အောက်တိုဘာ ၁၈၊ ၂၀၂၆။ ထားမြတ်/People’s Spring
တနင်္သာရီတိုင်း၊ ပုလောမြိုနယ် ပလောက်မြို့ရှိ စစ်တပ်က စစ်ကြောင်းထိုးလာလို့ တိုက်ပွဲဖြစ်ပွားရာ စစ်တပ်က သေဆုံးထိခိုက်ရှိခဲ့တယ်လို့ ကရင်အမျိုးသားအစည်းအရုံး(KNU) မြိတ်ထားဝယ်ခရိုင် သတင်းရင်းမြစ်က ပြောပါတယ်။
စစ်တပ်ဟာ ပလောက်မြို့ကနေ စစ်ကြောင်းထိုးလာလို့ အောက်တိုဘာ ၁၀ရက်ကနေ ၁၆ရက်အတွင်း ကရင်အမျိုးသားလွတ်မြောက်ရေးတပ်မတော်(KNLA)နဲ့ တိုက်ပွဲတွေ ဖြစ်ပွားခဲ့တာလို့ဆိုပါတယ်။
“တိုက်ပွဲဖြစ်တဲ့အပေါ်မှာ စကစဘက်က သေဆုံးမှုတွေရှိတယ်ပေါ့နော်။ သူတို့မှာ အထိနာတာရှိတယ်။ အဲဒါကြောင့် သူတို့ စစ်ကြောင်းက ဆက်ထိုးလို့မရဘူးဖြစ်နေတယ်။ ထိခိုက်တာ ၅ဦးအထက်တော့ရှိတယ် ဒါက အကြမ်းဖျင်းပဲ ပြောလို့ရမယ်။ လက်နက်ခဲယမ်း တော့ မရရှိဘူး။ ပြောရမယ်ဆို သူတို့ စစ်ကြောင်း တက်လာတော့ ကျနော်တို့ဘက်က ပစ်ခတ်တယ်။ အလောင်းတွေ တော့ အဝေးကနေ တွေ့ရှိတယ်လို့ ပြောတယ်။ ဒရုန်းနဲ့ကြည်တော့ အလောင်းတွေ သယ်ဆောင်သွားတယ် အလောင်းတွေ တွေ့တယ်ပေါ့နော်” လို့ KNU မြိတ်ထားဝယ်ခရိုင် သတင်းရင်းမြစ်က ပြောပါတယ်။
Public Service Announcement
စစ်တပ်စစ်ကြောင်းတွေ ရှိနေတာမို့ ရှင်းလင်းရေးတွေ မလုပ်ဆောင်ရသေးကြောင်းလည်း သူက ပြောပြပါတယ်။
စစ်တပ်ဟာ တော်လှန်ရေးတပ်တွေ ထိန်းချုပ်ထားတဲ့နယ်မြေဒေသတွေ ပြန်လည်စိုးမိုးထိန်းချုပ်နိုင်ဖို့ စစ်ကြောင်းထိုးနေတာဖြစ်ပြီး ပလောက်မြိုအနီး ဘုရင့်တောင်ကျေးရွာကတဆင့် ဆင်ထိုးကြီးရွာဘက်ကို ဆက်လက် စစ်ကြောင်းထိုးလာတာလို့ ဆိုပါတယ်။
စစ်တပ်ဟာ တနင်္သာရီတိုင်းအတွင်း သဘာ၀ဘေးကြုံနေရချိန် မြေပြင်စစ်ကြောင်းထိုးတာတွေလုပ်လို့ ဒေသခံတွေအနေနဲ့ သဘာ၀ဘေးအပြင် စစ်ဘေးဒဏ်ပါကြုံနေကြရတယ်လို့ တော်လှန်ရေးတပ်တွေက ပြောကြားထားပါတယ်။ စစ်တပ်ရဲ့ လက်နက်ကြီး ဒရုန်း၊ လေကြောင်း တိုက်ခိုက်မှုတွေကြောင့် တနင်္သာရီတိုင်းအတွင်း အရပ်သားပြည်သူ အသက်အိုးအိမ်ထိခိုက်ပျက်စီးမှုတွေလည်း ဖြစ်ပေါ်ခဲ့ရပါတယ်။
