စစ်ကောင်စီတပ်တွေဆုတ်ခွာဖို့ ကေအဲန်ယူက စာထွက်လာပြီးနာရီပိုင်းအတွင်း လေယာဥ်နဲ့လာပစ်ခတ်

ကေအဲန်ယူ တပ်မဟာ ၆ နယ်မြေထဲက စစ်ကောင်စီတပ်တွေ ပြန်ဆုတ်ခွာပေးဖို့သတိပေးစာထွက်လာပြီးနာရီပိုင်းအတွင်း လေယာဥ်နဲ့လာရောက်ပစ်ခတ်ခဲ့တယ်လို့ ဒေသခံအရင်းမြစ်တွေဆီက သိရပါတယ်။

ကေအဲန်ယူ ဒူးပလာယာခရိုင် တပ်မဟာ ၆ နယ်မြေအတွင်းမှာ ဝင်​ရောက်တပ်စွဲအခြေပြုလှုပ်ရှားနေတဲ့ စစ်ကောင်စီတပ်တွေအနေနဲ့ ဒီကနေ့ နောက်ဆုံးထားပြီး ပြန်လည်ဆုတ်ခွာပေးဖို့ တပ်မဟာ ၆ က စစ်ကောင်စီရဲ့ အရှေ့တောင်တိုင်းစစ်ဌာနချုပ် တိုင်းမှူး ဗိုလ်ချုပ်ကိုကိုမောင်ထံ ဒီကနေ့မှာ စာပေးပို့အကြောင်းကြားခဲ့တာပါ။

အဲဒီစာထွက်လာပြီး နာရီပိုင်းအတွင်းမှာပဲ လေးကေကော်အနီးတစ်ဝိုက်ကို ရဟတ်ယာဥ်သုံးစီးနဲ့ လာရောက်ပစ်ခတ်ခဲ့တယ်လို့ ဒေသခံတွေက ဆိုပါတယ်။

တပ်မဟာ ၆ ရဲ့ သတိပေးစာနဲ့ပတ်သက်လို့ ကေအဲန်ယူ ပြောခွင့်ရသူ ပဒိုစောတောနီးက အခုလိုပြောပါတယ်။

Public Service Announcement

“စစ်ကောင်စီတပ်တွေက ဘာမှနဖားရှိတာမဟုတ်ပဲ။ နဖားကြိုးလည်းမပါတဲ့လူတွေဆိုတော့လည်း လုပ်ချင်ရာလုပ်နေကြတာပဲလေ။ အနည်းဆုံးကတော့ လုတယ်ယက်တယ်။အဓိကကျနော်တို့ လူထုတွေက ကိုယ့်အိမ်ကိုယ့်အိမ်ပြန်လာချင်လို့တောင် ပြန်လာလို့မှမရတော့တဲ့အနေအထားက ဒီအတိုင်းထိုင်ကြည့်လို့မရတော့ဘူးလို့ ကျနော်တို့က သုံးသပ်ရပါတယ်ဗျာ” လို့ ပဒိုစောတောနီးက ပြောပါတယ်။

တပ်မဟာ ၆ နယ်မြေအတွင်းမှာ ပြီးခဲ့တဲ့နှစ် ဒီဇင်ဘာလ ၁၅ ရက်ကစပြီး စစ်ကောင်စီတပ်တွေရဲ့ ထိုးစစ်ဆင်မှုကြောင့် လေးကေကော်မြို့သစ်အပါအဝင် ပတ်ဝန်းကျင်ရှိ ကျေးရွာတွေက ပြည်သူလူထုတွေနဲ့ ကော့ကရိတ်တောင်ပိုင်းက ပြည်သူလူထုတွေဟာ ​ကျေးရွာတွေကိုစွန့်ခွာခဲ့ရပြီး စစ်ဘေးရှောင်နေခဲ့ရတာပါ။

အဲ့ဒီတိုက်ပွဲဖြစ်ပွားရာဒေသက ကျေးရွာတွေမှာ စစ်ကောင်စီတပ်ဟာ ဒေသခံပြည်သူတွေရဲ့ ပစ္စည်းတွေကို အဓမ္မသိမ်းယူတာ၊ ဖျက်ဆီးတာတွေကြောင့် ဒေသခံပြည်သူတွေဟာ နေရပ်ကို ပြန်လည်နေထိုင်ခြင်းမပြုရဲတဲ့ အခြေအနေကို ရောက်ရှိနေရတယ်လို့ တပ်မဟာ ၆ က ဆိုပါတယ်။

ဒါကြောင့် ကေအဲန်ယူအနေနဲ့ ကရင်ပြည်သူလူထုရဲ့ ရင်ဆိုင်နေရတဲ့ ဒုက္ခနဲ့ အသက်အိုးအိမ်စည်းစိမ်ကို ကာကွယ်ကူညီဖြေရှင်းဖို့အတွက် တာဝန်ရှိပြီး ပြည်သူတွေအေးချမ်းစွာ ပြန်လည်နေထိုင်နိုင်ဖို့အတွက် စစ်ကောင်စီအနေနဲ့ လေးကေကော်နဲ့ ကော့ကရိတ်ဒေသကနေ သုံးရက်အတွင်းပြန်လည်ထွက်ခွာဖို့ တပ်မဟာ ၆ က အသိပေးထားတာဖြစ်ပါတယ်။

“တပ်မဟာ ၆ ကတော့ သူ့ရဲ့နယ်မြေလုံခြုံရေးအရ သူတာဝန်ယူထားတဲ့အပေါ်မှာ သူလုပ်သင့်လုပ်ထိုက်တာတော့ လုပ်သွားမှာပဲလေ” လို့ ပဒိုစောတောနီးက ပြောပါတယ်။

စစ်ကောင်စီတပ်တွေအနေနဲ့ သုံးရက်အတွင်း ပြန်လည်ဆုတ်ခွာခြင်းမပြုပါက နောက်ပိုင်းဖြစ်ပေါ်လာမယ့် အကျိုးဆက်ပြသနာတွေဟာ ကေအဲန်ယူ ဒူးပလာယာခရိုင် တပ်မဟာ ၆ ရဲ့ တာဝန်မဟုတ်ကြောင်းနဲ့ အာဏာသိမ်းစစ်ကောင်စီရဲ့ တာဝန်သာဖြစ်တယ်လို့ တပ်မဟာ ၆ က စစ်ကောင်စီထံ စာပေးပို့ချက်အရ သိရပါတယ်။