လက်တွေ့လုပ်ဆောင်မည့်ကိစ္စရပ်များ စတင်တော့မည်ဟု ကေအဲန်ယူနှင့် အန်အယ်လ်ဒီအကြား သဘောတူညီမှုရ

ကေအဲန်ယူ(ကရင်အမျိုးသားအစည်းအရုံး)နှင့် အန်အယ်လ်ဒီ ဗဟိုအလုပ်ကော်မတီတို့သည် ယမန်နေ့တွင် ထပ်မံတွေ့ဆုံခဲ့ပြီး လက်တွေ့လုပ်ဆောင်မည့်ကိစ္စရပ်များ စတင်တော့မည်ဟု သိရသည်။

ကေအဲန်ယူနှင့် အန်အယ်လ်ဒီတို့အကြား စတုတ္ထအကြိမ်တွေ့ဆုံမှုဖြစ်ပြီး မြန်မာ့နိုင်ငံရေးလတ်တလောအခြေအနေများနှင့် နိုင်ငံတကာဆက်ဆံရေးဆိုင်ရာ ရှေ့လုပ်ငန်းစဉ်များကို ပူးပေါင်းဆောင်ရွက်နိုင်ရန် ဆွေးနွေးခဲ့သည်ဟု ဆိုသည်။

“လတ်တလောနိုင်ငံရေးအခြေအနေများအပေါ် အခြေခံပြီး နိုင်ငံတကာနဲ့ ထိတွေ့ဆက်ဆံမှုကိစ္စရပ်တွေနဲ့ပတ်သက်ပြီးလက်တွဲလုပ်ကြမယ်ဆိုပြီးတော့ သဘောတူခဲ့ကြပါတယ်။ ဒီတစ်ခေါက်မှာ ထူးခြားတာကတော့ တကယ်လက်တွေ့လုပ်မယ့်ဟာတွေ စတော့မယ်ဆိုတဲ့သဘောမျိုးလို့ ပြောလို့ရပါတယ်” ဟု အန်အယ်လ်ဒီလွှတ်တော်ကိုယ်စားလှယ်တစ်ဦးက ပြောသည်။

အထက်ပါအစည်းအဝေးသို့ ကေအဲန်ယူ ဒုတိယဥက္ကဋ္ဌ ပဒိုစောကွယ်ထူးဝင်း ၊ အထွေထွေအတွင်းရေးမှူးချုပ် ပဒိုစောတာဒိုမူး နှင့် အမြဲတမ်းဗဟိုကော်မတီဝင်များဖြစ်သော ပဒိုစောတောနီး၊ ပဒိုစောတာနာထူးစော၊ ပဒိုစောအဲကလူစေး၊ အန်အယ်လ်ဒီ ဗဟိုအလုပ်ကော်မတီမှ ဦးအောင်ကြည်ညွန့်၊ ဒေါက်တာမေဝင်းမြင့်၊ ဒေါက်တာခင်ဆောင်၊ ဦးထွန်းမြင့်၊ ဦးကျော်ထွေး ၊ ဦးမျိုးနိုင် တို့တက်ရောက်ခဲ့ကြောင်း သိရသည်။

Public Service Announcement