ရိုဟင်ဂျာများအပေါ် လူမျိုးသုဉ်းသတ်ဖြတ်မှု (genocide)နှင့် လူသားမျိုးနွယ်ကို ဆန့်ကျင်သောရာဇဝတ်မှုများ(crimes against humanity)ကို မြန်မာစစ်တပ်ကျူးလွန်ခဲ့ကြောင်း အမေရိကန် အစိုးရက ယနေ့တရားဝင်ကြေငြာမည်ဟု CNN သတင်းဌာနက ဖော်ပြ သည်။
နှစ်ပေါင်းများစွာကြာ လူ့အခွင့်အရေးအဖွဲ့များတောင်းဆိုနေခဲ့သော အထက်ပါ ဆုံးဖြတ်ချက်ကို အမေရိကန်နိုင်ငံခြားရေးဝန်ကြီး အန်တိုနီဘလင်ကန်က ဝါရှင်တန်မြို့တော်ရှိ US Holocaust Memorial Museum ၌ လူသိရှင်ကြားထုတ်ပြန်ကြေညာမည်ဟု ဆိုသည်။
“နောက်ဆုံးမှာ ရိုဟင်ဂျာတွေအပေါ်ကျူးလွန်ခဲ့တဲ့ရက်စက်ယုတ်မာမှုတွေကို ဂျီနိုဆိုက်အဖြစ် သတ်မှတ်ခဲ့တာအတွက် ဘိုင်ဒန်အစိုးရကို ကျွန်တော်ချီးကျူးပါတယ်။ ဒီဆုံးဖြတ်ချက်ဟာ အချိန် နှောင်းနေပြီဖြစ်ပေမယ့် ဒီလူမဆန်တဲ့(စစ်)အစိုးရကို အရေးယူဖို့ အားကောင်းပြီး အလွန်အရေး ကြီးတဲ့ခြေလှမ်းဖြစ်ပါတယ်”ဟု အမေရိကန်အထက်လွှတ်တော်နိုင်ငံခြားရေးကော်မတီဝင် ဂျက်ဖ်မက်ကလီက ပြောသည်။
၂၀၁၈ တွင် အမေရိကန်နိုင်ငံခြားရေးဝန်ကြီးဌာနက တိတ်တဆိတ်ထုတ်ပြန်ခဲ့သော အစီရင်ခံစာ ၌ ‘ရခိုင်ပြည်နယ်မြောက်ပိုင်းရှိ ရိုဟင်ဂျာများအပေါ် အကြမ်းဖက်မှုသည် ပြင်းထန်စွာ၊ ကြီးမားကျယ်ပြန့်စွာ၊ လူထုကို အကြမ်းဖက်ပြီး ဌာနေရိုဟင်ဂျာများကို မောင်းထုတ်ခြင်း သက်ရောက်ခဲ့ကြောင်း’ ဖော်ပြထားသည်။
Public Service Announcement
အဆိုပါ လူ့အခွင့်အရေးချိုးဖောက်မှုများအတွက် တာဝန်ရှိမှုဖြင့် စစ်ခေါင်းဆောင်မင်းအောင်လှိုင်အပါအဝင် စစ်တပ်ထိပ်တန်းအရာရှိများကို အမေရိကန်နိုင်ငံခြားရေးဝန်ကြီးဌာနက ပိတ်ဆို့ ဒဏ်ခတ်အရေးယူခဲ့သည်။
