လွိုင်​ကော်မြို့ တိုက်ပွဲ​ကြောင့် စစ်ရှောင်များလာ၍ အရေးပေါ်လိုအပ်ချက်များကူညီရန် ကရင်နီစစ်ရှောင်ကူညီရေးကွန်ရက် တောင်းဆို

လွိုင်ကော်မြို့ပေါ်တွင် တိုက်ပွဲများ ပြင်းထန်သော ကြောင့် စစ်ဘေးရှောင်ပြည်သူများ ပိုမိုများပြာလာကြောင်း ကရင်နီပြည် စစ်ဘေးရှောင်ကူညီစောင့်ရှောက်ရေးကွန်ရက်က ထုတ်ပြန်ခဲ့ပြီး လက်ရှိတွင်စားနပ်ရိက္ခာ၊ စောင်၊ ခြင်ထောင်၊ မိုးကာနှင့် အဝတ်အထည်များလိုအပ်နေကြောင်း ဖော်ပြသည်။

အရေးပေါ် လိုအပ်ချက်များကို လှူဒါန်းကြရန်နှင့် လှူဒါန်းလိုသူများအနေဖြင့် ကရင်နီပြည်စစ်ဘေးရှောင် ကူညီစောင့်ရှောက်ရေးကွန်ရက် အမည်ရှိ Facebook Page သို့ ဆက်သွယ်လှူဒါန်းနိုင်ကြောင်း အသိပေးထားသည်။

လတ်တလောတိုက်ပွဲများကြောင့် လွိုင်ကော်၊ဖရူဆို၊ ဒီးမော့ဆို မြို့နယ်များမှ ပြည်သူလူထု ၃၅၀၀၀ ခန့်ထပ်မံ ထွက်ပြေးနေရကြောင်း ကရင်နီလက်နက်ကိုင်တပ်ဖွဲ့ KNDFမှ ခေါင်းဆောင်တစ်ဦးဖြစ်သူ ခွန်းဘီထူးက ၎င်း၏ လူမှုကွန်ရက်တွင် အသိပေးထားသည်။

“ စကစကို လွတ်ထားရင် လူတွေကို ရက်စက်စွာဆက်သတ်မှာမို့ စစ်ကြောင်းမထွက်လာနိုင်အောင် တိုက်ရင်း လူထုအကြားစစ်မျက်နှာတွေ ဖြစ်လာပြီ။ KSCC (ကရင်နီပြည်နယ်အတိုင်ပင်ခံကောင်စီ)မှာ ကော်မတီရှိတယ်။ လှူပါ။ ကွင်းထဲမှာ လှုပ်ရှားကူညီနေသူများရှိတယ်။ ကိုယ်ယုံကြည်သည့် လူမှုအသင်းအဖွဲ့များကို ကူကြပါ။ နိုင်ငံသားများမက လူသားချင်းစာနာတတ်သူ မိတ်ဆွေနိုင်ငံများအားလုံးကို အထူးတောင်းဆိုပါတယ်” ဟု အမျိုးသားညီညွတ်ရေးအစိုးရ သယံဇာတနှင့် သဘာ၀ ပတ်ဝန်းကျင်ထိန်းသိမ်းရေး ဒုတိယဝန်ကြီးလည်းဖြစ်သူ ခွန်းဘီထးက ရေးသားထားသည်။

Public Service Announcement

တိုးတက်သော ကရင်နီပြည်သူ့အင်အားစု(PKPF)ကလည်း ပြည်တွင်း၊ပြည်ပနှင့် နိုင်ငံတကာအနေဖြင့် ကရင်နီပြည်နယ်ကို ကူညီပေးရန် တောင်းဆိုထားသည်။

“လူသားချင်စာနာမှု ထောက်ပံ့ပေးကြပါ၊ အဘက်ဘက်မှ ဝန်းရံကြပါ။ လွိုင်ကော်ဆိုတာ လက်ရှိ ကရင်နီပြည်ရဲ့ မြို့တော်ပါ။အခုလူထုတချို့ စွန့်ခွာနေရပြီ” ဟု PKPFက ဆိုသည်။