ကော့ကရိတ်တောင်ပိုင်းမှာ စစ်ရေးပဋိပက္ခတွေပိုမိုပြင်းထန်နေပြီး ဒီကနေ့မနက်ပိုင်းက စစ်ကောင်စီက လက်နက်ကြီးနဲ့ပစ်ခတ်နေတယ်လို့ ဒေသခံတွေဆီကနေ သိရပါတယ်။
ကေအဲန်ယူထိန်းချုပ်နယ်မြေဖြစ်တဲ့ ဒူးပလာယာခရိုင် ကော့ကရိတ်မြို့နယ်ထဲကို စစ်ကောင်စီနဲ့ နယ်ခြားစောင့်တပ်(BGF)ပူးပေါင်းတပ်တွေက စစ်ရေးဝင်ရောက်လှုပ်ရှားနေတဲ့အတွက် ပြီးခဲ့တဲ့ရက်ပိုင်းကစပြီး နယ်မြေခံ KNLA တပ်မဟာ ၆ နဲ့ ထိတွေ့ပစ်ခတ်မှုဖြစ်ပွားခဲ့တာပါ။
ထိတွေ့တိုက်ပွဲတွေဟာ အံဖကြီး အံဖလေးနဲ့ ဖန်ခါးကုန်းရွာတွေကြားမှာ ဖြစ်ပွားနေတာဖြစ်တယ်လို့ ဒေသခံတွေက ပြောကြပါတယ်။
“စပြီး အလုံးသေးရော အလုံးကြီးရော ထုနေပြီး”လို့ ကော့ကရိတ်တောင်ပိုင်း ဒေသခံတစ်ဦးက ပြောပါတယ်။
Public Service Announcement
ဒီကနေ့ မတ်လ ၂၁ ရက် မနက် ၇ နာရီကျော်အချိန်က ကော့ကရိတ်တောင်ပိုင်းက ကျေးရွာတွေမှာ လက်နက်ကြီးလက်နက်ငယ်သံတွေ ထပ်မံကြားနေရပြီး စစ်ရေးတင်းမာမှုတွေကြောင့် ဒေသခံပြည်သူတွေ တိမ်းရှောင်နေရတယ်လို့ သိရပါတယ်။
ကေအဲန်ယူ ဒူးပလာယာခရိုင် ကော့ကရိတ်မြို့နယ်ထဲက စစ်ကောင်စီလက်အောက်ခံ ဌာနဆိုင်ရာဝန်ထမ်းတွေအားလုံး ထွက်ခွာကြဖို့နဲ့ မြို့ခံဝန်ထမ်းတွေအနေနဲ့ စစ်ကောင်စီလက်အောက်ကနေ တာဝန်ထမ်းဆောင်နေခြင်းကနေ နှုတ်ထွက်ကြဖို့ လိုက်နာမှုမရှိပါက ဖြစ်ပေါ်လာတဲ့အကျိုးဆက်တွေကို တာဝန်ယူမှာမဟုတ်ဘူးလို့ ကေအဲန်ယူ ကော့ကရိတ်မြို့နယ် အမြဲတမ်းကော်မတီက ပြီးခဲ့တဲ့ မတ်လ ၁၇ ရက်နေ့က စာထုတ်ပြန်ထားပါသေးတယ်။
