လောင်းလုံးနယ် မောင်းမကန်ရဲစခန်းနှင့် ကရင်ကြီးရွာမှပျူစခန်းကိုတော်လှန်ရေးတပ်ဖွဲ့များစီးနင်းတိုက်ခိုက်

▪︎စစ်ကူလားသူများကိုပါ တိုက်ခိုက်ခဲ့ရာ စစ်ကောင်စီတပ်မှ (၄၀)ခန့် သေဟုဆို

လောင်းလုံးနယ် မောင်းမကန်ရဲစခန်းနှင့် ကရင်ကြီးရွာမှပျူစခန်းကို တော်လှန်ရေးတပ်ဖွဲ့များပူးပေါင်း၍ စီးနင်းတိုက်ခိုက်ခဲ့ကြောင်း လောင်းလုံးမြို့နယ် ပြည်သူ့ကာ ကွယ်ရေးတပ်ဖွဲ့က ထုတ်ပြန်သည်။

ဒီဇင်ဘာ ၄ ရက်နေ့ည ၈ နာရီခန့်က မောင်းမကန်ရဲစခန်းနှင့် ကရင်ကြီးရွာမှ ဦးလေးလေး၏ ပျူစောထီးစခန်းတို့ကို စစ်ကြောင်းများခွဲ၍ တစ်ချိန်းတည်း တိုက်ခိုက်ခဲ့ခြင်းဖြစ်ပြီး စစ်ကောင်စီတပ်မှ ကားသုံးစီးပျက်စီးကာစစ်သား၊ရဲနှင့် ပျူ​စောထှး (၄၀) ဦးခန့် ထိခိုက်သေဆုံးသွားသည်ဟု ​ဖော်ပြထားသည်။

မောင်းမကန်ရဲစခန်းအား တိုက်ခိုက်နေစဥ်(၁၀၄)ခြေလျင်တပ်ရင်းမှကားသုံးစီးဖြင့်စစ်ကူလာရောက်ရာအသင့်စောင့်ဆိုင်းနေသော ရဲဘော်များက မိုင်း(၂၄)လုံးဖြင့် နှစ်ကြိမ်ဆက် မိုင်းဆွဲတိုက်ခိုက်ခဲ့ပြီး စစ်ကောင်စီကားနှစ်စီး ထိုးရပ်၍ တစ်စီးမီးလောင်သွားကြောင်းသိရသည်။ထို့နောက်မိနစ် ၂၀ ခန့်ကြာတိုက်ပွဲဖြစ်ပွားခဲ့ကြောင်း​သိရသည်။

အလားတူ ကရင်ကြီးရွာပျူစောထီးစခန်းတိုက်ခိုက်ခံရသည်ကို ကားတစ်စီးဖြင့် စစ်ကူလာသောအင်အား (၂၀)ခန့်ပါ စစ်ကောင်စီတပ်ကိုလည်း မောင်မကန်နှင့် ကရင်ကြီးကြားတွင် မိုင်း (၁၂)လုံးဖြင့် ဖောက်ခွဲတိုက်ခိုက်ခဲ့ရာ Vargo ကားတစ်စီး ပျက်စီးသွားပြီးထိခိုက်​သေဆုံးမှုများရှိခဲ့သည်ဟု သိရသည်။ စစ်​ကောင်စီတပ်​သေဆုံး​သေဆုံး ဒဏ်ရာရမှု အ​ခြေအ​နေကို People’s Spring ကသီးခြားအတည်မပြုနိုင်​​သေးပါ။

Public Service Announcement

အထက်ပါ တိုက်ပွဲများဖြစ်ပွားနေချိန် လောင်းလုံးမြို့ပေါ် မြေစာရင်းရုံးအနီးမိုင်းတစ်လုံးဖောက်ခွဲခဲ့သော်လည်းထိခိုက်မှုမရှိခဲ့ကြောင်း ဖော်ပြသည်။

တိုက်ခိုက်မှုများကို လောင်းလုံး(ပကဖ)၊ DGRF၊ TPDF၊ YPPDF၊ DDT တပ်ခွဲ (၃)၊ အထူးပြောက် ကျားတပ်ဖွဲ့နှင့် ထားဝယ်နဂါး ပြည်သူ့ကာကွယ်ရေးတပ်ဖွဲ့ တပ်ခွဲ (၁)တို့ ပူးပေါင်းတိုက်ခိုက်ခဲ့ခြင်းဖြစ်ပြီး ဒီဇင်ဘာ ၇ ရက်အထိ စစ်ကောင်စီတပ်မှ (၄၀)ခန့်သေဆုံးပြီး တော်လှန်ရေးရဲဘော်ငါးဦး မစိုးရိမ်ရ ဒဏ်ရာရခဲ့ကြောင်းလည်း အသိ​ပေးထားသည်။

ဆက်သွယ်​ရေးအခက်အခဲနှင့် တပ်ဖွဲ့ဝင်များလုံခြုံ​ရေး​ကြောင့် သတင်းထုတ်ပြန်မှု​နောက်ကျခဲ့ခြင်းဖြစ်ပြီး ယခုအခါ တပ်ဖွဲ့ဝင်များ​ဘေးကင်းလုံခြုံရာသို့​ရောက်ပြီဖြစ်​ကြောင်းလည်းအသိ​ပေးထားသည်။

အထက်ပါတိုက်ခိုက်မှုအခြေအနေများနှင့်စပ်လျဥ်း၍ People’s Spring မှ လောင်းလုံး(ပကဖ)နှင့် DGRF တို့ထံ ဆက်သွယ်မေးမြန်းထားသော်လည်း အဆက်အသွယ်မရသေးပေ။

ထိုအပြင် ဒီဇင်ဘာ ၅ရက်ကလည်း ထားဝယ်-ထီးခီးလမ်းအ တိုင်း မေတ္တာမြို့ လျှပ်စစ်ဓာတ်အားပေးစစ်ရုံသို့လာသော စစ်ကောင်စီ၏ တိုင်းဝန်ကြီးချုပ်ကို လုံခြုံရေးပေးမည့် စစ်ကောင်စီတပ်နှင့် ဥသြစစ်ကြေားတို့ ရမ်းဘလူရွာအနီး တိုက်ပွဲဖြစ်ပွားခဲ့ရာစစ်သား ၅ ဦး​သေဆုံးခဲ့​ကြောင်း ဥသြစစ်ကြောင်းမှ ပြန်ကြားရေးတာဝန်ခံ ရဲဘော်ကိုတေက ပြောသည်။

“ရမ်းဘလူရွာနားမှာ ဖြစ်တာဗျ။ ကျနော်တို့ ပြည်သူကို အသိပေးလိုတဲ့သဘောလောက်ပဲ ပြောလို့ရပါသေးတယ်။ အဓိကက ဒီနေရာမှာ ဒီလိုတွေဖြစ်နေတယ်ဆိုတာ သိစေလိုတဲ့ဆန္ဒပါပဲ။ အားလုံးထုတ်ပြန်လို့ မရသေးပါဘူးဗျ”ဟု ဥသြစစ်ကြောင်းမှ ပြန်ကြားရေးတာဝန်ခံ ရဲဘော်ကိုတေက People’s Spring သို့ပြောသည်။

စစ်ကောင်စီတပ်လူကြီးလမ်းကြောင်းနှင့်စပ်လျဥ်းပြီးထားဝယ်-ထီးခီးလမ်းပိုင်း အရှေ့တောဒေသတွင် စစ်ကောင်စီအင်အား ၁၅၀ မှ ၂၀၀ ကြား ကင်းပုန်း ချထားပြီး အချိန်မရွေး ထိတွေ့တိုက်ပွဲဖြစ်နိုင်ကြောင်း ၎င်းက အသိပေးသည်။

ထို့အပြင် အရှေ့တောဒေသသို့ စစ်ကြောင်းထိုးနေသော စစ်ကောင်စီတပ်သည် စစ်ကြောင်းတစ်လျှောက်ရှိ ကျေး ရွာများမှ ဒေသခံပြည်သူများအား ဖမ်းဆီးနှိပ်စက်ခြင်း၊ ဓားစာခံဖမ်းဆီးခြင်းများ ရှိနေခြင်းကြောင့် ပြည်သူများ သတိပြုသွားလာနေထိုင်ကြရန် သတိပေးထားသည်။

ယခုရက်ပိုင်းအတွင်း တနသာ်ရီတိုင်းအတွင်း ​တော်လှန်​ရေးအင်အားစုများက ခုခံ​တော်လှန်စစ်ကိုအရှိန်မြှင့်တိုက်ခိုက်လာပြီး တိုက်ပွဲများ​နေရာအနှံတွင်ဆက်တိုက်ဖြစ်ပွား​နေသည်။