အရပ်သားပြည်သူရာနှင့်ချီ သေဆုံးခဲ့ရသည့် စစ်ကိုင်းတိုင်း ကန့်ဘလူမြို့နယ် ပဇီကြီးရွာ လေကြောင်းတိုက်ခိုက်မှုလုပ်ရပ်အပေါ် ကန့်ကွက်ရှုံ့ချကြောင်း အာဏာသိမ်းစစ်ကောင်စီနှင့် ဆွေးနွေးနေသည့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST)က ကြေညာချက်ထုတ်ပြန်သည်။
“ပဇီကြီးကျေးရွာ၌ ဖြစ်ပွားခဲ့သော အရပ်သားအများအပြား သေဆုံးဒဏ်ရာရခဲ့သည့် လေကြောင်း တိုက်ခိုက်မှုဖြစ်ရပ်အပါအဝင် အရပ်သားပြည်သူများအား ထိခိုက်နစ်နာစေသည့် မည်သည့်အင်အားသုံး တိုက်ခိုက်မှုမျိုးကိုမဆို မိမိတို့အနေဖြင့် ကန့်ကွက်ရှုံ့ချသည်”ဟု PPST ၏ထုတ်ပြန်ချက်၌ ရေးသားခဲ့ခြင်းသာဖြစ်သည်။
လက်ရှိ နိုင်ငံရေးအကျပ်အတည်းအား ဖြေရှင်းနိုင်ရေးအတွက် ပဋိပက္ခ၌ အဓိက အခန်းကဏ္ဍတွင် ပါဝင်နေကြသည့် သက်ဆိုင်သူများအားလုံး ဝိုင်းဝန်းဆွေးနွေးအဖြေရှာရန် တိုက်တွန်းကြောင်းလည်း PPSTက ဆိုသည်။
PPST အနေဖြင့် NCAထိုးထားသည် နိုင်ငံရေးပြဿနာ နိုင်ငံရေးနည်းဖြင့်သာ ဖြေရှင်းရမည်ဟု အကြောင်းပြပြီး လက်နက်အားကိုးဖြင့် အာဏာသိမ်းပြီး ပြည်သူလူထုအား အကြမ်းဖက် သတ်ဖြတ်နေသည့် စစ်ကောင်စီတပ်နှင့် ဆွေးနွေးမှုများ လုပ်ဆောင်လျက်ရှိသည်။
Public Service Announcement
PPSTကို ယခင်က NCA လက်မှတ်ထိုး တိုင်းရင်းသားလက်နက်ကိုင် ၁၀ဖွဲ့ဖြင့် စုဖွဲ့ထားသော်လည်း အာဏာသိမ်းပြီးနောက်ပိုင်း ကရင်အမျိုးသားအစည်းအရုံး(KNU)၊ ချင်းအမျိုးသားတပ်ဦး (CNF)၊ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး(ABSDF)တို့က စစ်ကောင်စီနှင့်ဆွေးနွေးမှု မပြုဘဲ ကျန် ၇ဖွဲ့ စစ်ကောင်စီနှင့် ဆွေးနွေးလျက်ရှိသည်။
စစ်ကောင်စီနှင့် ဆွေးနွေးမှုတွင် ပါဝင်သည့် PPST အဖွဲ့ဝင်များမှာ ရှမ်းအဖွဲ့(RCSS)၊ မွန်အဖွဲ့(NMSP) ၊ ပအိုဝ်းအဖွဲ့(PNLO)၊ လားဟူအဖွဲ့(LDU)၊ ရခိုင်အဖွဲ့(ALP)၊ ကရင်ငြိမ်းချမ်းရေးကောင်စီ(PC)နှင့် DKBA တို့ဖြစ်သည်။
