ပြည်သူပိုင်နိုင်ငံခြားအရန်ငွေများကို စစ်ကောင်စီအသုံးပြုနေခြင်းကို တားဆီးရန် ကြားကာလဗဟိုဘဏ်ဖွဲ့စည်းပြီး ၎င်းတာဝန်ကို စီမံကိန်း၊ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာနအား အာဏာအပ်နှင်းလိုက်ကြောင်း အမျိုးသားညီညွတ်ရေးအစိုးရ(NUG)၊ယာယီသမ္မတ ဒူးဝါးလရှီးလက ယနေ့ထုတ်ပြန်လိုက်သည်။
ယာယီသမ္မတက ဥပဒေကဲ့သို့အာဏာတည်သောအမိန့်ထုတ်ပြန်၍ နိုင်ငံတကာနှင့် ဒေသတွင်း ဗဟိုဘဏ်များနည်းတူဗဟိုဘဏ်လုပ်ငန်းများကိုဆောင်ရွက်ရန်အတွက် ကြားကာဗဟိုဘဏ်အဖြစ် အာဏာအပ်နှင်းရခြင်းဖြစ်သည်ဟုရှင်းလင်းထားသည်။
ကြားကာလဗဟိုဘဏ်ကို ဒါရိုက်တာအဖွဲ့ဖွဲ့စည်း၍ စီမံခန့်ခွဲရမည်ဖြစ်ပြီး ဥက္ကဌသည် အမျိုးသားညီညွတ်ရေးအစိုးရ၊ စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီးက ပူးတွဲဆောင်ရွက်ရမည်ဟု ယာယီသမ္မတက ထုတ်ပြန်ထားသည်။
ထိုအမိန့်သည် ဇွန် ၁ ရက်တွင် စတင်အာဏာတည်ရမည်ဟုလည်း ထိုအမိန့်စာတွင်ဖော်ပြထားသည်။
Public Service Announcement
“ဗဟိုဘဏ်လုပ်ငန်းက အစိုးရတရပ်အတွက်မဖြစ်မနေလိုအပ်တဲ့ ဌာနတစ်ခုပါ။ အခုလိုကြားကာလမှလည်း လိုအပ်ပါတယ်။ ကျပ်ငွေကို စစ်ကောင်စီက ထိန်းချုပ်ပြီး လူထုကို အနိုင်ကျင့်နေတဲ့အချိန်မှာ တော်လှန်ရေးအစိုးရဘက်ကလည်း တန်ပြန်တုန့်ပြန်မှုတွေလုပ်ရမှာ” ဟု ငွေကြေးဆိုင်ရာစီးပွားရေးလုပ်ငန်းရှင်တစ်ဦးက သုံးသပ်ပြသည်။
ထိုအမိန့်စာတွင် စစ်ကောင်စီသည် နိုင်ငံတော်အာဏာကို လုယူပြီးနာက် အဖက်ဖက်မှ ပျက်စီးယိုယွင်းမှုများထဲတွင်ဘဏ်လုပ်ငန်းကဏ္ဍလည်းပါဝင်သည်ဟုဖော်ပြထားသည်။ စစ်ကောင်စီထိန်းချုပ်ထားသည့် ဘဏ်များသည် အပ်ငွေအပ်နှံသူပြည်သူများ၏ အကျိုးစီးပွားကိုမကြည့်ဘဲ အကြမ်းဖက်စစ်ကောင်စီအလိုကျဆောင်ရွက်ခဲ့၍ ပြည်သူများ နစ်နာဆုံးရှုံးမှုများ ခံစားခဲ့ရသည်ဟုအသိပေးထားသည်။
ထိုပြင် စစ်ကောင်စီသည် နိုင်ငံခြားအရန်ငွေများကိုလည်းပြည်သူများကို သတ်ဖြတ်ရန် လေယာဉ်ဆီအပါအဝင် လက်နက်နှင့် လက်နက်ထုတ်လုပ်ရေးပစ္စည်းများဝယ်ယူခဲ့သည်။ ထိုသို့ ပြည်သူများ နစ်နာဆုံးရှုံးမှုများကို အချိန်မီကုစားနိုင်ရန်၊ ဘဏ်လုပ်ငန်းကို ထိရောက်စွာထိန်းကျောင်းနိုင်ရန် နှင့် နိုင်ငံခြားအရန်ငွေများကို စစ်ကောင်စီသုံးစွဲခြင်း ကာကွယ်တားဆီးနိုင်ရန် အတွက် ကြားကာလဗဟိုဘဏ်ကို ဖွဲ့စည်းရခြင်းဖြစ်သည်ဟု ယာယီသမ္မတ၏ အမိန့်စာတွင်ဖော်ပြထားသည်။
