နွေဦးထီကိုပြည်သူတွေအားပေးနေချိန်မှာ အောင်ဘာလေထီဆုငွေပမာဏတိုးမြှင့်လိုက်တဲ့ စစ်ကောင်စီ

အမျိုးသားညီညွှတ်ရေးအစိုးရရဲ့ နွေဦးထီ ကို ပြည်သူတွေ အလုအယက်အားပေးနေကြတဲ့အချိန်မှာ စစ်ကောင်စီဟာ အောင်ဘာလေထီဆုကြေးကို တိုးမြှင့်လိုက်သလို ဆုကြေးကိုလည်းအပြည့်ထုတ်ယူနိုင်မယ်လို့ကြေညာလာပါတယ်။

အွန်လိုင်းကနေ ရောင်းချတဲ့ နွေဦးထီကို ပြည်သူတွေရဲ့အားပေးမှု မြင့်တက်လာပြီးတဲ့နောက် စစ်ကောင်စီ က သူတို့ ရဲ့ ထီဆုကြေးကို တိုးမြှင့်လာတာလည်းဖြစ်ပါတယ်။

ယခင်က ထီစောင်ရေ ရောင်းရငွေရဲ့ ၆၀ ရာခိုင်နှုန်းကို ဆုကြေးပြန်ပေးခဲ့ရာကနေ အခုတော့ လာမယ့် စက်တင်ဘာလ ၁ ရက်ထီဖွင့်ပွဲကစပြီး ၇၀ ရာခိုင်နှုန်းအထိ ဆုကြေးပေးမယ်လို့ ကြေညာလာတာပါ။

ဒါအပြင် ကျပ်သိန်း ၅၀၀ အထိ ဆုကြေးကိုသာ တလုံးတခဲတည်းထုတ်ပေးရာကနေ အခုတော့ ဆုကြေးအားလုံးကို အပြည့် ထုတ်ယူနိုင်မယ်လို့ လည်းဆိုထားပါတယ်။

Public Service Announcement

ဒါပေမယ့် စစ်အာဏာသိမ်း တာကိုဆန့်ကျင့်တဲ့အနေနဲ့ စစ်ကောင်စီ အခွန်ငွေ မရဖို့ ထီမထိုးရေး လှုံဆော်မှုတွေကြောင့် မြေပြင်မှာတော့ စစ်ကောင်စီရဲ့ထီ ထိုးမယ့်သူဟာမရှိသလောက်နည်းပါးနေတာကိုတွေ့ရပါတယ်။

ဒီလိုထီထိုးသူဦးရေ ကျဆင်းလာတာကြောင့် စစ်အာဏာမသိမ်းခင် က အမြင့်ဆုံးဆု ကျပ်သိန်းတစ်သောင်းခွဲ ချီးမြှင့်ခဲ့ပေမယ့် အာဏာသိမ်းပြီးတဲ့နောက်မှာတော့ အမြင့်ဆုံးဆုကို ကျပ်သိန်းငါးထောင်ဆုသာ ချီးမြှင့်နိုင်တဲ့အခြေအနေ ဖြစ်ခဲ့တာပါ။

ထီလက်မှတ်တွေမကုန်တဲ့အတွက် စစ်ကောင်စီဟာ ထီဖွင့်ရက်တွေကိုလည်း ရက်ရွှေ့ခဲ့ရတာတွေလည်းရှိခဲ့ပါတယ်။