ဖာပွန်မှာ ဒီမနက် စစ်​ကောင်စီတပ်​က လေ​ကြောင်းတိုက်ခိုက်လို့ ​​​ဒေသခံ​တွေ ထိခိုက်​သေဆုံးမှု​တွေရှိ​နေ

ဖာပွန်ခရိုင်ထဲကို ဒီကနေ့မနက်ပိုင်းက အာဏာသိမ်းစစ်ကောင်စီတပ်က လေကြောင်းတိုက်ခိုက်မှုတွေ ထပ်လုပ်ခဲ့လို့ ဒေသခံအရပ်သားတွေ ထိခိုက်သေဆုံး ဒဏ်ရာရတာတွေရှိတယ်လို့ ကေအဲန်ယူက သတင်းထုတ်ပြန်ပါတယ်။

ဒီကနေ့ ဇန်နဝါရီ ၁၃ ရက် မနက် ၁ နာရီအချိန်က ကေအဲန်ယူထိန်းချုပ်နယ်မြေဖြစ်တဲ့ ဖာပွန်ခရိုင် ဒွယ်လိုးမြို့နယ် ရွှေညောင်ပင်ကျေးရွာကို အာဏာသိမ်းစစ်ကောင်စီတပ်က လေယာဉ်နှစ်စင်းနဲ့ ဗုံးကြဲတိုက်ခိုက်ခဲ့လို့ အရပ်သားတစ်ဦးသေဆုံးသွားခဲ့ပြီး သုံးဦးဒဏ်ရာရရှိသွားခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

လေယာဉ်နှစ်စင်းပေါ်ကနေ ကျေးရွာထဲကို ဗုံးလေးလုံး ကြဲချခဲ့တာဖြစ်ပြီး အဆောက်အဦး ၅ လုံးပါ ထိမှန်ပျက်စီးသွားခဲ့သေးတာပါ။

မနေ့ ဇန်နဝါရီ ၁၂ ရက် မနက်အစောပိုင်းကလည်း ဖာပွန်ခရိုင် ဒွယ်လိုးမြို့နယ် လယ်ထူဖိုး၊ ဝါးခါဒဲနဲ့ ထွီသီးအူ အနီးအနားနေရာတွေကို စစ်ကောင်စီ လေယာဉ် ၂ စင်းက ဗုံးကြဲတိုက်ခိုက်မှုတွေ လုပ်ဆောင်ခဲ့လို့ ဆေးပေးခန်းတွေ ထိခိုက်ပျက်စီးသွားခဲ့သေးတယ်လို့ ကေအဲန်ယူရဲ့ ထုတ်ပြန်ထားချက်အရ သိရပါတယ်။

Public Service Announcement