နိုင်ငံအဝှမ်း ဆင်နွှဲနေတဲ့လူထုရဲ့တော်လှန်သင်္ကြန်သပိတ်ဟာ မြန်မာနိုင်ငံ ပုံမှန်အတိုင်းလည်ပတ်နေကြောင်း နိုင်ငံတကာကိုပြသချင်နေတဲ့ စစ်ကောင်စီရဲ့ ကြိုးပမ်းချက်ကို ကောင်းကောင်းချေဖျက်နိုင်ခဲ့တယ်လို့ ထုတ်ဖော်ချီးကျုးလာကြပါတယ်။
ကုလသမဂ္ဂရေးရာကျွမ်းကျင်သူတွေနဲ့ဖွဲ့စည်းထားတဲ့ မြန်မာနိုင်ငံဆိုင်ရာအထူးအကြံပေး ကောင်စီ(SAC -M) ကမြန်မာပြည်သူတွေကို ချီးကျုးလာတာပါ။
မဟာသင်္ကြန်ကာလအတွင်းစစ်အုပ်စုရဲ့ သင်္ကြန်မှာမပါဝင်တဲ့ မြန်မာပြည်သူတွေရဲ့ သပိတ်ဟာ ဒီမိုကရေစီအရေးအတွက် ကြံကြံခံနိုင်ရည်စွမ်းရှိတယ်ဆိုတာကို အင်အားကောင်းကောင်းနဲ့ပြသလိုက်တဲ့သတင်းစကားဖြစ်တယ်လို့လည်း SAC-M ရဲ့ ဒီနေ့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီဟာ အာဏာသိမ်းထားတဲ့ မြန်မာနိုင်ငံ ပုံမှန်အခြေအနေ ပြန်ရောက်နေပြီလို့ နိုင်ငံတကာကို မီးမောင်းထိုးပြသနိုင်ဖို့ သင်္ကြန်ကာလမှာ ကြိုးပမ်းခဲ့ပေမယ့် ဒါကို လူထုဟာ ကြံကြံခံရင်ဆိုင်နိုင်ခဲ့တယ်လို့ SAC-M ကဆိုပါတယ်။
Public Service Announcement
စစ်ကောင်စီဟာ ရိုးရာ သင်္ကြန်ပွဲကို စည်စည်ကားကားဖြစ်အောင် နည်းလမ်းပေါင်းစုံနဲ့စီစဉ်ထားပြီး ဝန်ထမ်းတွေကိုပါ ဖိအားပေး ပါဝင်ဆင်နွှဲခိုင်းထားတာပါ။
ဒါပေမယ့် လူထုဟာ သင်္ကြန်ကာလမှာ ပါဝင်ဆင်နွှဲခြင်းမပြုဘဲ လမ်းမတွေပေါ် လူသူကင်းမဲ့သွားအောင် သပိတ်မှောက်လိုက်ကြပါတယ်။
ဒါဟာ ဒီမိုကရေစီအရေးအတွက် ဆက်လက်တိုက်ပွဲဝင်သွားမယ်ဆိုတဲ့ ကတိကဝတ်ကို မြန်မာပြည်သူတွေက ထပ်လောင်းပြသလိုက်တာလို့ SAC -M အဖွဲ့ဝင်တစ်ဦးဖြစ်တဲ့ Chris Sidoti ကပြောပါတယ်။
“စစ်တပ်က တိုင်းပြည်အခြေအနေပုံမှန်အတိုင်းဖြစ်နေပြီလို့ ပြချင်တယ်၊ ပြည်သူတွေရဲ့သပိတ်ကတော့ ဒါ တကယ့်မဟုတ်ဘူးလို့ ရှင်းရှင်းလင်းလင်းပြောပြနေတာပဲ” လို့ Chris Sidoti ကဆိုပါတယ်။
ဒါကြောင့် မြန်မာနှစ်သစ်ကူးမှာ နိုင်ငံတကာ အနေနဲ့အမျိုးသားညီညွှတ်ရေးအစိုးရ(NUG ) ကို မြန်မာနိုင်ငံရဲ့တရားဝင်အစိုးရအဖြစ် အသိအမှတ်ပြုရေးနောက်ဆုံးခြေလှမ်း လှမ်းကြဖို့ SAC -M က ထပ်မံတိုက်တွန်းတာတွေ့ရပါတယ်။
NUG ဟာ နိုင်ငံတကာ စံနှုန်းတွေအရ မြန်မာနိုင်ငံရဲ့ တရားဝင်အစိုးရအဖြစ် အသိအမှတ်ပြုဖို့ ထိုက်တန်ပြီး နိုင်ငံတကာအနေနဲ့ NUG ကို နိုင်ငံရေးနဲ့ ဘဏ္ဍာရေးဆိုင်ရာအထောက်အပံ့တွေ တိုးမြှင့်ပေးသင့်တယ်လို့ SAC-M က ဆိုထားပါတယ်။
စစ်ကောင်စီကို ဖြတ်သုံးဖြတ်နည်းနဲ့ ဆက်လက်အရေးယူပေးဖို့ လည်းSAC -M က နိုင်ငံတကာကိုတောင်းဆိုထားပါသေးတယ်။
အဲဒီနည်းလမ်းတွေကတော့ စစ်ကောင်စီကို စစ်လက်နက်ပစ္စည်းထောက်ပံ့တာတွေဖြတ်တောက်ဖို့ ၊ စစ်အုပ်စုအကြီးအကဲတွေနဲ့ စစ်တပ်ဆက်နွယ်တဲ့စီးပွားရေး လုပ်ငန်းတွေကို ဒဏ်ခတ်အရေးယူဖို့ ၊စစ်အုပ်စုကျုးလွန်မှုတွေကို နိုင်ငံတကာရာဇဝတ်ခုံရုံး (ICC) ကိုလွှဲပြောင်းပေးဖို့တွေဖြစ်ပါတယ်။
စစ်အုပ်စုဟာ ဒီနှစ်သင်္ကြန်ကို စည်စည်ကားကားကျင်းပနိုင်အောင် ကြိုတင်စီစဉ်ထားခဲ့တာပါ။
မြန်မာနိုင်ငံရဲ့ အဓိက မြို့ကြီးတွေဖြစ်တဲ့ ရန်ကုန်၊မန္တလေး ၊ နေပြည်တော်တွေမှာ သင်္ကြန်မကျခင် မတ်လကတည်းက မဏ္ဍပ်တွေကို ဆောက်လုပ်ခဲ့ပါတယ်။
အရပ်သားအစိုးရ NLD လက်ထက်က ကျင်းပခဲ့တဲ့ လမ်းလျှောက်သင်္ကြန်ကို လည်း ဒီနှစ်သင်္ကြန်မှာ စစ်ကောင်စီက ထည့်သွင်းကျင်းပခဲ့ပါသေးတယ်။
ဒါပေမယ့် သင်္ကြန်မကျခင်ကတည်းက တော်လှန်ရေးအင်အားစုတွေက ဒီသင်္ကြန်ဟာ လူထုကိုအခြေမခံတဲ့သင်္ကြန်ဖြစ်ပြီး တော်လှန်ရေးအင်အားပျော့သွားအောင် ၊ နိုင်ငံတကာကို မြန်မာ နိုင်ငံပုံမှန်အတိုင်း ဖြစ်သယောင် ပြသဖို့ ကျင်းပတဲ့ အတုအယောင် သင်္ကြန်သာဖြစ်တယ်လို့ အသိပေးထုတ်ပြန်ထားခဲ့ပါတယ်။
ဒါကြောင့် တော်လှန်သင်္ကြန်အဖြစ်သာ ဆင်နွှဲကြဖို့ တိုက်တွန်းထားကြပါတယ်။
လူထုကလည်း မနှစ်က သင်္ကြန်လိုပဲ ဒီနှစ်သင်္ကြန်ကို တော်လှန်သင်္ကြန်အဖြစ် ဆက်ဆင်နွှဲကြပါတယ်။
ဒါကြောင့် သင်္ကြန်အကြတ်နေ့ရောက်လာချိန်မှာတောင် စစ်အုပ်စုရုံးစိုက်တဲ့ နေပြည်တော် ကမဏ္ဍပ်တွေမှာ လူမရှိတာကိုတွေ့မြင်ရမှာဖြစ်သလို အခြားဒေသအများစုမှာတော့ရေကစားသူမရှိသလောက်ဖြစ်နေပါတယ်။
ရန်ကုန်တိုင်းအတွင်းက ဆင်ခြေဖုန်းမြို့မှာနေထိုင်တဲ့ အမျိုးသမီး ပြည်သူတစ်ဦးကဆို ဒီနှစ်သင်္ကြန်မှာ “ကလေးတွေတောင်ရေမကစားဘူး” လို့ တွေ့မြင်ရတာကိုပြောပြပါတယ်။
