စစ်ကိုင်းတိုင်း၊ မုံရွာခရိုင်အတွင်းရှိ မုံရွာ-ချောင်းဦးလမ်းအပါအဝင် လမ်းပိုင်း၃ ခုအား ယနေ့ညနေပိုင်းမှစတင်ကာ ဖြတ်သန်းသွားလာခြင်းမပြုရန် ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့က သတိပေးကြေညာသည်။
လမ်းပိုင်းယာယီပိတ်သည့်သတိပေးချက်ကိုယနေ့(အောက်တိုဘာလ ၁၂ ရက်) ညနေ ၅ နာရီ ၁၅ မိနစ်ခန့်က ကြေညာချက်ထုတ်ပြန်ခဲ့ခြင်းဖြစ်သည်။
မုံရွာနှင့် ချောင်းဦးမြို့နယ်အတွင်းရှိ မုံရွာ-ချောင်းဦး လမ်းပိုင်း၊ မုံရွာ – အမြင့်လမ်းပိုင်း၊ ခင်မွန် – ရွှေဒါးကျ (ချောင်းဆုံ) လမ်းပိုင်းများကို ယခုကြေညာချက်ထုတ်ပြန်ချိန်မှစ၍ နောက်ထပ် ကြေညာချက် တစုံတရာမထုတ်ပြန်မီအထိ အရေးပေါ်လိုအပ်ချက်အရ ယာယီပိတ်ထားလိုက်ကြောင်း ချောင်းဦး PDFက အသိပေးသည်။
ယာယီပိတ်ထားချိန်အတွင်း ကြေညာချက်ပါလမ်းပိုင်းကိုပြည်သူတို့၏ လုံခြုံရေးအတွက် လုံးဝအသုံးမပြုကြပါရန်နှင့် လိုက်နာခြင်းမရှိသူတို့၏လုံခြုံရေးအတွက်အာမ မခံပါကြောင်း သတိပေးထားသည်။
Public Service Announcement
အထက်ပါလမ်းပိုင်းတွင်သွားလာနေကြသေမော်တော်ယာဉ်များအနေဖြင့် အန္တရာယ်ကင်းရှင်းစေရန်အတွက် ရောက်ရာအရပ်တွင်ခေတ္တရပ်နားထားကြရန်နှင့် အဆိုပါလမ်းပိုင်းကိုလက်ရှိအသုံးပြုလျက်ရှိသော မိမိ၏ဆွေမျိုးမိတ်ဆွေများကို ထပ်ဆင့်အကြောင်းကြားပေးကြပါရန် ချောင်းဦး PDFက မေတ္တာရပ်ခံထားသည်။
လမ်းပိုင်းယာယီပိတ်ထားသောလမ်းများသည် စစ်ကောင်စီတပ်များ မကြာခဏဖြတ်သန်းကာ လမ်းတစ်လျှောက်ကျေးရွာများအား ဝင်ရောက်ဖျက်ဆီး မွှေနှောက်လေ့ရှိသည်။
“မနေ့က မုံရွာ-အမြင့်လမ်းက မအူကြီးကျေးရွာနဲ့ ရွှေစုံကျေးရွာတွေကို ဝင်မွှေသွားတယ်။ သားအမိနှစ်ယောက်လည်း အဖမ်းခံရတယ်ပြောတယ်။”ဟု ဒေသခံတစ်ဦးက ပြောသည်။
ယမန်နေ့ညနေပိုင်းကလည်း မုံရွာ-ချောင်းဦးလမ်းပိုင်း၌ စစ်ကောင်စီယာဥ်တစ်စီး မိုင်းဆွဲတိုက်ခိုက်ခံခဲ့ရသေးသည်။
