'/%3E%3C/svg%3E){kind=small}
စက်တင်ဘာ ၁၅၊ ၂၀၂၆။ ထားမြတ်/People’s Spring
ကချင်ပြည်နယ်၊ ဗန်းမော်မြို့နယ် ကောင်ဂျာယန်တိုက်ပွဲမှာ စစ်တပ်အထိနာခဲ့ပြီး သေဆုံးထိခိုက်များခဲ့သလို လက်နက်ခဲယမ်းအများအပြား သိမ်းရခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။
စစ်တပ်က ကောင်ဂျာယန်ကျေးရွာဘက် ထိုးစစ်ဆင်လာလို့ ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်ခဲ့ရာ စက်တင်ဘာ ၁၂ရက်ညနေပိုင်းကနေ စက်တင်ဘာ ၁၄ရက်အထိ တိုက်ပွဲတွေဖြစ်ပွားခဲ့တယ်လို့ ဆိုပါတယ်။
အဲဒီတိုက်ပွဲမှာ စစ်တပ်က သေဆုံးသူ ၄၀ကျော်ရှိသလို စစ်ကောင်စီတပ်ဖွဲ့ဝင် ၃၀ ကျော်ကို အရှင်ဖမ်းမိခဲ့ပြီး စစ်တပ်စစ်ကြောင်းတစ်ခုလုံးပြုတ်သွားကြောင်း ကချင်စစ်ရေးသတင်းရင်းမြစ်က ပြောပါတယ်။
Public Service Announcement
“မနေ့က ကောင်ဂျာယာန်မှာ ရတဲ့ လက်နက်ခဲယမ်းတွေ” လို့ ကချင်သတင်းရင်းမြစ်က သိမ်းဆည်းရရှိတဲ့ လက်နက်ခဲယမ်းတွေကို ရိုက်ကူးထားတဲ့ ရုပ်သံမှတ်တမ်းကို ပြသပါတယ်။
ရုပ်သံမှတ်တမ်းပါ လက်နက်ခဲယမ်းတွေကို ရေတွက်ကြည့်ရာ လက်နက်ကြီးငယ်မျိုးစုံ အလက် ၅၀ခန့်နဲ့ လက်ပစ်ဗုံးတွေ၊ ကျည်တွေ၊ အီနာဂါဗုံးသီးတွေ ကျည်ဘေက်တွေ၊ လက်နက်ကြီးကျည်တွေ၊ RPG ဗုံးသီးတွေ၊ ဒရုန်းဂျန်ဘာနဲ့ ဆက်စပ်ပစ္စည်းတွေ သိမ်းရထားတာကို တွေ့ရပါတယ်။
စစ်တပ်ဟာ ဗန်းမော်မြို့နယ် စင်းခန်းတံတားအနီး တိုက်ပွဲနဲ့ ရွှေကူမြို့နယ် ဇင်းဘုံကျေးရွာအနီးတိုက်ပွဲတွေမှာလည်းအထိနာလျက်ရှိပါတယ်။ အဲဒီဒေသ တိုက်ပွဲတွေမှာလည်း KIA ပူးပေါင်းတပ်ရဲ့ တိုက်ခိုက်မှုကြောင့် စစ်တပ်ဘက်က တပ်ရင်းမှူးအဆင့် အရာရှိတွေအပါအဝင် သေဆုံးထိခိုက်များပြားခဲ့တယ်လို့ စစ်ရေးသတင်းရင်းမြစ်တွေက ပြောပါတယ်။
စစ်တပ်ဟာ ကချင်ပြည်နယ်ကို ရေကြောင်းကနေ စစ်အင်အားဖြည့်ဖို့ ကြိုးပမ်းနေသလို မြေပြင်ကလည်း ထိုးစစ်ဆင်တာတွေ တပြိုင်တည်းလုပ်ဆောင်ခဲ့ပေမဲ့ အဲဒီ စစ်ဆင်ရေးနှစ်ခုလုံး အောင်မြင်မှု မရှိဘဲ KIA ပူးပေါင်းတပ်ရဲ့ တိုက်ခိုက်မှုအောက်မှာ သင်္ဘောတွေ ထိခိုက်ပျက်စီးတာ၊ စစ်ကောင်စီတပ်တွေသေဆုံးထိခိုက် စစ်သုံ့ပန်းဖြစ်ရတာတွေများစွာ ရှိခဲ့ပြီး စစ်တပ်ရဲ့ စစ်ရေးလှုပ်ရှားမှုတွေကျရှုံးလျက်ရှိပါတယ်။
