PDF-KNU Kyaukkyi Facebook စာမျက်နှာသည် KNUနှင့် လုံးဝပတ်သက်မှုမရှိဟု အသိပေးထုတ်ပြန်

စစ်ရေးသတင်းများ ဖော်ပြပြီး အလှူငွေများ လက်ခံနေသည့် PDF-KNU Kyaukkyi Facebook စာမျက်နှာနှင့်ပတ်သက်ပြီး ကရင်အမျိုးသားအစည်းအရုံး(KNU)က ၎င်းတို့နှင့် လုံး၀ ပတ်သက်မှုမရှိကြောင်း ပြည်သူလူထုအား အသိပေးထုတ်ပြန်ခဲ့သည်။

အဆိုပါ PDF-KNU Kyaukkyi အမည်ရှိ Facebook စာမျက်နှာသည် ကရင်အမျိုးသားအစည်းအရုံး(KNU)နယ်မြေ ညောင်လေးပင်ခရိုင် အတွင်း စစ်ရေး အခြေအနေများကို ဖော်ပြနေပြီး တစ်ဖက်တွင်လည်း ပြည်တွင်း ပြည်ပ ပြည်သူလူထုများက လှူဒါန်းသည့် အလှူငွေများ လက်ခံရရှိကြောင်း အသိပေးဖော်ပြလျက်ရှိသည်ကို​တွေ့ရသည်။

ယင်း Facebook စာမျက်နှာအနေဖြင့် အခြား သတင်းဌာနက ဖော်ပြသည့် စစ်ရေးသတင်းများ၊ KNUက ထုတ်ပြန်သည့် စစ်ရေးသတင်းများကို ကူးယူ ဖော်ပြခြင်းများ ပြုလုပ်ခဲ့သည်။

စစ်ဘေးရှောင်များအတွက်လည်း အလှူခံနေကြောင်းကိုလည်း အဆိုပါ Facebook စာမျက်နှာမှ တစ်ဆင့် ပြုလုပ်လျက်ရှိသည်။

Public Service Announcement

KNU အနေဖြင့် ယခင်ကလည်း အဆိုပါ PDF-KNU Kyaukkyi (ယခင်က KNU-PDF Kyaukkyi) အမည်ရှိ Facebook စာမျက်နှာနှင့်ပတ်သက်ပြီး အသိပေးချက်ထုတ်ပြန်ထားပြီး ၎င်း စာမျက်နှာမှ တဆင့် အလှူခံနေခြင်းအပေါ် ကန့်ကွက်ရှုတ်ချကာ အရေးယူနိုင်ရေး ဆောင်ရွက်သွားမည်ဟု အသိပေးခဲ့ဖူးသည်။