မြဝတီမှာထိုင်းကုန်တွေသယ်လာတဲ့ကားအစီး ၄၀ ခန့် စစ်တပ်ဖမ်းဆီး

အောက်တိုဘာ – ၂၃ ၊၂၀၂၆ ၊နိုင်ပကောင်း/People’s Spring

ထိုင်း – မြန်မာနယ်စပ်မြ၀တီမြို့၊နဒီလင်းမြိုင်ရွာမှာပြီးခဲ့တဲ့ရက်ပိုင်းအောက်တိုဘာ ၂၀ ရက်မှာ ထိုင်းကုန်စည်တွေ သယ်ဆောင်လာတဲ့ ကားအစီးရေ ၄၀ နီးပါးကို အာဏာသိမ်းစစ်တပ်က ဖမ်းဆီးလိုက်တယ်လို့ ကရင်သတင်းရင်းမြစ်က ပြောပါတယ်။

အောက်တိုဘာလ ၂၀ ရက် ညပိုင်းမှာ မြဝတီမြို့ ၊ အမှတ် (၆) ရပ်ကွက်နဲ့ အမှတ် (၇) ရပ်ကွက်အနီး နဒီလင်းမြိုင်တံတားမှာ ထိုင်းကုန်စည်တွေသယ်လာတဲ့ ကားအစီးရေ ၄၀ ခန့်ကို မြဝတီအခြေစိုက် အမှတ် ( ၂၇၅) ခြေလျင်တပ်ရင်းက ဖမ်းဆီးလိုက်တာပါ။

နဒီလင်းမြိုင်ရွာမှာ နဒီတံတားရှိပြီး တံတားရဲ့ တဖက်ခြမ်းစီမှာ စစ်တပ်နဲ့ BGF အသွင်ပြောင်း ကရင်အမျိုးသားတပ်မတော် (KNA) တို့ တပ်စွဲထားတာပါ။

Public Service Announcement

ဖမ်းဆီးခံလိုက်ရတဲ့ ကုန်ကားတွေဟာ မြဝတီကနေတဆင့် ကော့ကရိတ် ၊ ဘားအံ မြို့တွေက ကုန်စုံဆိုင်တွေဆီ ထိုင်းကုန်စည်တွေကိုခေါက်တိုပို့ဆောင်ပေးနေတဲ့ ကားတွေဖြစ်တယ်လို့ ကရင်သတင်းရင်းမြစ်က ပြောပါတယ်။

ကရင်သတင်းရင်းမြစ်တစ်ဦးပြောတာကတော့ ကုန်သည်အချင်းချင်း စစ်တပ်ဆီတိုင်ကြားရာကနေ ဖမ်းခံရတာလို့ဆိုပါတယ်။

“မြ၀တီကနေ ကော့ကရိတ် ဘားအံကို သယ်ပို့တဲ့ကားတွေပေါ့၊ ကုန်သည်အချင်းအချင်းပဲ၊ မနာလိုလို့ စစ်တပ်ကိုတိုင်လိုက်တာ” လို့ ကရင်သတင်းရင်းမြစ်က ပြောပါတယ်။

ဖမ်းဆီးလိုက်တဲ့ ကုန်စည်တွေအပြင် ၊ ကုန်သယ်တဲ့ လိုင်စင်မဲ့ကားတွေနဲ့ ယာဉ်မောင်းတွေကိုပါ ခလရ (၂၇၅) တပ်ရင်းထဲ ဖမ်းခေါ်သွားတယ်လို့ ကုန်သည်ရင်းမြစ်တစ်ဦးက အသိပေးပါတယ်။

အခုရက်ပိုင်းအတွင်းမှာ အာဏာသိမ်းစစ်တပ်က မြ၀တီမြို့ပေါ်မှာရှိတဲ့ ထိုင်းကုန်စည်တွေ သိုလှောင်ရာ ဂိုဒေါင်တွေကို ရှောင်တခင်ဝင်ရောက်စစ်ဆေးတာတွေလည်းလုပ်ဆောင်နေပါတယ်။

တဖက်မှာလည်း မြန်မာကျပ်ငွေတန်ဖိုးကျဆင်းမှုကြောင့် ထိုင်းစည်ကုန်တွေဟာ တနေ့တခြား စျေးတွေတက်လာနေတယ်လို့ မြဝတီမြို့ခံ တစ်ဦးက ပြောပါတယ်။