▪️နေအိမ် ၅လုံးနှင့် မူကြိုကျောင်းပျက်စီးဟု ဒီးမော့ဆို PDF အသိပေး
ကယားနီပြည်နယ် ဒီးမော့ဆိုအနောက်ဘက်ခြမ်းတွင် တိုက်ပွဲဖြစ်ပွားမှုမရှိဘဲ အကြမ်းဖက်စစ်ကောင်စီတပ်က အရပ်သားပြည်သူများကို ဗုံးကြဲလေယာဉ်ဖြင့် တိုက်ခိုက်ခဲ့ကြောင်းဒီးမော့ဆို ပြည်သူ့ကာကွယ်ရေးတပ်ဖွဲ့ (PDF) က ထုတ်ပြန်သည်။
ဖေဖော်ဝါရီ ၂၇ရက် နံနက် ၁နာရီ ၄၅မိနစ်တွင် လေကြောင်း တိုက်ခိုက်လာခြင်းဖြစ်ပြီး တချိန်တည်း ၌ပင် စစ်ကောင်စီတပ်က တာဝေးပစ်လက်နက်ကြီးများဖြင့် ထပ်မံပစ်ခတ်ခဲ့ကြောင်း၊ထိုသို့ တိုက်ခိုက်မှုများကြောင့် ပြည်သူလူထုနေအိမ် ၅လုံးနှင့် မူကြိုကျောင်း တစ်ကျောင်း ထိခိုက်ပျက်စီးခဲ့ကြောင်း ဖော်ပြထား သည်။ ထို့ပြင် အိမ်မွေးတိရိစ္ဆာန်အချို့ ထိခိုက်သေဆုံးခဲ့သည်ဟု ဆိုသည်။
ဒီးမော့ဆိုမြို့နယ်တွင် အကြမ်းဖက်စစ်ကောင်စီတပ်ဖွဲ့က အရပ်သားပြည်သူများအပေါ် ဗုံးကြဲပစ်ခတ်မှုမှာ ယခု ဖေဖော်ဝါရီလအတွင်း ၆ကြိမ်ခဲ့ရှိပြီး လက်နက်ကြီးဖြင့် ၃၅ကြိမ်ပစ်မှတ်ထား တိုက်ခိုက်ခဲ့ကြောင်း ဒီးမော့ဆို PDFက ထုတ်ပြန်သည်။
Public Service Announcement
စစ်ကောင်စီတပ်၏ လေကြောင်းတိုက်ခိုက်မှုကြောင့် ကရင်နီစစ်ရှောင်စခန်းများ ထပ်မံပြောင်းရွှေ့ခဲ့ရကြောင်း ကရင်နီပြည်စစ်ဘေးရှောင် ကူညီစောင့်ရှောက်ရေးကွန်ရက်က ယနေ့ ထုတ်ပြန်ထားသည်။
ယခင်ကလည်း စစ်ကောင်စီတပ်က စစ်ဘေးရှောင်များရှိရာဘက်သို့ လက်နက်ကြီးဖြင့် ပစ်ခတ်တိုက်ခိုက်ခဲ့၍ စစ်ရှောင်စခန်းပြောင်းရွှေ့ရမှုများ ရှိခဲ့သည်။ ထို့ပြင် ဖရူဆိုမြို့နယ်ရှိ စစ်ရှောင်စခန်းကို ညအချိန် လေကြောင်းမှ ဗုံးကြဲတိုက်ခိုက်ခဲ့၍ စစ်ရှောင်များသေဆုံးထိခိုက်မှုရှိခဲ့ဖူးသည်။
