ကယန်းဒေသတွင် ကိုယ်ထူကိုယ်ထစာသင်ကျောင်း၌ကယန်းအလံလွှင့်ထူ

အကြမ်းဖက်စစ်ကောင်စီ၏ အာဏာသိမ်းမှုကြောင့် ပညာရေးနှောင့်နှေးခဲ့ကြ၍ ကယန်းဒေသ တစ်နေရာတွင် ကိုယ်ထူကိုယ်ထ စာသင်ကျောင်းဖွင့် ပြီး ကယန်းအလံ စိုက်ထူခဲ့ကြောင်း တိုးတက်သောကရင်နီပြည်သူ့အင်အားစု
(PKPF)က ယနေ့ဖော်ပြသည်။

အဆိုပါ ကိုယ်ထူကိုယ်ထ စာသင်ကျောင်း၌ ကလေးငယ်များသည် ကယန်းအလံတင်သီချင်းကို သီဆိုကာ ကယန်းအလံကို အလေးပြုခဲ့ကြသည်ဟု​ပါရှိသည်။

အဆိုပါ စာသင်ကျောင်းသည် မည်သည့်မြို့နယ် မည်သည့် ဒေသ၌ တည်ရှိသည်ဆိုသည်ကိုမူ ဖော်ပြမထားပေ။

ကယန်းလူမျိုးများ အများစုနေထိုင်ရာမှာ ဒီးမော့ဆိုအနောက်ခြမ်းဒေသဖြစ်ကြောင်း၊ လက်ရှိတွင် ဒီးမော့ဆိုအပါအဝင် ကရင်နီဒေသခံအများအပြား စစ်ရှောင်နေရကြောင်း၊ ယခု စာသင်ကျောင်းသည် ဖရူဆိုမြို့နယ်အတွင်း၌ တည်ရှိသည့် စာသင်ကျောင်းတစ်ခုဟု ယူဆကြောင်း ကရင်နီဒေသခံတစ်ဦးကပြောသည်။

Public Service Announcement

“အဓိကတော့ စစ်မှန်တဲ့ဖက်ဒရယ်အရသွားမယ်ဆိုရင် ဒါက တစ်နိုင်ငံလုံးလွှမ်းခြုံတဲ့ ကိစ္စမျိုးဖြစ်ခဲ့ပြီး လက်ခံမယ်ဆိုရင် ပြည်ထောင်စုအလံဖြစ်ရင်ဖြစ်မှာပေါ့။ ဒါကအခု ကိုယ်ထူ
ကိုယ်ထလေ။ ဘယ်အစိုးရမှ ပံ့ပိုးတာမဟုတ်ဘူး ကိုယ့်တိုင်းရင်းသားတွေ စာပေသင်ကြားမှုလုပ်တာဖြစ်တဲ့အတွက် ကိုယ့်တိုင်းရင်းသားအလံလွှင့်မှာပဲ။ နောက်ပိုင်း အများလက်ခံတဲ့ ပြည်ထောင်စုအလံဆိုရင် လွှင့်ရင်လွှင့်မယ် အများလက်မခံရင်တော့ ကိုယ့်တိုင်းရင်းသားအလံလွှင့်မှာပဲ။ ကိုယ့်ရဲ့လွှတ်လပ်ခွင့်ကို ဖော်ဆောင်တဲ့ပုံစံဖော်တာပေါ့” ဟု အဆိုပါ​ဒေသခံကသူ၏အမြင်ကိုပြောသည်။

လက်ရှိတွင် ကရင်နီဒေသရှိ တော်လှန်ရေးတပ်များ ပူးပေါင်းပြီး အာဏာသိမ်းစစ်ကောင်စီတပ်ကို ခုခံတိုက်ခိုက် လျက်ရှိရာ တိုက်ပွဲများနေ့စဉ်လိုလိုဖြစ်ပွားပြီး စစ်ကောင်စီတပ်မှ သေဆုံးထိခိုက်မှုများပြား လျက်ရှိသည်။ တိုက်ပွဲဖြစ်ပွားမှု၊ စစ်ကောင်စီတပ်၏ လက်နက်ကြီး ပစ်ခတ်မှုနှင့် လေကြောင်းမှ တိုက်ခိုက်မှုကြောင့် ကရင်နီဒေသခံအများအပြား စစ်ဘေးရှောင်နေကြရသည်။