CDMအားလုံးကို ကူညီပေးနိုင်ရေး ဝိုင်းဝန်းကြိုးပမ်းအားထုတ်ကြရန် NUG ပြည်ထောင်စုဝန်ကြီးချုပ် တိုက်တွန်း

တော်လှန်ရေးအတွက်များစွာ အရေးပါသည့် ထောက်တိုင်တစ်ခုဖြစ်သော CDMဝန်ထမ်းများ အားလုံးကို ကူညီပေးနိုင်ရေး ဝိုင်းဝန်းကြိုးပမ်းအားထုတ်ပေးကြရန် ယနေ့ကျင်းပသည့် အမျိုးသားညီညွတ်ရေးအစိုးရ(NUG)အစိုးရအဖွဲ့အစည်း အဝေး၌ပြည်ထောင်စုဝန်ကြီးချုပ်မန်းဝင်းခိုင်သန်းက ပြောကြားသည်။

CDM များအတွက် အထောက်အပံ့ပေးနိုင်ရေးအတွက် အစိုးရမဖွဲ့ခင်တကည်းကပြည်ထောင်စုလွှတ်တော် ကိုယ်စားပြုကော်မတီအနေဖြင့် ကြိုးပမ်းဆောင်ရွက်ခဲ့ပြီး အမျိုးသားညီညွတ်ရေး အစိုးရဖွဲ့စည်းပြီးနောက်ပိုင်း၌လည်း CDMများအတွက် ကဏ္ဍစုံက စဉ်းစားဆွေးနွေးစီမံနိုင်ရန် အားထုတ်ခဲ့သည်ဟု ၎င်းက ဆိုသည်။

“အားလုံးသိတဲ့အတိုင်း နိုင်ငံတကာက လူသားစာနာအကူအညီမျိုးတွေ မရဘဲနဲ့တော့ကျွန်တော်တို့ သူရဲကောင်း CDM တွေအားလုံးကို ကူညီပေးနိုင်ဖို့ အခက်အခဲတွေဖြစ်နေရဦးမှာပါပဲ။ ဒါကြောင့် ဒီနည်းလမ်းနဲ့မရရင် နောက်နည်းလမ်းသုံးပြီး ဝိုင်းဝန်းကြိုးစားအားထုတ်ပေးကြဖို့ တိုက်တွန်းလိုပါတယ်”ဟု ဝန်ကြီးချုပ်က ပြောကြားသည်။

နောက်ပိုင်းတွင် ပြည်နယ်အစိုးရများ ပေါ်ပေါက် လာပြီး စိုးမိုးထိန်းချုပ်နယ်မြေများစွာ ရှိလာပါက အစိုးရ၏ အုပ်ချုပ်ရေးအင်အားကို အကောင်အထည်ဖော်နိုင်ရန် CDM များ၏ အင်အားများစွာ လိုအပ်လာမည်ဟု ၎င်းက ဆိုသည်။

Public Service Announcement

ယင်းအစည်းအဝေး၌ နိုင်ငံခြားရေးဝန်ကြီးဌာနက လူသားချင်းစာနာထောက်ထားမှုဆိုင်ရာ အကူအညီပေးရေး အေဂျင်စီများနှင့် ဆက်သွယ်ဆောင်ရွက်ရန် ကိစ္စများတင်ပြခဲ့သည်ဟု ထုတ်ပြန်ခဲ့သည်။