တမူးမြို့နယ်၊အုတ်ဖိုကန်ဘောင် ရဲဘက် အကျဉ်းစခန်းကို ယမန်နေ့မနက် ၅နာရီခွဲက ဝင်ရောက်စီးနင်းရာတွင် အကျဉ်းဦးစီး လုံခြုံရေးတပ်ဖွဲဝင် ၁၁ ဦးသေဆုံးပြီး၊ PDFနှစ်ဦး ကျဆုံးခဲ့သည်ဟု ပြည်သူ့ကာကွယ်ရေးတပ်ဖွဲ့ -PDF (တမူးမြို့) တပ်ရင်း – ၁ ယနေ့ ညနေပိုင်းတွင်ထုတ်ပြန်သည်။
ဝက်ရှု့ကျေးရွာအနီးရှိ အကျဉ်းစခန်းကို ဝင်ရောက်စီးနင်းစဉ် စစ်ကောင်စီလက်အောက်ခံလုံခြုံရေးတပ်ဖွဲ့များကို PDFတပ်ဖွဲ့ဝင်များက လက်နက်ချရန် တိုက်တွန်းခဲ့သော်လည်း လက်နက်မချဘဲ ပြန်လည် တိုက်ခိုက်ခြင်းကြောင့် အပြန်အလှန်ပစ်ခတ်မူဖြစ်ပွားခဲ့ခြင်းဖြစ်သည်ဟု PDF(တမူး) ကထုတ်ပြန်သည်။
ထောင်ပိုင်က ၎င်း၏ လုံခြုံရေးများကို လက်နက်မချဘဲ ပြန်လည်ပစ်ခတ်ရန် အော်ဟစ် အမိန့်ပေးခဲ့ပြီး ထောင်ပိုင်ဇနီးက ပစ္စတိုဖြင့် ပြန်လည်ပစ်ခတ်ခဲ့သည်။ ထိုကြောင့် ၎င်းတို့ လင်မယားအပါအဝင် အကျဉ်းထောင်လုံခြုံရေး ၁၁ ဦးသေဆုံးရခြင်းဖြစ်သည်ဟုထုတ်ပြန်ချက်တွင်ဖော်ပြထားသည်။ ကျဆုံးရဲဘော်(၂)ဦးထဲမှ (၁)ဦးအလောင်းအား ပြန်လည်ကောက်ယူရန် ကြိုးစားခဲ့ကြသော်လည်း မြေပြင်အခြေနေအရ ၎င်းတို့ကိုင်ဆောင်သော လက်နက်များနှင့်အတူ မလွှဲမရှောင်သာ ချန်ထားခဲ့ရဟု PDF(တမူး)ကထုတ်ပြန်သည်။
တိုက်ပွဲတွင်ပြည်သူကာကွယ်ရေးတပ်သား ၂ ဦး ကျဆုံးသည့်အပြင် ၄ဦး ဒဏ်ရာရရှိခဲ့သည်ဟု ထုတ်ပြန်ချက်တွင်ဖော်ပြထားသည်။
Public Service Announcement
ထိုသို့ ၂ ဦးကျဆုံးရခြင်းမှာ ဝန်ထမ်းမိသားစုများအပေါ် ညှာတာထောက်ထား သက်ညှာခဲ့ခြင်းကြောင့်ဖြစ်သည်ဟု ပါရှိသည်။ စစ်ကောင်စီ လက်အောက်ခံ အဖွဲ့အစည်း၊ ဝန်ထမ်းနှင့် ၎င်းတို့၏ မိသားစုဝင် မည်သူတစ်ဦး တစ်ယောက်ကိုမျှ ညှာတာထောက်ထားကာ ဆောင်ရွက်တော့မည် မဟုတ်ဘဲ ပြတ်ပြတ်သားသား ရှင်းလင်းဆောင်ရွက်သွားမည်ဟုလည်းလည်း တမူး PDFကထုတ်ပြန်သည်။
