နှစ်ဆန်းတစ်ရက်မှာ ပြန်ဖွင့်ဖို့လုပ်နေတဲ့ ရုပ်ရှင်ရုံတွေမှာ လောလောလတ်လတ် အကျဥ်းထောင်ထဲက လွတ်လာတဲ့ အနုပညာရှင်တွေရဲ့ ဇာတ်ကားတွေကိုပဲ ဆက်တိုက်ရုံတင်ဖို့ ပြင်ဆင်နေတာတွေ့ရပါတယ်။
နှစ်ဆန်းတစ်ရက် ဧပြီ ၁၇ တွင် လူမင်း၊ နေမင်း၊ ရွှေမှုန်ရတီ တို့ပါဝင်သရုပ်ဆောင်ထားတဲ့ ဝေးမနေချင်ဘူးဇာတ်ကားကိုစပြသမှာဖြစ်ပြီးတော့ ဧပြီ ၂၉ မှာတော့ ပြေတီဦးနဲ့ဖွေးဖွေးတို့ ပါဝင်ထားတဲ့ လိပ်ပြာထောင်ချောက်၊ မေ ၆ ရက်မှာ ပိုင်တံခွန်နဲ့ အိချောပို တို့ပါဝင်သရုပ်ဆောင်ထားတဲ့ အမှောင်တိုက်၊ မေ ၁၃ မှာတော့ ပြေတီဦးနဲ့ ဝတ်မှုံရွှေရည်တို့ပါဝင်သရုပ်ဆောင်ထားတဲ့ ရွာဂေါ်၊ မေ ၂၀ မှာ အောင်ရဲလင်းနဲ့ အိန္ဒြာကျော်ဇင်တို့ပါဝင်သရုပ်ဆောင်ထားတဲ့ အချိုဆုံးအချစ် အပြင်းဆုံးမေတ္တာနဲ့ မေ၂၇ မှာ ပြေတီဦး ၊ မနော၊ ခိုင်သင်းကြည်၊ သင်ဇာဝင့်ကျော်တို့ပါဝင်ထားတဲ့ ကမောက်ကမ သမီးယောက်မ ဇာတ်ကားတွေ ရုံတင်မှာဖြစ်တယ်လို့ သိရပါတယ်။
ရုံတင်မယ့် ရုပ်ရှင်ဇာတ်ကားတွေမှာ ထိပ်တန်းသရုပ်ဆောင်နှစ်ဦးဖြစ်တဲ့ နေတိုး၊မြင့်မြတ်တို့ ဇာတ်ကားများ ပါဝင်ခြင်းမရှိတာကို တွေ့ရပါတယ်။
ကိုဗစ်ကြောင့် ရုပ်ရှင်တွေပိတ်ခဲ့တဲ့အချိန်က တန်းစီဇယားအရ ရုံတင်ရမယ့် ရုပ်ရှင်က မြင့်မြတ်နဲ့ ယုန်လေးတို့ပါဝင်သရုပ်ဆောင်ထားတဲ့ အော်ရဂျင်နယ်ဂန်းစတား ဇာတ်ကားဖြစ်ပေမယ့် ရုံတင်မယ့် ဇာတ်ကားစာရင်းမှာ ပါဝင်ခဲ့ခြင်းမရှိပါဘူး။
စဖွင့်ချိန်မှာပြမယ့်ရုပ်ရှင်ရုံတင်ကားတွေကို မတရားပုဒ်မတပ်ကာ ပြစ်ဒဏ်ကျခံခဲ့ရတဲ့ အနုပညာရှင်တွေရဲ့ ဇာတ်ကားတွေကိုသာ ရွေးချယ်ထားတာတွေ့ရပါတယ်။
ရုပ်ရှင်ရုံတွေပြန်ဖွင့်ရင် Social Punishment လုပ်တဲ့အနေနဲ့ မကြည့်ဖို့ တောင်းဆိုမှုတွေ တလျောက်လုံးရှိနေခဲ့တာပါ။
ဒါကြောင့် စစ်ကောင်စီက ပြည်သူဘက်ရပ်တည်ခဲ့တဲ့ အနုပညာရှင်တွေပါဝင်သရုပ် ဆောင်ထားတဲ့ ဇာတ်ကားတွေကိုရွေးချယ်ခြင်းဖြစ်နိုင်ကြောင်း ပရိသတ်တစ်ဦးက မှတ်ချက်ပြုပါတယ်။
ရုပ်ရှင်ရုံများကို မြန်မာနိုင်ငံမှာ ကိုဗစ်စတင်တွေ့ခဲ့တဲ့ ၂၀၂၀ မတ်လကတည်းက ပိတ်ထားခဲ့ခြင်းဖြစ်ပါတယ်။