တနိုင်း ရွှေနှင့် ပယင်းမှော်အနီးရှိ စစ်ကောင်စီတပ်စခန်းကို KIAနှင့် PDF တိုက်ခိုက်သိမ်းပိုက်ဟု ဒေသခံပြော

ကချင်ပြည်နယ် တနိုင်းမြို့နယ်ရှိ ရွှေမှော်နှင့် ပယင်းမှော်များ အနီးရှိ စစ်ကောင်စီ၏ နမ့်ကောန့် တပ်စခန်းကို ကချင်လွတ်လပ်ရေးတပ်မတော်(KIA)နှင့် ပြည်သူ့ကာကာကွယ်ရေးတပ်(PDF) ပူးပေါင်းအဖွဲ့က တိုက်ခိုက်သိမ်းပိုက်လိုက်ကြောင်း ကချင်ဒေသခံတစ်ဦးက ပြောသည်။

ဖေဖော်ဝါရီ ၆ရက် နံနက် ၉နာရီခွဲခန့်တွင် နမ့်ကောန့်စခန်းကို KIAနှင့် PDF ပူးပေါင်း ဝင်ရောက်တိုက်ခိုက်ခဲ့ရာ တစ်နာရီခန့်အကြာတွင် စခန်းသိမ်းတိုက်ခိုက်နိုင်ခဲ့သည်ဟု​သိ့ရသည်။

“တနိုင်းမြို့ရဲ့ အနောက်ဘက်ခြမ်းပေါ့။ အဲဒါက အရင်က ပယင်းရွှေမှော်။ အဲဒီနေရာမှာ တပ်က ထိုးစစ်ဆင်ပြီး သိမ်းတဲ့အခါ သူတို့ ပြန်ထိုင်ထားတာ။ အရင်က KIA ထိုင်တဲ့နေရာပေါ့။ အခု သူတို့နေရာ သူတို့ ပြန်ထိုးစစ်ဆင်တဲ့ သဘောနဲ့ တိုက်တာပေါ့။” ဟု ဒေသခံက ပြောသည်။

အဆိုပါဒေသတွင် ၂၀၁၆ ခုနှစ်က စစ်ကောင်စီတပ်က လေကြောင်းနှင့် မြေပြင် အင်အားအလုံးအရင်းဖြင့် ဝင်ရောက် ထိုးစစ်ဆင်ကာ KIA တပ်စခန်းများတွင် ဝင်ရောက်နေရာယူခဲ့ခြင်းဖြစ်သည်။

Public Service Announcement

“အကျအဆုံးကျတော့ KIAဘက်က အတိအကျ ထုတ်ပြန်ထားတာမတွေ့ရဘူး။ စခန်းသိမ်းတယ်ဆိုရင်တော့ တပ်မတော်(စစ်ကောင်စီ)ဘက်က သေမှာပဲလေ။ ဒါပေမဲ့ KIAနဲ့ PDFကတော့ အေးဆေး ဘာမှမဖြစ်ဘူးလို့ကြားတယ်” ဟု ဒေသခံက နမ့်ကောန့်စခန်းသိမ်း တိုက်ပွဲနှင့်ပတ်သက်ပြီးပြောသည်။

စစ်ကောင်စီတပ်က ထိုးစစ်ဆင်လာနိုင်ခြင်း သို့မဟုတ် KIAက ထိုးစစ်ဆင် တိုက်ခိုက်မှု ဆက်လုပ်ခြင်းများ ရှိလာနိုင်၍ တိုက်ပွဲ ဆက်လက် ဖြစ်နိုင်မည့်အလားအလာ များကောင်း ဒေသခံကဆက်ပြောသည်။

KIA နှင့် PDF တပ်များသည် ဖေဖော်ဝါရီ ၁ရက်မှစ၍ ပူတာအို၊ဆွမ်ပရာဘွမ်၊ ဖားကန့်၊ တနိုင်း၊ မိုးညှင်းမြို့နယ်များရှိ စစ်ကောင်စီတပ်စခန်း၊ ရဲစခန်းနှင့် စစ်ကြောင်းများကို ဆက်တိုက်တိုက်ခိုက်လျက်ရှိသည်။