ဗလီ၀င်းအတွင်း ဒေသအခေါ် ရွေတိုက်ဝင်းထဲက နေအိမ်တစ်အိမ် ဓားပြတိုက်ခံရပြီး ရွှေနဲ့ငွေတွေပါသွားခဲ့ကြောင်း မန္တလေးမြေပြင်ကင်းထောက်အဖွဲ့ဖြစ်တဲ့ Voice Of Mandalay အဖွဲ့က ပြောပါတယ်။

မန္တလေးမြို့မှာ စစ်တပ်အာဏာသိမ်းပြီးနောက်ပိုင်း ဥပဒေစိုးမိုးမှုမရှိတော့ဘဲ ရွှေဆိုင်တွေ၊ ဘဏ်တွေကအစ မကြာခဏ ဓါးပြတိုက်ခံရတာတွေ၊ ဓါးပြတိုက်လူသတ်မှု လုယက်မှူတွေ မကြာခဏ ဖြစ်​ပွားနေကြောင်း မြို့ခံတွေဆီက သိရပါတယ်။