ပြည်ထောင်စုလွှတ်တော်သည် နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာဥပဒေကို ပြင်ဆင်ကြောင်း ပြည်ထောင်စုလွှတ်တော်ကိုယ်စားပြုကော်မတီ(CRPH)က ယနေ့ (ဖေဖော်ဝါရီ ၂ ရက်)ထုတ်ပြန်သည်။
နိုင်ငံတော်၏အတိုင်ပင်ခံပုဂ္ဂိုလ်သည် ဖက်ဒရယ်ဒီမိုကရေစီ ပဋိညာဉ်နှင့်အညီရေးဆွဲထားသော မဟာဗျူဟာအရ နိုင်ငံတော်နှင့်နိုင်ငံသားများ၏ အကျိုးစီးပွားများအတွက် အမျိုးသားညီညွတ်ရေးအစိုးရကို အကြံပေးရမည်ဟု ပြင်ဆင်ချက်ပါရှိခြင်းဖြစ်သည်။
ပြီးခဲ့သည့် ၂၀၂၁ တွင် ပြင်ဆင်ခဲ့သော နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေ ပုဒ်မ ၆၊ ပုဒ်မခွဲ (က) ကို “ဖက်ဒရယ်ဒီမိုကရေစီပဋိညာဉ်ပါ နိုင်ငံရေးလမ်းပြမြေပုံနှင့် နိုင်ငံရေးရည်မှန်းချက်များ အကောင်အထည် ဖော်နိုင်ရေးအတွက် ဖက်ဒရယ်ဒီမိုကရေစီ ပဋိညာဉ်နှင့်အညီ ရေးဆွဲထားသော မဟာဗျူဟာအရ နိုင်ငံတော်နှင့်နိုင်ငံသားများ၏ အကျိုးစီးပွားများအတွက် အမျိုးသားညီညွတ်ရေးအစိုးရကို အကြံပေးရမည်”ဟု ပြင်ဆင်အစားထိုးသည်။
ထို့အပြင် “အတိုင်ပင်ခံပုဂ္ဂိုလ်၏ ရာထူးသက်တမ်းသည် အမျိုးသားညီညွတ်ရေးအစိုးရ၏ သက်တမ်းနှင့်အညီ ဖြစ်သည်”ဟုလည်း ပြင်ဆင်အစားထိုးသည်။
Public Service Announcement
NUG သည် နိုင်ငံတော်၏ အတိုင်ပင်ခံပုဂ္ဂိုလ်အဖြစ် ဒေါ်အောင်ဆန်းစုကြည်ကို ခန့်အပ်ထားပြီး လက်ရှိတွင် တရားမဝင်အာဏာသိမ်းစစ်တပ်က ဒေါ်အောင်ဆန်းစုကြည်ကို ပုဒ်မအမျိုးမျိုးတပ်ကာ အမှု ၁၇ မှုစွဲဆိုထားသည်။ အမှု ၁၇ မှုအနက် ၅ မှုအတွက် ထောင်ဒဏ် ၈ နှစ်ချမှတ်ကာ ၂ နှစ်ကို လျှော့ပေါ့ကြောင်း ကြေညာထား၍ ၆ နှစ် ချမှတ်ထားသည်။
