အမျိုးသားညီညွတ်ရေးအစိုးရ(NUG)၏ လူသားချင်းစာနထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန ဒုတိယဝန်ကြီးအဖြစ် ဒေါက်တာငိုင်းတမ်မောင်းကို ခန့်အပ်တာဝန်ပေးလိုက်ကြောင်း ပြည်ထောင်စုလွှတ်တော်ကိုယ်စားပြုကော်မတီ(CRPH)က ယနေ့ ကြေညာသည်။
ဖက်ဒရယ် ဒီမိုကရေစီပဋိဉာဉ်အရ ဒေါက်တာငိုင်းတမ်မောင်းအား ဒုဝန်ကြီးအဖြစ် တာဝန်ပေးအပ်ခဲ့ခြင်းဖြစ်သည်ဟု ဖော်ပြထားသည်။
ဒေါက်တာငိုင်းတမ်မောင်းသည် ချင်းပြည်နယ် မင်းတပ်မြို့နယ် အမျိုးသားဒီမိုကရေစီအဖွဲ့ချုပ်(NLD) ပါတီမှ ၂၀၂၀ ရွေးကောက်ပွဲအနိုင်ရ အမျိုးသားလွှတ်တော်အမတ်ဖြစ်သည်။
ဒေါက်တာငိုင်းတမ်မောင်းသည် မင်းတပ်မြို့နယ်ပြည်သူ့အုပ်ချုပ်ရေးအဖွဲ့၏ နာယကတစ်ဦးလည်းဖြစ်ပြီး ဒုဝန်ကြီးအဖြစ် ခန့်အပ်ခံရခြင်းကိုဂုဏ်ယူကြောင်း မင်းတပ်(ပအဖ)က ထုတ်ပြန်ထားသည်။
Public Service Announcement
အဆိုပါ ဝန်ကြီးဌာန၏ ပြည်ထောင်စုဝန်ကြီးမှာ ယခင်လူကယ်ပြန်ဝန်ကြီး ဒေါက်တာဝင်းမြတ်အေးဖြစ်ပြီး ဝန်ကြီးဌာနအနေဖြင့် အာဏာသိမ်းစစ်ကောင်စီ၏ အကြမ်းဖက်မှုများကြောင့် စစ်ဘေး၊ မီးဘေးကြုံနေရသည့် ပြည်သူလူထုများကို လူသားချင်းစာနမှု အကူအညီများ ပံ့ပိုးပေးလျက်ရှိသည်။
