အောက်တိုဘာ ၂၊ ၂၀၂၆။ ထားမြတ်/People’s Spring
သဘာဝဘေးအန္တရာယ်ထိခိုက်ခံစားနေရသော တနင်္သာရီတိုင်း ၊ ထားဝယ်ခရိုင်အတွင်းရှိ မြို့နယ်များအား အာဏာသိမ်းစစ်တပ်က လေကြောင်း တိုက်ခိုက်မှု လုပ်ဆောင်တဲ့အပေါ် ကန့်ကွက်ရှုတ်ချကြောင်း တနင်္သာရီ ဖက်ဒရယ်ယူနစ် ဖော်ဆောင်ရေးကောင်စီက ထုတ်ပြန်ပါတယ်။
စက်တင်ဘာ နောက်ဆုံးပတ်မှာ ဖြစ်ခဲ့တဲ့ လေဖိအားနည်းရပ်ဝန်းကြောင့် သမိုင်းတလျှောက် အမြင့်ဆုံးမိုးရေချိန်ဖြင့် ပြင်းထန်စွာ မိုးရွာသွန်းမှုဖြစ်ခဲ့တဲ့ တနင်္သာရီတိုင်း ၊ ထားဝယ် ခရိုင်အတွင်းရှိ လောင်းလုံ၊ သရက်ချောင်းနဲ့ ထားဝယ်မြို့နယ်တွေမှာ ပြည်သူတွေအနေနဲ့ တောင်ပြို၊ မြေပြို၊ ရေဘေး စတဲ့ အန္တရာယ်တွေ ခံစားနေရချိန် စစ်တပ်က ကျေးရွာအချို့ကို လေကြောင်းဗုံးကြဲတိုက်ခိုက်လာတဲ့အပေါ် အခုလို ထုတ်ပြန် ခဲ့တာလည်းဖြစ်ပါတယ်။
အာဏာသိမ်းစစ်တပ်ဟာ ရေဘေးကြုံနေရတဲ့ဒေသတွေဖြစ်တဲ့ ထားဝယ်မြို့နယ်၊ ရေဝိုင်းကျေးရွာကို စက်တင်ဘာ ၃၀ရက်မှာ တိုက်လေယာဥ်နဲ့ ဗုံးကြဲခဲ့သလို အောက်တိုဘာ ၁ရက်မှာ သရက်ချောင်းမြို့နယ်ရှိ ပိတိုင်ကျေးရွာ၊ လဘကျေးရွာနဲ့ ဆင်ကျန်းကျေးရွာတို့ကို လေယာဉ်နဲ့ ဆက်လက် ဗုံးကြဲတာ စက်သေနတ်နဲ့ ပစ်တာ ပြုလုပ်ခဲပါတယ်။
Public Service Announcement
စစ်တပ် လေကြောင်းတိုက်ခိုက်မှုများကြောင့် လူထိခိုက်သေဆုံးမှု မရှိခဲ့ပေမဲ့ တိုက်ခိုက်ခံရတဲ့ နေရာတွေဟာ သဘာဝဘေးအန္တရာယ်ကြောင့် ထိခိုက်ပျက်စီး ခဲ့တဲ့ ဒေသများဖြစ်ပြီး ရှင်းလင်းရေး၊ ကယ်ဆယ်ရေးနဲ့ ပြန်လည် ထူထောင်ရေး လုပ်ငန်းများ စတင်ဆောင်ရွက်နေတဲ့နေရာတွေဖြစ်တယ်လို့ ဖော်ပြပါတယ်။
“သဘာဝဘေးထိခိုက်ခံစားနေရသော ပြည်သူများအပေါ် ကူညီထောက်ပံ့မှုများ ဆောင်ရွက် ရမည့်အစား အကြမ်းဖက်စစ်ကောင်စီသည် နိုင်ငံတော်အဆင့်ဖြင့်ကူညီဆောင်ရွက်ခြင်း မရှိသည့်အပြင် သဘာဝဘေးသင့် ထားဝယ်ခရိုင်အတွင်း လေကြောင်းတိုက်ခိုက်မှုများ ဆက်တိုက် ပြုလုပ် နေသည့် စစ်ကောင်စီ၏ အကြမ်းဖက်လုပ်ရပ်များအပေါ် တနင်္သာရီ ဖက်ဒရယ်ယူနစ် ဖော်ဆောင်ရေး ကောင်စီ (TFUCC) က ပြင်းထန်စွာ ကန့်ကွက်ရှုတ်ချသည်”လို့လည်း ထုတ်ပြန်ချက်မှာ ပါရှိပါတယ်။
စစ်တပ်ရဲ့ အခုလို လုပ်ရပ်ဟာ သဘာဝဘေးသင့် ပြည်သူများအတွက် လိုအပ်နေတဲ့ လူသားချင်းစာနာ ထောက်ထားမှုဆိုင်ရာ အကူအညီပေးရေး၊ ရှင်းလင်းရေးနဲ့ ပြန်လည်ထူထောင်ရေးလုပ်ငန်းများကို နှောင့်ယှက်ဟန့်တားရန် ရည်ရွယ်တာဖြစ်တယ်လို့လည်း ဖော်ပြထားပါတယ်။
စစ်အုပ်စုရဲ့ လေကြောင်းတိုက်ခိုက်မှု လုပ်ရပ်တွေနဲ့ လူသားချင်းစာနာထောက်ထားမှုဆိုင်ရာ လုပ်ငန်းများအပေါ် နှောင့်ယှက် ဟန့်တားမှုများအားလုံးကို စနစ်တကျ မှတ်တမ်းတင်ထားကြောင်း TFUCCက ထုတ်ပြန်ခဲ့ပြီး ထားဝယ်ခရိုင်အတွင်းရှိ ပြည်သူများရဲ့ လုံခြုံရေးနဲ့ အကူအညီ ထောက်ပံ့များ ဆက်လက်ပံ့ပိုးနိုင်ရေးအတွက် သက်ဆိုင်ရာတော်လှန်ရေး ၊ ကာကွယ်ရေး အဖွဲ့အစည်း များနဲ့ လက်တွဲကာ ပူးပေါင်းဆောင်ရွက်သွားမယ်လို့လည်း အသိပေးပါတယ်။
တနင်္သာရီတိုင်းအတွင်း သဘာ၀ဘေးကြုံနေရချိန် စစ်တပ်ရဲ့ လေကြောင်း တိုက်ခိုက်မှု လုပ်ရပ်ဟာ လူမဆန်တဲ့ လုပ်ရပ်ဖြစ်ကြောင်း ကရင်အမျိုးသားအစည်းအရုံး(KNU)က ထုတ်ပြန်ထားပြီး စစ်တပ်ရဲ့ အကြမ်းဖက်လုပ်ရပ်တွေကြောင့် သဘာ၀ဘေးကြုံနေရတဲ့ ပြည်သူတွေဟာ ထိတ်လန့်ကြောက်ရွံ့နေရကြောင်း ဖော်ပြထားပါတယ်။
