'/%3E%3C/svg%3E){kind=small}
▪️ရဲဘော်တစ်ဦးလျှင် ဆန်တစ်အိတ်၊ ဆီတစ်ပုံး၊ ခေါက်ဆွဲခြောက် တစ်ဖာထောက်ပံ့
ပြည်သူ့ကာကွယ်ရေးတပ် – လွိုင်ကော် (၁)နှစ်ပြည့်အထိမ်းအမှတ်အဖြစ် ရဲဘော်များကို ခေတ္တအိမ်ပြန်နှုတ်ဆက်ခွင့်ပေးခဲ့ကြောင်း ယနေ့(ဇူလိုင် ၅) အသိပေးထုတ်ပြန်သည်။
အဆိုပါ အိမ်ပြန်နှုတ်ဆက်ခရီးတွင် ရဲဘော်တစ်ဦးလျှင် ဆန်တစ်အိတ်၊ ဆီတစ်ပုံး၊ ခေါက်ဆွဲခြောက်တစ်ဖာတို့အား မိသားစုထံ ထောက်ပံ့ပေးခဲ့သည်ဟု ဖော်ပြသည်။
“တပ်ရင်းမှာ တာဝန်ထမ်းဆောင်ခဲ့ဖူးသူ၊ တာဝန်ထမ်းဆောင်ဆဲစတဲ့ ရဲဘော်များအားလုံးရဲ့ မိသားစုများအားလုံးကို ကူညီပံ့ပိုးခဲ့တာဖြစ်ပြီး အိမ်မပြန်ရတာ ကြာပြီဖြစ်တဲ့ ရဲဘော်များကိုလည်း ပစ္စည်းတွေပို့ရင်း အိမ်ပြန်လို့မိဘတွေကို ပြန်နှုတ်ဆက်ခွင့်ပေးခဲ့ပါတယ်”ဟု လွိုင်ကော် PDF က ပြောသည်။
ဆက်လက်၍ “အိမ်မရောက်တာ ကြာပြီဖြစ်တဲ့ ရဲဘော်တွေဟာ သူတို့အိမ်ရိပ်ကို ခဏခိုလှုံခွင့်ရခဲ့ကြတယ်။ ချစ်တဲ့ မိသားစုတွေနဲ့ ခဏတာ ပြန်ဆုံဖြစ်ကြတယ်။ အမေ၊အဖေ ရဲ့ ရင်ခွင်ထဲခဏလေး ပြန်ရောက်ကြတဲ့ ရင်သွေးငယ်တွေ ပြန်ဖြစ်ခဲ့ကြတယ်။ ရဲဘော်တချို့ဆို အသက် ၁၈ နှစ်၊ ၁၉ နှစ် ပဲ ရှိသေးတယ်မဟုတ်လား”ဟု ထိုအဖွဲ့က ရှင်းပြသည်။
Public Service Announcement
အချို့ရဲဘော်များသည် မိဘများကို ဆန်၊ဆီ များ ဖြင့်ကန်တော့ကြပြီး အချို့ရဲဘော်များမှာ စစ်ရှောင်စခန်းများအတွက် ပြန်လှူပေးကြသည်ဟု ဆိုသည်။
အရေးတော်ပုံအောင်မှ အိမ်အပြီးပြန်မည်ဟုဆုံးဖြတ်ထားသည့် ရဲဘော်များသည် နာရီပိုင်းသာ အိမ်မှာနေကြ၊ နှုတ်ဆက်ကြ၊ ကန်တော့ကြ၊ ဆုတောင်းကြပြီး တစ်ခါ ရှေ့တန်းသို့ ပြန်ထွက်ခွာလာကြပြီး မိဘများမှာ သား၊သမီးများ၏ ကျောပြင်ကိုကြည့်ရင်း အိမ်မှာ ကျန်ရစ်ခဲ့ကြပြန်သည်ဟု ဖော်ပြထားသည်။
“လွိုင်ကော် PDF ဟာ တကယ်တော့ ၁၈.၅.၂၂ နေ့မှာ တစ်နှစ်ပြည့်တာ ဖြစ်ပါတယ်။ အကြောင်းအမျိုးမျိုးကြောင့် အခုချိန်မှ အခုအစီစဉ်ကို ပြန်လည်အကောင်အထည် ဖော်နိုင်ခြင်း ဖြစ်ပါတယ်”ဟု အသိပေးသည်။
လွိုင်ကော် PDF (၁)နှစ်ပြည့်အတွက် ဆုတောင်းပေးကြ၊ စာလွှာပေးပို့ကြသော လူပုဂ္ဂိုလ်အဖွဲ့အစည်းအားလုံးကို ကျေးဇူးအထူးတင်ကြောင်းနှင့် ပြည်သူများအားလုံးလည်း ကိုယ်စိတ် ကျန်းမာခြင်းကိုလည်း ဂရုပြုကြရင်း တော်လှန်ရေးအတွက် ရှေးရှုကာ တစ်လုံးတစ်စည်းတည်း တညီတညွှတ်တည်း အတူတိုက်ပွဲဝင်ကြရန် လွိုင်ကော် PDFက မေတ္တာရပ်ခံ ဆော်ဩထားသည်။
ခွင့်ရ၍ အိမ်ခဏပြန်PDF တပ်ဖွဲ့ဝင်များသည် ယခုအခါတပ်ရင်းသို့ပြန်ရောက်နေကြပြီဖြစ်ပြီး လုံခြုံရေးအတွက် ၎င်းတို့ပြန်ရောက်ပြီးမှ အချိန်ကာလတစ်ခုခြား၍ သတင်းထုတ်ပြန်ပေးခြင်းဖြစ်ကြောင်း လွိုင်ကော်PDF ကပြောသည်။
