ကရင်အမျိုးသားအစည်းအရုံး(KNU) ညောင်လေးပင်ခရိုင်(ခလယ်လွီထူခရိုင်) ဆောထိမြို့နယ်ရှိ အရပ်သား ပြည်သူတစ်ဦးကို စစ်ကောင်စီတပ်က ညှင်းပန်းနှိပ်စက်သတ်ဖြတ်ပြီး နှစ်ဦးကို အကြောင်းမဲ့ဖမ်းဆီးထားကြောင်း KNUက ယနေ့ ထုတ်ပြန်သည်။
စစ်ကောင်စီ၏ ခမရ(၂၀၇)တပ်ရင်းသည် ဇန်နဝါရီ ၂၂ရက်တွင် ရွှေကျင်မြို့နယ် ဆိတ်ကလေးဆူးတောရွာမှ အသက် (၄၀)အရွယ် ကိုကျော်ဇင်လတ်(ခ)ရှမ်းကြီးကို ဖမ်းဆီးခဲ့ကြောင်း၊ စစ်ကြောရေး၌ သုံးရက်ကြာ စစ်ဆေးခဲ့ပြီး ဇန်နဝါရီ ၂၅ ရက်တွင် သိမ်ဇရပ်နာရေးကူညီမှုအသင်းကို ခေါ်ယူပြီး ကိုကျော်ဇင်လတ်၏ ရုပ်အလောင်းကို မိသားစုထံ ပြန်လည်ပို့ဆောင်ခဲ့ကြောင်း ဖော်ပြသည်။
ကိုကျော်ဇင်လတ်၏ ရုပ်အလောင်းပြန်ရသည့်အချိန်တွင်ပြင်းထန်သည့် ဒဏ်ရာဒဏ်ချက်များစွာကို တွေ့ရသည်ဟု ဆိုသည်။
သတ်ဖြတ်ခံရသည့် ကိုကျော်ဇင်လတ်သည် ကယ်ရီ လုပ်ငန်း လုပ်ကိုင်သူဖြစ်ပြီး ဇန်နဝါရီ ၂၂ရက်က ကျိုက်ထိုမြို့နယ် သိမ်ဇရပ်ဘက်သို့ ကယ်ရီလိုက် သွားကြောင်း၊ ထိုသို့ လိုက်သွားစဉ် ခမရ(၂၀၇) တပ်ရင်းရှေ့ရှိ ကွမ်းယာဆိုင်မှ အသိအမျိုးသမီးတစ်ဦးနှင့် တွေ့ဆုံစဉ် ကွမ်းယာရောင်းသူ အမျိုးသမီးက ပျောက်သွားသည့်သူမ၏ အမျိုးသားကို ကိုကျော်ဇင်လတ်(ခ)ရှမ်းကြီးက PDF ထံသို့ ခေါ်ဆောင်သွား သည်ဟု စွပ်စွဲကာရန်ရှာခဲ့ရာ ကွမ်းယာဆိုင်၌ ထိုင်နေသည့် စစ်ကောင်စီ တပ်မှူးက ကို ကျော်ဇင်လတ်အား ဖမ်းဆီးပြီး သတ်ဖြတ်ခဲ့ခြင်းဖြစ်သည်ဟု ဖော်ပြသည်။
Public Service Announcement
ဇန်နဝါရီ ၂၂ရက်၌ပင် ဆောထိမြို့နယ်တွင် တပ်စွဲထားသော အာဏာသိမ်းအကြမ်းဖက် စစ်ကောင်စီတပ်သည် KNU လယ်ဒိုမြို့နယ်၊ တုံးတံတား ကျေးရွာရှိ အရပ်သားပြည်သူနှစ်ဦးကို ဖမ်းဆီးသွားကြောင်း၊ ဖမ်းဆီးခံရသည့် အကြောင်းအရင်းကို မသိရသေးဘဲ ဇန်နဝါရီ ၂၈ရက်အထိ ပြန်လွတ်လာခြင်းမရှိကြောင်း KNUက ဆိုသည်။
ဖမ်းဆီးခံရသည့် အရပ်သားပြည်သူနှစ်ဦးမှာ စောအယ်ထူး အသက် (၃၅)နှစ်နှင့် စောပါချစ် အသက် (၃၀)နှစ် တို့ဖြစ်သည်ဟု ဆိုသည်။
စစ်ကောင်စီတပ်သည် ဒေသအသီးသီး၌ ပြည်သူ လူထုများကို အကြောင်းမဲ့ ဖမ်းဆီးသတ်ဖြတ်ခြင်းများ ဆက်တိုက်ကျူးလွန်လျက်ရှိသည်။
